Alkitab Mobile SABDA
[VER] : [BABA]     [PL]  [PB] 
 <<  Matius 22 >> 

1Isa jawab, dan chakap lagi sama dia-orang dngan perumpama'an, dan kata,

2"Kraja'an shorga ada di-samakan dngan satu raja, yang buat perjamuan kahwin kerna dia punya anak dlaki,

3dan suroh hamba-hamba-nya pergi panggil smoa orang yang sudah di-jmpot datang pada perjamuan kahwin itu: ttapi itu orang smoa ta'mau datang.

4Lagi skali itu raja suroh lain hamba-hamba, dan kata, 'Bilang orang yang sudah di-jmpot, "Tengok, sahya sudah sdiakan sahya punya perjamuan: sahya punya lmbu-lmbu dan binatang gmok sudah di-smblehkan, dan smoa sudah siap: mari-lah pada itu perjamuan kahwin."'

5Ttapi t'ada dia-orang pdulikan, mlainkan dia-orang pergi satu di ladang-nya sndiri, satu buat perniaga'an-nya:

6dan yang lain tangkap itu raja punya hamba-hamba, dan aniayakan dan bunohkan dia-orang.

7Itu raja naik marah, dan suroh tntra-nya kluar, dan dia binasakan itu orang pmbunoh smoa, serta bakarkan dia-orang punya negri.

8Kmdian itu raja kata sama hamba-nya smoa, "Perjamuan kahwin sudah sdia, ttapi orang yang sudah di-jmpot itu t'ada layak.

9Sbab itu pergi di sempang-sempang jalan, dan s-brapa orang yang kamu jumpa, jmpot pada ini perjamuan kahwin.'

10Itu hamba smoa kluar pergi di jalan-jalan, dan kumpolkan s-brapa yang dia-orang dapat, deri-pada orang jahat dan orang baik pun: dan itu perjamuan pnoh dngan orang yang dudok makan.

11Ttapi bila itu raja masok mau tngok orang-orang yang dudok makan, dia jumpa satu orang di situ yang t'ada pakai pakaian perjamuan kahwin:

12dan dia kata sama itu orang, 'Hei kawan, bagimana angkau sudah masok di sini dngan t'ada pakai pakaian perjamuan kahwin?' Dia itu terdiam saja.

13Kmdian itu raja kata sama orang playan-nya, 'Ikat kaki tangan-nya, buangkan dalam glap yang di luar: di situ-lah nanti ada mratap sama gertak gigi.'

14Kerna banyak-lah orang yang di-panggil, ttapi sikit yang di-pileh."

15Habis itu, orang Farisi pergi berpakat bagimana mau jratkan Isa dalam berchakap.

16Dia-orang hantarkan dia-orang punya murid-murid pergi sama dia, sama-sama orang Herodis, dan dia-orang kata, "Guru, kita tahu yang guru satu orang bnar, dan mngajar jalan Allah dngan kbtulan, dan t'ada pdulikan siapa pun: kerna guru t'ada tengok-tengok muka orang.

17Sbab itu katakan-lah sama kita, apa guru punya fikir? Ada-kah halal bayer chukai sama Kaisar, atau tidak?"

18Ttapi Isa tahu dia-orang punya jahat, dan dia kata, "Hei orang pura-pura, knapa kamu choba sama sahya?

19Tunjokkan sahya itu wang chukai." Dan dia-orang bawa sama dia satu dinar.

20Isa kata sama dia-orang, "Ini gambar sama ini chap siapa punya?"

21Dia-orang kata sama dia, "Kaisar punya." Kmdian Isa kata sama dia-orang, "Sbab itu apa yang Kaisar punya, bayer-lah sama Kaisar; dan apa yang Allah punya, sama Allah."

22Bila dia-orang dngar, dia-orang naik hairan, dan tinggalkan Isa serta undor pergi

23Dan itu hari juga ada datang sama dia orang-orang Saduki, yang kata tidak ada kbangkitan orang mati: dan dia-orang tanya sama dia,

24dan kata, "Guru, Musa kata, 'Jikalau satu orang mati dngan t'ada dapat anak, adek-nya patut kahwin bini-nya, spaya boleh dapat kturunan kerna sudara-nya.'

25Antara kita ada tujoh adek-beradek: dan yang sulong sudah kahwin, dan mati, dan sbab dia tidak ada anak, sudah tinggalkan dia punya bini sama adek-nya;

26bgitu juga hal adek yang nombor dua, dan adek yang nombor tiga, sampaikan yang nombor tujoh punya.

27Kmdian deri-pada itu smoa, itu prempuan pula mati.

28Sbab itu dalam kbangkitan orang mati, itu prempuan jadi siapa punya bini antara itu tujoh orang, kerna smoa-nya sudah kahwin sama dia."

29Ttapi Isa jawab kata sama dia-orang, "Kamu ini ssat, sbab ta'tahu kitab-kitab atau kuasa Allah.

30Kerna dalam kbangkitan orang mati, orang t'ada kahwin atau di-kahwinkan, ttapi dia-orang sperti mla'ikat dalam shorga.

31Ttapi deri-hal kbangkitan orang mati, blum-kah kamu bacha apa yang sudah di-katakan sama kamu oleh Allah, ia'itu,

32'Sahya-lah Allah Ibrahim, dan Allah Isahak, dan Allah Yakob?' Allah bukan-nya orang mati punya Allah, ttapi orang hidop punya."

33Bila orang-banyak dngar, dia-orang jadi hairan sbab pngajaran-nya.

34Ttapi orang Farisi, bila dia-orang dngar yang Isa sudah kasi diam sama orang Saduki, berhimpon sama-sama.

35Dan satu deri-pada-nya, ia'itu guru taurit, tanya satu perkara, mau choba sama dia, dan kata,

36"Hei guru, hukum mana yang bsar dalam taurit?"

37Dan Isa kata sama dia, "'Kaseh-lah sama Tuhan-mu Allah dngan s-bulat-bulat hati-mu, dan dngan s-gnap jiwa-mu, dan dngan sgala ingatan-mu.'

38Ini-lah hukum yang bsar dan yang nombor satu.

39Dan yang nombor dua punya sama juga, ia'itu, 'Kaseh-lah sama orang sblah-mnyblah sperti diri-mu sndiri.'

40Atas ini dua hukum bergantong s-gnap taurit dan nabi-nabi pun."

41Waktu orang Farisi ada lagi berhimpon sama-sama, Isa tanya dia-orang, dan kata,

42"Apa kamu fikir deri-hal Almaseh? Dia anak siapa?" Dia orang kata sama dia, "Anak Da'ud."

43Isa kata sama dia-orang, "Kalau bgitu, bagimana pula Da'ud dalam Roh triak dia Tuan, kata-nya,

44'Tuhan sudah kata sama sahya punya Tuan, "Dudok-lah angkau di sblah kanan sahya Sampai sahya taroh angkau punya musoh-musoh di bawah angkau punya kaki."'

45Sbab itu jikalau Da'ud triak dia 'Tuan,' bagimana pula dia boleh jadi dia punya anak?"

46Satu orang pun t'ada boleh jawab sama Isa satu patah pun, dan deri itu hari satu orang pun t'ada brani tanya dia apa-apa lagi.


  Share Facebook  |  Share Twitter

 <<  Matius 22 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2018
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran