Alkitab Mobile SABDA
[VER] : [BABA]     [PL]  [PB] 
 <<  Lukas 13 >> 

1Itu ktika ada orang di situ yang bilangkan dia deri-hal orang-orang Galil, yang Pilatus sudah champurkan darah dia-orang sama-sama dia-orang punya korban.

2Dan Isa jawab kata sama dia-orang, "Ada-kah kamu fikir yang itu orang Galil jadi orang berdosa lbeh deri-pada kbanyakan orang Galil, deri sbab dia-orang sudah mrasa itu smoa?

3Sahya kata sama kamu, 'Bukan:' ttapi, jikalau kamu ini t'ada bertobat, tntu-lah kamu pun smoa nanti binasa bgitu juga.

4Atau deri-hal itu lapan-blas orang yang kna timpa oleh mnarah di Siloam sampaikan mati, ada-kah kamu fikir dia-orang lbeh jahat deri-pada smoa orang yang tinggal di Yerusalim?

5Sahya kata sama kamu, 'Bukan:' ttapi jikalau kamu ini t'ada bertobat, tntu-lah kamu pun smoa nanti binasa bgitu juga."

6Dan Isa katakan satu perumpama'an: "Satu orang ada satu pokok ara yang sudah tanam di kbun anggor-nya; dan dia datang chari buah di pokok itu, ttapi t'ada juga dapat.

7Jadi dia kata sama tukang-kbun, 'Tengok, sudah tiga tahun sahya datang chari buah di pokok ara ini, t'ada juga dapat: tbangkan; apa guna dia rosakkan tanah pula?'

8Tukang-kbun jawab kata sama dia, 'Tuan, biarkan ini tahun pun, sampai sahya sudah changkol kliling dia, dan taroh baja:

9dan jikalau kluar buah kmdian deri-pada itu, baik juga; ttapi kalau tidak, tuan boleh tbangkan.'"

10Dan Isa ada mngajar orang dalam rumah-smbahyang tempo hari-perhentian.

11Dan ada satu prempuan yang terkna jin lmah-lmahan, sudah lapan-blas tahun punya lama; sampaikan bongkok skali blakang-nya, dan ta'boleh-lah dia btulkan diri-nya,

12Bila Isa tengok ini prempuan, dia panggil, dan kata sama dia, "Hei nyonya, terlpas-lah angkau deri-pada klmahan itu."

13Dan dia taroh tangan atas itu prempuan: dan itu juga dia mnjadi btul, dan muliakan Allah.

14Dan itu kpala rumah-smbahyang naik gram, sbab Isa sudah smbohkan orang tempo hari-perhentian, jadi dia jawab kata sama orang-banyak itu, "Ada anam hari orang patut kerja: dalam ini anam hari mari dapat smboh, dan bukan tempo hari-perhentian."

15Ttapi Tuhan jawab sama itu orang, dan kata, "Hei orang pura-pura, bukan-kah tempo hari-perhentian kamu masing-masing lpaskan lmbu atau kaldai-nya deri-pada kandang, dan bawa dia pergi minum?

16Dan ini prempuan, satu anak Ibrahim, yang sudah terikat oleh Setan lapan-blas tahun punya lama, t'ada-kah patut dia di-lpaskan deri-pada ini ikatan tempo hari-perhentian?"

17Bila Isa kata ini, smoa orang yang mlawan dia jadi malu, dan smoa orang-banyak bersuka-suka kerna sgala perkara mula-mula yang dia sudah buat.

18Sbab itu Isa kata, "Kraja'an Allah ada sama sperti apa-kah? dan dngan apa-kah boleh sahya samakan dia?

19Dia sama sperti satu biji ssawi, yang satu orang ambil tanamkan dalam kbun-nya sndiri; dan itu biji bertumboh mnjadi pokok; dan burong-burong tumpang di dahan-dahan-nya."

20Dan lagi skali dia kata, "Dngan apa-kah sahya boleh samakan kraja'an Allah?

21Dia ada sama sperti ragi yang satu prempuan ambil smbunyikan dalam tiga sukatan punya tpong, sampaikan smoa-nya sudah berragi."

22Dan Isa berjalan trus negri-negri dan kampong-kampong, mngajar orang, dan berjalan mnuju Yerusalim.

23Dan ada satu orang kata sama dia, "Ya Tuhan, ada-kah sikit saja orang yang dapat alamat?" Dan dia kata sama dia-orang,

24Usahakan-lah diri masok pintu yang smpit: kerna sahya kata sama kamu, banyak orang nanti chari jalan mau masok, ttapi ta'boleh.

25Bila tuan-rumah sudah bangun, dan tutopkan pintu, dan kamu mula'i berdiri di sblah luar, dan mula'i ktok-ktok di pintu, serta kata, 'Tuhan, bukakan pintu kerna kita;' dan dia pula jawab kata sama kamu, 'Sahya ta'tahu kamu deri mana datang;'

26bharu-lah kamu nanti mula'i kata, 'Kita sudah makan-minum di dpan Tuhan, dan Tuhan pun sudah mngajar di jalan-jalan kita;'

27dan dia nanti kata, 'Sahya kata sama kamu, sahya ta'tahu deri mana kamu datang; undor deri-pada sahya, kamu smoa yang buat kjahatan.'

28Di situ-lah nanti ada mnangis sama gertak gigi, bila kamu nanti tengok Ibrahim dan Isahak dan Yakob, dan sgala nabi-nabi dalam kraja'an Allah, ttapi kamu sndiri terbuang di sblah luar.

29Dan orang nanti datang deri sblah timor dan deri sblah barat, deri sblah utara dan deri sblah slatan, dan nanti dudok di dalam kraja'an Allah.

30Dan ingat, ada orang yang blakang skali nanti jadi yang mula-mula, dan ada orang yang mula-mula nanti jadi blakang skali."

31Itu jam juga ada orang Farisi datang kata sama dia, "Pergi kluar deri sini: kerna Herodis punya maksud mau bunoh angkau."

32Dan Isa kata sama dia-orang, "Kamu boleh pergi kata sama itu srigala, 'Ini hari sama besok sahya buangkan jin dan smbohkan orang, dan lusa sahya nanti di-smpurnakan.'

33Dalam pada itu, sahya msti juga berjalan ini hari sama besok dan lusa pun, kerna satu nabi ta'boleh binasa di luar Yerusalim.

34Hei Yerusalim, Yerusalim, yang bunoh nabi-nabi, dan hntam batu sama orang yang di-hantarkan k-pada-mu! brapa kali sahya sudah mau kampongkan angkau punya anak-anak, sperti satu ekor ibu-ayam kampongkan anak-anak-nya di bawah kpak, ttapi kamu ta'mau.

35Tengok-lah, rumah kamu nanti di-tinggalkan sunyi k-pada kamu: dan sahya kata sama kamu, skali-kali kamu t'ada nanti tengok sahya lagi, sampai kamu nanti kata, 'Berkat-lah dia yang datang dalam nama Tuhan.'"


  Share Facebook  |  Share Twitter

 <<  Lukas 13 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran