Alkitab Mobile SABDA
[VER] : [BABA]     [PL]  [PB] 
 <<  Lukas 7 >> 

1Bila sudah habis smoa dia punya perkata'an di kuping orang-orang itu, dia masok di Kafarnahum.

2Dan ada satu hulubalang punya hamba, yang dia sayang, sudah sakit, hampir mati.

3Dan bila itu hulubalang dngar deri-hal Isa, dia suroh orang Yahudi punya ktua-ktua pergi k-pada dia, minta dia spaya dia boleh datang slamatkan dia punya hamba.

4Dan bila dia-orang sudah datang k-pada Isa, dia-orang terminta-minta sama dia, dan kata, "Dia ini ada layak yang tuan boleh buat bgini sama dia:

5kerna dia sayang kita punya bangsa, dan dia-lah yang sudah naikkan rumah-smbahyang kerna kita."

6Isa pergi sama-sama dia-orang. Dan bila Isa t'ada brapa jauh lagi deri rumah-nya, itu hulubalang suroh kawan-kawan-nya pergi k-pada dia, dan kata, "Ya Tuhan, jangan-lah buat susah: kerna t'ada-lah sahya layak yang Tuhan boleh masok di bawah pondok sahya:

7itu sbab sahya t'ada bilangkan diri sahya layak datang dkat Tuhan: ttapi chuma katakan satu patah saja, dan hamba sahya nanti di-smbohkan.

8Kerna sahya pun satu orang yang di bawah prentah orang, dan ada juga soldado di bawah sahya punya prentah: dan sahya kata sama ini satu, 'Pergi,' dan dia pergi; dan sama lain satu, 'Mari sini,' dan dia mari; dan sama sahya punya hamba, 'Buat ini,' dan dia buat."

9Bila Isa dngar ini smoa, dia hairan sama itu orang, dan balek blakang, dan kata sama orang-banyak yang ikut dia, "Sahya kata sama kamu smoa, blum pernah sahya jumpa bgini punya perchaya, antara orang Isra'el pun t'ada."

10Dan itu orang-orang yang sudah di-surohkan pulang rumah, dan jumpa itu hamba sudah baik.

11T'ada brapa lama kmdian, Isa berjalan pergi satu negri yang bernama Na'in: dan murid-murid-nya sama banyak orang skali ada ikut dia.

12Bila dia mau dkat sampai itu negri punya pintu, ada orang angkat kluar satu orang mati, ia'itu mak-nya punya anak tunggal, dan dia itu satu prempuan bujang: dan banyak orang negri itu ada sama-sama dia.

13Bila Tuhan tengok itu prempuan, dia ksian sama dia, dan kata sama dia, "Jangan-lah mnangis."

14Isa datang dkat dan pegang itu pti orang mati, dan orang-orang yang pikul brenti. Dan Isa kata, "Hei orang muda, sahya kata sama angkau, bangun."

15Dan itu orang mati bangun dudok, dan mula'i chakap. Kmdian Isa srahkan dia sama dia punya mak.

16Dan ktakotan datang atas dia-orang smoa; dan dia-orang muliakan Allah, serta kata, "Satu nabi yang bsar sudah terkluar antara kita," dan lagi, "Allah sudah mlawat bangsa-nya."

17Dan ini khabar deri-hal Isa jadi mashhur dalam sluroh tanah Yahudiah, dan sgala jajahan yang kliling situ.

18Dan Yahya punya murid-murid khabarkan ini smoa sama dia.

19Jadi dia panggil dua murid-nya, dan suroh dia-orang pergi kata sama Tuhan, "Tuan-kah dia itu yang patut datang, atau msti-kah kita nantikan lain orang pula?"

20Bila dia-orang sudah sampai dkat Isa, dia-orang kata, "Yahya Pmbaptis sudah suroh kita datang kata sama tuan, "Tuan-kah dia itu yang patut datang itu, atau msti-kah kita nantikan lain orang pula?"

21Itu waktu juga Isa smbohkan banyak orang yang kna pnyakit, dan sampar, dan jin yang jahat, dan sama banyak orang yang buta dia kasi nampak.

22Dan dia jawab kata sama dia-orang, "Pergi bilang sama Yahya sgala perkara yang kamu sudah tengok dan sudah dngar; ia'itu orang buta nampak s-mula, orang tempang berjalan, orang tai-ko di-suchikan, orang pkak dngar, orang mati di-hidopkan s-mula, dan k-pada orang miskin orang khabarkan injil.

23Dan berkat-lah barang-siapa yang t'ada terantok kerna sahya punya sbab."

24Bila Yahya punya psuroh sudah pergi, Isa mula'i kata sama orang-banyak itu deri-hal Yahya, "Kamu sudah pergi tanah-sunyi, apa mau tengok? S-batang bambu yang di-goyang oleh angin-kah?

25Ttapi apa-kah kamu sudah pergi mau tengok? orang yang pakai halus-halus-kah? Tengok, orang yang pakai chantek-chantek, dan yang hidop dngan kmewahan ada dalam raja-raja punya istana.

26Ttapi apa-kah kamu sudah pergi mau tengok? satu nabi-kah? Ya, sahya kata sama kamu, dan lbeh lagi deri-pada nabi.

27Ini-lah dia itu yang deri-hal-nya ada tersurat, Tengok, sahya ada hantarkan sahya punya psuroh dpan angkau punya muka, Dia nanti sdiakan angkau punya jalan lbeh dhulu angkau.'

28Sahya ini kata sama kamu, antara sgala orang yang sudah di-beranakkan oleh prempuan, t'ada satu orang yang lbeh bsar deri-pada Yahya: ttapi orang yang kchil skali dalam kraja'an Allah ada lbeh bsar deri-pada dia."

29Dan bila smoa orang bangsa itu dan orang yang pungut chukai pun sudah dngar, dia-orang bnarkan Allah, sdang dia-orang sudah di-baptiskan dngan Yahya punya baptis.

30Ttapi orang Farisi sama guru-guru taurit tolakkan kahandak Allah kerna dia-orang, sdang dia-orang t'ada trima Yahya punya baptis.

31"Sama apa-kah sahya boleh samakan ini jman punya orang, dan dia-orang sama sperti apa-kah?

32Dia-orang sama sperti budak-budak yang dudok di pasar, dan bertriak-triak satu sama lain, dan kata, 'Kita sudah tiop suling kerna kamu, dan kamu t'ada bertandak; kita sudah mratap, dan kamu t'ada mnangis.'

33Kerna Yahya Pmbaptis sudah datang, t'ada makan roti t'ada minum ayer-anggor, dan kamu kata, 'Dia ini terkna jin.'

34Anak-manusia pula sudah datang dngan makan-minum, dan kamu smoa kata, 'Tengok, orang glojoh, dan orang yang minum ayer-anggor, sohbat orang yang pungut chukai, dan sohbat orang berdosa.'

35Dan bijaksana di-trangkan jadi bnar oleh smoa anak-nya."

36Dan ada satu orang Farisi minta Isa makan sama-sama dia. Dan Isa masok itu orang Farisi punya rumah, dan dudok meja.

37Dan dalam itu negri ada satu prempuan yang berdosa; bila dia dapat tahu Isa ada dudok makan di rumah orang Farisi itu, dia bawa satu botol berisi minyak wangi,

38dan berdiri di blakang dkat kaki Isa dngan mnangis, kmdian dia mula'i basahkan kaki Isa dngan ayer-mata-nya, dan sapukan dngan rambot-nya, dan chium kaki-nya, dan minyakkan dngan itu minyak wangi.

39Bila itu orang Farisi yang sudah panggil sama Isa tengok ini, dia chakap dalam diri-nya, "Ini orang, jikalau dia btul satu nabi, tntu skali dia sudah dapat tahu siapa dan apa macham punya prempuan ini yang ada jamah sama dia, kerna ini prempuan orang berdosa."

40Dan Isa jawab kata sama dia, "Hei Simon, ada satu perkara yang sahya mau kata sama angkau." Dan Simon jawab, "Guru, kata-lah."

41Dan Isa kata, "Ada satu orang yang kasi pinjam wang, dan ada dua orang yang ada hutang sama dia: satu orang ada hutang lima-ribu dinar, dan yang lain satu lima-puloh.

42Bila dua-dua t'ada apa-apa boleh bayer, itu orang lpaskan dua-dua orang punya hutang. Sbab itu yang mana deri-pada ini dua orang nanti sayang dia itu lbeh?"

43Simon jawab kata, "Sahya fikir itu satu yang sudah terlpas lbeh banyak hutang-nya." Isa kata sama dia, "Btul angkau punya bichara."

44Bila Isa sudah balek sblah itu prempuan, dia kata sama Simon, "Ada-kah angkau tengok ini prempuan? Sahya sudah masok angkau punya rumah, dan t'ada pun angkau kasi sahya ayer chuchi kaki: ttapi ini prempuan sudah basahkan kaki sahya dngan ayer-mata-nya, dan sapukan dngan rambot-nya.

45Angkau t'ada chium sama sahya: ttapi ini prempuan, deri tempo sahya masok, t'ada berrnti-rnti chium kaki sahya.

46Angkau t'ada minyakkan kpala sahya sama minyak: ttapi ini prempuan sudah minyakkan kaki sahya sama minyak wangi.

47Deri sbab itu sahya kata sama angkau, dosa-dosa-nya yang banyak sudah di-ampunkan; kerna dia sayang banyak: ttapi orang yang di-ampunkan sikit, dia sayang chuma sikit saja."

48Dan Isa kata sama itu prempuan, "Angkau punya dosa-dosa sudah di-ampunkan."

49Dan orang-orang yang dudok makan sama dia mula'i kata dalam diri-nya, "Siapa-kah dia ini yang ampunkan orang punya dosa pula?"

50Dan Isa kata sama itu prempuan, "Angkau punya perchaya sudah slamatkan angkau: pergi-lah dngan slamat."


  Share Facebook  |  Share Twitter

 <<  Lukas 7 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel