Dual Panel1Dan bila Isa sudah kluar deri ka'abah, dan ada berjalan, murid-murid-nya datang sama dia mau tunjokkan smoa bangunan ka'abah.
2Ttapi Isa jawab kata sama dia-orang, "Ada-kah kamu tengok ini smoa? dngan sunggoh sahya kata sama kamu, di sini t'ada nanti tertinggal satu batu bersusun atas lain, yang t'ada nanti di-rubohkan."
3Waktu Isa ada dudok di atas Bukit Zaitun, murid-murid datang sama dia sndiri saja, dan kata, "Bilang sama kita, bila-kah ini smoa nanti jadi? dan apa-kah tanda Tuhan punya kdatangan, dan ksudahan jman ini?"
4Isa jawab kata sama dia-orang, "Jaga baik-baik jangan orang kasi kamu ssat.
5Kerna banyak orang nanti datang dalam nama sahya, dan kata, 'Sahya-lah Almaseh,' dan dia-orang nanti ssatkan banyak orang.
6Kamu nanti dngar deri-hal prang dan khabar prang: ingat, jangan terpranjat: kerna ini smoa msti jadi; ttapi ksudahan itu blum lagi.
7Kerna bangsa nanti bangun mlawan bangsa, dan kraja'an mlawan kraja'an: dan dalam brapa tmpat-tmpat nanti ada klaparan sama gmpa bumi.
8Ttapi smoa ini permula'an sakit-beranak.
9Itu ktika orang nanti srahkan kamu spaya kna sngsara, dan nanti bunoh kamu: dan kerna nama sahya punya sbab kamu nanti kna bnchi oleh sgala bangsa.
10Itu ktika juga nanti banyak orang terantok, dan nanti srahkan satu sama lain, dan bnchikan satu sama lain.
11Dan banyak nabi-nabi yang palsu pun nanti terkluar, dan nanti ssatkan banyak orang.
12Dan sbab kjahatan bertambah-tambah, kbanyakan orang punya kaseh nanti jadi sjok.
13Ttapi orang yang tahan sampai ksudahan itu, dia-lah nanti di-slamatkan.
14Dan ini injil, ia'itu injil kraja'an, nanti di-khabarkan dalam sluroh dunia mnjadi saksi k-pada sgala bangsa; bharu-lah nanti datang itu ksudahan.
15"Sbab itu, bila kamu tengok itu kbnchian yang bawa binasa berdiri di tmpat suchi, sperti perkata'an nabi Dani'el (biar-lah orang yang bacha ingat baik-baik),
16itu waktu orang yang ada di tanah Yahudiah baik dia-orang lari pergi naik gunong-gunong:
17orang yang ada di atas rumah punya gnting-rata, jangan dia turun ambil kluar barang-barang yang ada di dalam rumah-nya:
18dan orang yang ada di ladang, jangan dia pulang ambil baju-nya.
19Ttapi susah-lah sama prempuan yang mngandong dan yang kasi anak tetek itu tempo.
20Dan baik kamu minta do'a spaya jangan kamu punya lari tempo musim sjok atau hari perhentian:
21kerna itu ktika nanti jadi ksusahan yang bsar, yang blum pernah jadi deri-pada asal dunia ini sampai skarang, dan skali-kali t'ada nanti jadi lagi.
22Dan jikalau itu hari t'ada di-kurangkan, t'ada satu orang pun boleh slamat: ttapi sbab orang-orang pilehan, itu hari nanti di-kurangkan.
23Itu waktu jikalau orang kata sama kamu, 'Tengok, sini-lah Almaseh',atau, 'Di situ-lah;' jangan-lah perchaya.
24Kerna nanti terkluar palsu punya Almaseh dan palsu punya nabi-nabi, dan dia-orang nanti kasi tanda-tanda yang bsar dan perkara yang hairan; sampai ssatkan, kalau boleh, orang pilehan skali pun.
25Ingat, sahya sudah bilangkan kamu lbeh dhulu.
26Sbab itu, jikalau orang kata sama kamu, 'Lihat, dia ada di tanah sunyi;'jangan kamu kluar: atau, 'Tengok dia ada dalam bilek;' jangan perchaya.
27Kerna sperti kilat terkluar deri timor, dan boleh nampak sampai di barat, bgitu-lah juga kdatangan Anak-manusia.
28Di mana ada bangkai, di situ-lah burong lang berkumpol.
29"Ttapi kmdian deri itu tempo punya ksusahan, itu juga matahari nanti mnjadi glap, dan bulan ta'nanti kasi trang-nya, dan bintang-bintang pun nanti gugor deri langit, dan sgala kuasa langit nanti di-gonchangkan:
30dan bharu-lah nanti ternampak tanda Anak-manusia di langit: dan itu ktika sgala bangsa di atas bumi nanti mratap, dan dia-orang nanti tengok Anak-manusia datang di atas awan-awan langit, dngan kuasa dan kmulia'an yang bsar.
31Dan dia nanti hantarkan mla'ikat-mla'ikat-nya dngan satu trompet yang bsar bunyi, dan itu mla'ikat nanti himponkan dia punya orang pilehan deri ampat pnjuru mata-angin, deri hujong langit sampai hujong langit.
32"Deri pokok ara blajar-lah dia punya perumpama'an: waktu ranting-nya lagi lmbot, dan ada kluarkan daun, kamu tahu musim panas sudah dkat:
33bgitu juga kamu pun, bila kamu tengok ini smoa, baik kamu tahu yang dia itu ada dkat, sampai di muka pintu.
34Dngan sunggoh sahya kata sama kamu, ini jman punya orang t'ada nanti lnnyap s-blum ini smoa jadi.
35Langit sama bumi nanti lnyap, ttapi sahya punya perkata'an t'ada skali-kali nanti lnyap.
36Ttapi deri-hal itu hari dan itu jam t'ada satu orang pun tahu, mski-pun mla'ikat di shorga, atau Anak itu pun, chuma Bapa saja.
37Dan sperti jman Noh itu, bgitu juga nanti jadi kdatangan Anak-manusia.
38Kerna sperti bila jman yang dhulu deri-pada ayer bah, orang makan-minum, kahwin dan di-kahwinkan, sampai hari bila Noh masok dalam bahtra,
39dan dia-orang ta'sdar sampai ayer bah datang dan bawa pergi dia-orang smoa; bgitu juga nanti jadi kdatangan Anak-manusia.
40Itu ktika nanti ada dua orang dlaki di ladang; satu nanti kna ambil, dan satu tertinggal:
41dua prempuan nanti kerja sama kisaran; satu nanti kna ambil, dan satu tertinggal.
42Sbab itu jaga-lah: kerna kamu ta'tahu hari yang mana kamu punya Tuhan nanti datang.
43Ttapi baik kamu tahu ini, jikalau itu tuan-rumah sudah tahu jam yang mana pnchuri nanti datang, dia tntu sudah jaga dan t'ada kasi rumah-nya kna tmbus.
44Sbab itu baik kamu pun bersdia: kerna dalam satu jam yang kamu t'ada sangka Anak-manusia datang.
45Jadi siapa-kah itu hamba yang stiawan dan bijaksana, yang tuan-nya sudah kasi prentah atas orang isi-rumah-nya, mau kasi dia-orang makanan ktika yang patut?
46Berkat-lah itu hamba yang tuan-nya jumpa buat bgitu bila dia datang.
47Dngan sunggoh sahya kata sama kamu, dia nanti kasi dia prentah atas smoa apa-apa yang dia ada.
48Ttapi jikalau hamba yang jahat kata dalam hati-nya, 'Sahya punya tuan lambat datang,'
49dan mula'i pukol dia punya kawan-kawan, dan makan-minum sama orang mabok;
50itu hamba punya tuan nanti datang satu hari bila dia ta'sangka, dan dalam satu jam yang dia ta'tahu, dan ssahkan dia,
51serta tntukan bhagian-nya sama-sama orang pura-pura: di situ-lah nanti ada mratap sama gertak gigi.