Alkitab Mobile SABDA
[VER] : [BABA]     [PL]  [PB] 
 <<  Matius 20 >> 

1Kerna kraja'an shorga ada sama sperti satu tuan-rumah, yang kluar pagi-pagi mau upah orang kerja dalam dia punya kbun anggor.

2Dan bila dia sudah janji sama itu orang-gaji mau kasi satu dinar satu hari punya gaji, dia suroh dia-orang pergi di kbun-nya.

3Dan bila itu tuan kluar pukol smbilan pula, dia tengok lain orang terdiri-diri di pasar dngan t'ada kerja;

4jadi sama dia-orang pun dia kata, 'Kamu pun boleh pergi masok kbun, dan apa patut sahya nanti kasi sama kamu.' Dan dia-orang pergi-lah.

5Dan itu tuan kluar lagi, ada dkat pukol dua-blas tngah hari, dan pukol tiga ptang, dan buat bgitu juga.

6Bila mau dkat pukol lima ptang pula, dia kluar lagi, dan jumpa lain orang terdiri-diri; dan dia kata sama dia-orang, 'Knapa kamu berdiri di sini s-panjang hari dngan t'ada kerja?'

7Dia-orang kata sama dia, 'Sbab satu orang pun t'ada upah sama kita' Itu tuan kata sama dia-orang, 'Kamu pun boleh pergi masok kbun.'

8Bila sudah ptang, itu kbun anggor punya tuan kata sama dia punya mandor, 'Panggil smoa orang yang sudah kerja itu, bayerkan upah-nya, mula'i sama orang yang blakang skali sampai orang yang mula-mula.'

9Dan bila orang yang sudah masok pukol lima ptang datang, dia-orang masing-masing trima satu dinar.

10Dan bila orang yang masok mula-mula datang, dia-orang sangka nanti dapat lbeh: ttapi dia-orang pun masing-masing trima satu dinar juga.

11Bila dia-orang sudah trima, dia-orang bersungut-sungut sama tuan-rumah itu, dan kata,

12'Ini orang yang datang blakang skali sudah kerja bharu satu jam saja, dan tuan sudah samakan dia dngan kita ini, yang sudah tanggong pnat s-panjang hari dngan panas-nya.'

13Ttapi itu tuan jawab, dan kata sama satu deri-pada dia-orang, 'Hei kawan, sahya t'ada buat salah sama angkau: bukan-kah angkau sudah janji sama sahya satu dinar?

14Ambil-lah apa yang angkau punya itu, dan pergi-lah; sahya suka kasi orang yang blakang skali sama sperti sahya kasi angkau.

15T'ada-kah patut sahya buat sahya punya suka sama herta sahya sndiri? atau mata angkau jahat-kah sbab sahya ini baik?'

16Jadi, bgitu-lah orang-orang yang blakang skali nanti jadi mula-mula, dan yang mula-mula nanti jadi blakang skali."

17Dan sambil Isa berjalan naik Yerusalim, dia bawa dua-blas murid-murid itu sndiri saja, dan sambil berjalan dia kata sama dia-orang,

18"Ingat, kita ini ada berjalan naik Yerusalim; dan Anak-manusia nanti di-srahkan k-pada kpala-kpala imam sama orang pnulis; dia-orang nanti ltakkan hukum mati atas dia,

19dan nanti srahkan dia sama orang bangsa-asing spaya boleh olok-olokkan, dan ssahkan, dan salibkan sama dia: dan hari yang ktiga dia nanti di-bangkitkan."

20Itu ktika anak-anak Zabdi punya mak datang sama Isa dngan anak-anak-nya, dan berlutut minta satu perkara sama dia.

21Isa kata sama dia, "Apa-kah angkau punya mau?" Itu prempuan kata sama Isa, "Bri-lah hukum spaya dua anak sahya ini boleh dudok satu orang sblah kanan dan satu orang sblah kiri dalam tuan punya kraja'an."

22Ttapi Isa jawab kata, "Kamu smoa ta'tahu apa kamu ada minta. Boleh-kah kamu minum deri chawan yang sahya ini nanti minum?" Dia-orang kata sama dia, "Boleh."

23Isa kata sama dia-orang, "Deri sahya punya chawan juga kamu nanti minum: ttapi fasal dudok sblah kanan dan sblah kiri sahya, itu bukan atas sahya yang kasi, chuma sama orang-orang yang kerna-nya Bapa sahya sudah sdiakan itu."

24Bila yang s-puloh itu dngar, dia-orang naik gram deri-hal itu dua adek-beradek.

25Ttapi Isa panggil dia-orang, dan kata, "Kamu smoa tahu yang orang-orang bangsa-asing punya pnghulu-pnghulu pegang prentah atas dia-orang, dan orang bsar-bsar-nya pegang kuasa atas-nya.

26Ttapi antara kamu jangan jadi bgitu: ttapi barang-siapa yang mau mnjadi bsar antara kamu msti mnjadi kamu punya playan;

27dan barang-siapa yang mau mnjadi kpala antara kamu msti mnjadi kamu punya hamba:

28sperti Anak-manusia pun sudah datang bukan-nya mau di-layankan oleh orang, ttapi spaya boleh layankan sama orang, dan kasi nyawa-nya mnjadi tbusan kerna orang-banyak."

29Bila dia-orang berjalan kluar deri Yeriko, banyak orang skali ikut sama dia.

30Dan ada dua orang buta dudok di tpi jalan. Bila dia-orang dngar yang Isa ada lalu, dia-orang bertriak kata, "Ya Tuhan, ya Anak Da'ud, ksiankan sama kita."

31Itu orang-banyak tgurkan dia, suroh diam: ttapi mingkin lbeh dia-orang bertriak, dan kata, "Ya Tuhan, ya Anak Da'ud, ksiankan sama kita."

32Isa brenti, serta panggil itu dua orang, dan tanya, "Apa-kah kamu mau sahya buat sama kamu?"

33Dia-orang kata sama dia, "Ya Tuhan, spaya kita punya mata boleh chlek."

34Isa ksiankan itu dua orang, dan jamah mata-nya: dan itu juga dia-orang boleh nampak, dan ikut sama Isa.


  Share Facebook  |  Share Twitter

 <<  Matius 20 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2018
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran