Alkitab Mobile SABDA
[VER] : [BABA]     [PL]  [PB] 
 <<  Matius 14 >> 

1Itu ktika raja Herodis dngar khabar deri-hal Isa,

2dan dia kata sama hamba-nya, "Dia ini-lah Yahya Pmbaptis; dia sudah bangkit deri antara orang mati; dan sbab itu-lah smoa ini m'ujizat sudah bkerja dalam dia."

3Kerna Herodis sudah tangkap Yahya, dan ikatkan dia, dan sudah kasi dia masok jel deri sbab Herodiah, ia'itu bini Filipus sudara Herodis.

4Kerna Yahya sudah kata sama Herodis, "T'ada halal angkau buat bini sama dia."

5Herodis punya maksud mau bunoh sama dia, ttapi dia takot orang-banyak, sbab dia-orang bilangkan dia satu nabi.

6Ttapi bila Herodis punya hari jadi sudah sampai, Herodiah punya anak-prempuan bertandak di tngah-tngah, dan sukakan Herodis punya hati.

7Sbab itu dia bersumpah janji mau kasi sama itu anak prempuan baik apa pun dia minta.

8Dan anak-prempuan itu, bila mak-nya sudah usutkan dia, kata, "Kasi sahya di sini juga kpala Yahya Pmbaptis dalam satu dulang."

9Dan raja itu punya hati jadi susah, ttapi sbab dia punya sumpah, dan sbab orang-orang yang dudok makan sama-sama, dia suroh kasi.

10Dan dia suroh orang pergi kratkan Yahya Pmbaptis punya kpala di dalam jel.

11Dan orang bawa kpala-nya dalam satu dulang, dan orang kasi sama itu anak-prempuan: dan dia pula bawa sama dia punya mak.

12Dan Yahya punya murid-murid datang ambil dia punya mayat, dan tanamkan; habis itu dia-orang pergi bilangkan sama Isa.

13Bila Isa dngar, dia undur deri situ dalam prahu, dan pergi k-pada satu tmpat yang sunyi s'orang-s'orang: dan bila orang-banyak dngar, dia-orang kluar deri sgala negri, dan berjalan kaki ikut sama dia.

14Dan Isa kluar, dan tengok banyak orang skali, dan dia rasa ksian sama dia-orang, dan smbohkan mana yang sakit.

15Dan bila sudah ptang, murid-murid datang sama dia, dan kata, "Ini tmpat sunyi, dan sudah hampir malam; baik suroh orang-banyak ini pulang, spaya dia-orang boleh pergi masok di kampong-kampong bli makanan kerna diri-nya."

16Ttapi Isa kata sama dia-orang, "Ta'usah dia-orang pergi; baik kamu ini kasi dia-orang makan."

17Dan dia-orang kata sama dia, "Kita di sini t'ada apa-apa chuma lima biji punya roti, sama dua ekor punya ikan saja."

18Dan Isa kata, "Bawa sini kasi sahya."

19Dan dia suroh orang-banyak itu dudok di rumput; dan dia ambil itu lima biji roti sama dua ekor ikan, dan bila dia sudah tngadah k-langit, dia minta berkat, dan pchahkan, dan bhagikan itu roti sama murid-murid, dan murid-murid pula kasi sama itu orang-banyak.

20Dan smoa-nya makan sampai knnyang: dan orang pungut sisa-sisa ada dua-blas bakul pnoh.

21Itu orang yang makan ada lbeh kurang lima-ribu orang dlaki, lain deri-pada prempuan sama budak-budak.

22Dan itu juga dia paksa murid-murid-nya naik prahu, dan pergi sbrang dhulu, sampai dia sudah lpaskan orang-banyak.

23Dan bila dia sudah lpaskan orang-banyak, dia naik gunong sndiri saja mau minta do'a: dan bila sudah malam, dia ada di situ s'orang-s'orang.

24Ttapi itu prahu skarang ada di tngah-tngah tasek, dngan banyak susah skali sbab ombak; kerna angin ada pukol deri dpan.

25Dan bila sudah pukol tiga pagi bgitu, Isa datang sama dia-orang berjalan di atas tasek.

26Dan bila murid-murid tengok dia berjalan di atas tasek, dia-orang terpranjat, dan kata, "Hantu:" dan bertriak sbab ktakotan.

27Ttapi itu juga Isa chakap sama dia-orang, dan kata, "Ttapkan kamu punya hati: ini sahya; jangan takot."

28Dan Petrus jawab, kata sama dia, "Ya Tuhan, jikalau btul Tuhan, suroh-lah sahya datang sama Tuhan berjalan di atas ayer."

29Dan Isa kata, "Mari." Dan Petrus turun deri prahu, dan berjalan di atas ayer mau pergi sama Isa.

30Ttapi bila dia tengok itu angin dia naik takot; dan sbab dia mula'i tngglam, dia bertriak kata, "Tuhan tolong sahya."

31Dan itu juga Isa hulorkan tangan, pegang sama dia, dan kata, "Hei angkau yang kurang perchaya, knapa bimbang hati."

32Bila dia-orang dua-dua sudah naik prahu, angin pun tdoh.

33Dan smoa orang yang di dalam prahu berlutut sama Isa, dan kata, "Tuhan btul jadi Anak Allah."

34Dan bila sudah sbrang, dia-orang naik darat di Gnesarat.

35Itu negri punya orang knal sama dia, dan dia-orang suroh orang pergi smoa tanah yang kliling, dan bawa sama dia sgala orang yang sakit,

36dan dia-orang minta chuma mau jamah kaki baju-nya saja; dan tiap-tiap orang yang jamah mnjadi baik.


  Share Facebook  |  Share Twitter

 <<  Matius 14 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel