Alkitab Mobile SABDA
[VER] : [BABA]     [PL]  [PB] 
 <<  Lukas 14 >> 

1Waktu Isa masok satu pnghulu orang Farisi punya rumah tempo hari-perhentian mau makan roti, orang ada jaga sama dia.

2Dan di dpan dia ada satu orang yang sakit smbab.

3Isa jawab, kata sama itu guru-taurit dan orang Farisi smoa, "Ada-kah halal smbohkan orang tempo hari-perhentian, atau tidak?"

4Ttapi dia-orang diam saja. Jadi Isa ambil dan smbohkan dia, kmdian kasi dia pergi.

5Dan Isa kata sama dia-orang, "Jikalau kamu punya kaldai atau lmbu sudah jatoh dalam prigi, mana orang antara kamu smoa t'ada nanti tarek dia kluar itu juga, tempo hari-perhentian?"

6Dan ini smoa pun dia-orang ta'boleh jawab.

7Dan Isa katakan satu perumpama'an sama orang jmpotan, sbab dia sudah tengok bagimana dia-orang pileh tmpat yang mulia-mulia, dan dia kata sama dia-orang,

8"Bila orang jmpot sama angkau pergi perjamuan kahwin, jangan dudok di tmpat mulia-mulia; kalau barangkali dia sudah jmpot pula satu orang yang ada lbeh pangkat deri-pada angkau,

9dan dia yang sudah jmpot sama angkau dan sama dia pun nanti datang kata sama angkau, 'Kasi tmpat sama ini orang;' itu ktika dngan malu angkau nanti mula'i ambil tmpat yang rndah skali.

10Ttapi bila orang jmpot sama angkau, pergi dudok di tmpat yang rndah skali; spaya bila itu orang yang sudah jmpot sama angkau datang, dia boleh kata sama angkau, 'Hei sohbat, naik-lah atas sikit:' itu ktika angkau nanti dapat hormat di dpan smoa orang yang dudok makan sama-sama angkau.

11Kerna tiap-tiap orang yang tinggikan diri-nya, dia-lah nanti di-rndahkan; dan orang yang rndahkan diri-nya nanti di-tinggikan."

12Dan sama itu orang yang sudah jmpot sama dia Isa kata, "Bila angkau buat perjamuan, baik tngah hari atau malam, jangan jmpot angkau punya sohbat-sohbat atau sudara-sudara dlaki, atau angkau punya chikeweh atau orang sblah-mnyblah yang kaya-kaya; spaya jangan dia-orang pula jmpot angkau balek, mnjadi balasan k-pada angkau.

13Ttapi bila angkau buat perjamuan, baik angkau jmpot orang-orang miskin, kudong, tempang, dan buta:

14dan angkau nanti dapat berkat; kerna dia-orang t'ada apa-apa mau balas sama angkau: ttapi angkau nanti dapat balasan dalam kbangkitan orang yang bnar."

15Dan ada satu orang yang dudok makan sama-sama, bila dia dngar ini smoa, dia kata sama Isa, "Berkat-lah orang yang nanti makan roti di dalam kraja'an Allah."

16Ttapi Isa kata sama dia, "Ada satu orang buat perjamuan bsar; dan dia jmpot banyak orang:

17dan waktu mau makan, dia suroh hamba-nya pergi kata sama orang jmpotan, 'Mari-lah, kerna skarang smoa sudah sdia.'

18Ttapi dia-orang smoa dngan satu hati mula'i minta mahap. Yang nombor satu kata sama dia, 'Sahya sudah bli satu ladang, dan sahya msti pergi tengok: jadi sahya minta mahap.'

19Lain orang kata, 'Sahya sudah bli lmbu lima pasang, dan sahya mau pergi choba sama dia: jadi sahya minta mahap.'

20Dan lain orang pula kata, 'Sahya bharu kahwin, sbab itu sahya ta'boleh datang.'

21Dan itu hamba datang bilangkan ini smoa sama tuan-nya. Itu ktika tuan-rumah itu naik marah, dan kata sama hamba-nya, 'Lkas pergi luar di jalan-jalan dan lorong-lorong negri, dan bawa masok di sini orang-orang miskin, dan kudong, dan buta, dan tempang.'

22Dan itu hamba kata, 'Ya tuan, sudah jadi sperti tuan suroh, ttapi ada tmpat lagi.'

23Dan itu tuan kata sama hamba itu, 'Pergi di jalan-jalan bsar dan di kampong-kampong, paksa orang masok, spaya rumah sahya pnoh.

24Kerna sahya bilang sama kamu smoa, antara itu orang jmpotan, satu orang pun t'ada nanti dapat kchap perjamuan sahya."

25Dan ada banyak orang berjalan sama-sama Isa: dan dia balek muka kata sama dia-orang,

26"Jikalau barang-siapa datang k-pada sahya, ttapi t'ada bnchi sama dia punya bapa, dan mak, dan bini, dan anak-anak-nya, dan sudara dlaki, dan sudara prempuan, ya, kalau t'ada bnchi nyawa-nya sndiri, dia ta'boleh jadi anak-murid sahya.

27Barang-siapa t'ada pikul dia punya salib sndiri, dan ikut sama sahya, dia ta'boleh jadi anak-murid sahya.

28Jikalau mau naikkan satu mnarah, siapa-kah antara kamu smoa yang t'ada nanti dudok dhulu hitong blanja-nya, kalau ada chukop mau habiskan?

29Jangan pula bila dia sudah taroh alas-nya, dan ta'boleh habiskan, smoa orang yang tengok nanti mula'i olok-olokkan dia,

30dan kata, 'Ini orang sudah mula'i naikkan, ttapi ta'boleh habiskan.'

31Atau jikalau mau lawan prang sama lain raja, mana satu raja t'ada nanti dudok dhulu dan bichara kalau dngan s-laksa orang dia boleh bertmu sama raja yang datang lawan dia dngan dua laksa orang?

32Jikalau ta'boleh, dia nanti suroh utusan-nya pergi tanya fasal perdamaian, ktika lain raja itu ada jauh lagi.

33Bgitu juga baik siapa pun antara kamu yang t'ada tinggalkan smoa skali yang dia ada, dia ta'boleh jadi anak-murid sahya.

34Baik juga garam; ttapi jikalau garam pun sudah jadi tawar, sama apa-kah boleh pulangkan rasa-nya?

35Sudah jadi ta'berguna, baik k-pada tanah, baik k-pada buat baja: orang buangkan. Orang yang ada kuping dngar, biar-lah dia dngar."


  Share Facebook  |  Share Twitter

 <<  Lukas 14 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran