Alkitab Mobile SABDA
[VER] : [BABA]     [PL]  [PB] 
 <<  Lukas 21 >> 

1Isa angkat mata dan tengok orang kaya-kaya masokkan pmbrian-nya dalam tmpat wang.

2Dan dia tengok satu prempuan bujang yang miskin masokkan dua duit kchil di situ.

3Isa kata, "Dngan sunggoh sahya bilang sama kamu, ini prempuan bujang yang miskin sudah masokkan lbeh deri-pada smoa-nya:

4kerna ini smoa sudah masokkan pmbrian deri kmewahan-nya: ttapi ini prempuan deri-pada dia punya kkurangan sudah masokkan smoa dia punya kahidopan."

5Dan waktu orang chakap deri-hal ka'abah ada berrias dngan batu yang indah-indah dan persmbahan pun, Isa kata.

6"Deri-hal ini smoa yang kamu ada tengok, hari-nya nanti datang bila t'ada nanti tertinggal di sini satu batu bersusun di atas lain, yang t'ada nanti di-rubohkan."

7Dan dia-orang tanya sama dia, dan kata, "Guru, kalau bgitu, bila-kah ini smoa nanti jadi? dan apa-kah tanda bila ini smoa sudah dkat mau jadi?"

8Dan dia kata, "Jaga baik-baik jangan orang kasi kamu ssat: kerna banyak orang nanti datang dalam nama sahya, dan kata, 'Sahya ini-lah dia;" dan 'Hari-nya sudah dkat': jangan kamu pergi ikut sama dia-orang.

9Dan bila kamu dngar deri-hal prang dan deri-hal huru-hara, jangan jadi terpranjat: kerna smoa ini msti jadi dhulu; ttapi ksudahan itu bukan ini juga."

10Kmdian dia kata sama dia-orang, "Bangsa nanti bangun mlawan bangsa, dan kraja'an mlawan kraja'an:

11dan nanti ada gmpa bumi yang bsar-bsar, dan dalam macham-macham tmpat nanti ada klaparan dan sampar; dan nanti ada perkara yang kasi takot, dan tanda-tanda bsar deri langit.

12Ttapi s-blum ini smoa, orang nanti tangkap sama kamu, dan aniayakan kamu, dan srahkan kamu k-pada majlis rumah-smbahyang dan jel pun, dan orang nanti bawa kamu dpan raja-raja dan gobernor, kerna nama sahya punya sbab.

13Dan ini nanti jadi sama kamu satu tempo bersaksi.

14Sbab itu tntukan dalam hati kamu, jangan fikir dhulu bagimana mau jawab:

15kerna sahya nanti kasi kamu satu mulut dan bijaksana, yang smoa kamu punya musoh t'ada boleh lawan atau bantahkan.

16Ttapi kamu nanti kna srah oleh mak-bapa pun, dan sudara-sudara, dan chikeweh, dan sohbat-sohbat: dan sparoh deri-pada kamu dia-orang nanti kasi bunoh.

17Dan smoa orang nanti bnchi kamu sbab nama sahya.

18Dan t'ada satu lai rambot kamu nanti binasa.

19Dalam kamu punya sabar kamu nanti dapat nyawa kamu.

20"Ttapi bila kamu tengok Yerusalim kna kpong oleh bala-tntra, itu jam biar-lah kamu tahu yang dia punya kbinasa'an sudah dkat.

21Itu ktika biar orang yang ada di tanah Yahudiah lari pergi di gunong-gunong; dan biar orang yang ada dalam itu negri kluar deri situ; dan orang yang ada di dusun jangan masok negri.

22Kerna itu-lah hari pmbalasan, spaya smoa perkara yang ada tersurat boleh di-sampaikan.

23Susah-lah prempuan yang mngandong dan yang kasi anak tetek itu tempo! kerna nanti ada ksusahan yang bsar skali atas ini tanah, dan marah atas ini bangsa.

24Dan dia-orang nanti jatoh mati oleh mata pdang, dan jadi tawanan k-pada smoa bangsa: dan Yerusalim nanti kna orang bangsa-asing injak, sampai orang bangsa-asing punya jman pula sudah gnap.

25Dan nanti ada tanda-tanda di matahari, dan di bulan, dan di bintang-bintang; dan atas bumi nanti ada ksusahan sgala bangsa, serta bingong sbab laut dan ombak yang mndru;

26orang terpengsan sbab takot, dan sbab nantikan perkara-perkara yang mau datang atas ini dunia: kerna sgala kuasa langit nanti di-gonchangkan.

27Kmdian dia-orang nanti tengok Anak-manusia datang dalam satu awan, dngan bsar punya kuasa dan kmulia'an.

28Ttapi bila ini smoa mula'i jadi, tngadah-lah dan angkat kpala kamu; kerna tbusan kamu sudah dkat."

29Dan Isa katakan sama dia-orang satu perumpama'an: "Tengok itu pokok ara dan lain-lain pokok pun:

30bila dia kluarkan puchok, kamu lihat dan sndiri tahu yang musim-panas sudah dkat.

31Bgitu-lah kamu pun, bila kamu tengok ini smoa ada jadi, biar-lah kamu tahu yang kraja'an Allah sudah dkat.

32Dngan sunggoh sahya kata sama kamu, ini jman punya orang t'ada nanti lnnyap s-blum smoa ini perkara jadi.

33Langit sama bumi nanti lnnyap: ttapi sahya punya perkata'an t'ada skali-kali nanti lnnyap.

34"Ttapi jaga kamu punya diri baik-baik, jangan kamu punya hati di-bratkan oleh glojoh dan mabok, dan khuatir deri-hal ini kahidopan, dan jangan itu hari datang atas kamu serta-merta sperti satu jrat:

35kerna itu hari nanti datang atas sgala orang yang tinggal di sluroh muka bumi.

36Ttapi baik kamu slalu berjaga, dan minta do'a, spaya kamu dapat terlpas deri-pada smoa ini perkara yang nanti jadi, dan berdiri di dpan Anak-manusia."

37Tiap-tiap siang hari Isa ada mngajar dalam ka'abah: dan tiap-tiap malam dia kluar, tinggal di bukit yang bernama Bukit Zaitun.

38Dan s-gnap bangsa itu datang k-pada dia pagi-pagi di dalam ka'abah, mau dngar sama dia.


  Share Facebook  |  Share Twitter

 <<  Lukas 21 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel