Dual Panel1"Dan itu ktika kraja'an shorga nanti di-samakan dngan s-puloh anak-dara, yang ambil dia punya lampu dan kluar mau hantarkan pngantin.
2Antara itu s-puloh, lima ada bodoh, dan lima cherdek.
3Kerna yang bodoh itu sudah bawa lampu, ttapi t'ada bawa minyak sama-sama:
4ttapi yang cherdek itu sudah bawa minyak dalam tmpat-nya sama-sama lampu-nya.
5Dan tlanju pngantin lambat datang, dia-orang smoa mngantok dan tertidor skali.
6Ttapi tngah malam ada satu triak: 'Tengok, pngantin datang! Mari kluar hantarkan dia.'
7Itu ktika smoa anak-dara itu bangun, dan btulkan lampu-nya.
8Dan yang bodoh punya anak-dara kata sama yang cherdek, 'Kasi kita kamu punya minyak sikit; kerna lampu kita mau padam.'
9Ttapi yang cherdek jawab kata, 'Barangkali t'ada chukop kerna kita dan kamu smoa: lagi baik kamu sndiri pergi bli sama orang yang jual.'
10Dan waktu itu anak-dara yang bodoh pergi bli, pngantin pun datang; dan anak-dara yang sudah sdia ikut dia masok perjamuan kahwin: dan orang tutopkan pintu.
11Kmdian anak-dara yang lain pula datang, dan kata, 'Tuan, tuan, bukakan kita pintu.'
12Ttapi dia jawab kata, 'Dngan sunggoh sahya kata sama kamu, sahya ta'knal kamu.'
13Sbab itu baik kamu jaga, kerna kamu ta'tahu hari-nya atau jam-nya.
14"Kerna itu pun sperti orang yang mau pergi lain negri. Dia panggil dia punya hamba-hamba, dan srahkan herta-nya sama dia-orang.
15Satu orang dia kasi lima talanta, lagi satu orang dua, dan lagi satu orang pula satu; masing-masing sperti dia punya kuasa; dan kmdian dia pergi.
16Itu orang yang sudah trima lima talanta itu juga pergi mniaga dngan itu wang, dan untong lagi lima talanta.
17Bgitu juga orang yang sudah trima dua talanta, dia pun untong lagi dua talanta.
18Ttapi orang yang trima satu talanta pergi korek lobang dalam tanah, dan smbunyikan tuan-nya punya wang.
19Dan brapa lama kmdian, itu hamba-hamba punya tuan pulang, dan hitong kira-kira sama dia-orang.
20Dan orang yang sudah trima lima talanta datang, bawa lagi lima talanta, dan kata, 'Tuan, lima talanta tuan sudah srahkan sama sahya: tengok sahya sudah untong lagi lima talanta.'
21Dia punya tuan kata sama dia, 'Itu baik, hei hamba yang baik dan stiawan: angkau sudah jadi stiawan atas sikit perkara, sahya nanti tntukan angkau prentahkan banyak perkara, masok-lah dalam angkau punya tuan punya ksuka'an.'
22Dan itu orang yang sudah trima dua talanta pula datang, kata, 'Tuan, dua talanta tuan sudah srahkan sama sahya: tengok, sahya sudah untong lagi dua talanta.'
23Dia punya tuan kata sama dia, 'Itu baik, hei hamba yang baik dan stiawan: angkau sudah jadi stiawan atas sikit perkara, sahya nanti tntukan angkau prentahkan banyak perkara: masok-lah dalam angkau punya tuan punya ksuka'an.'
24Dan itu orang yang sudah trima satu talanta pun datang, dan dia kata, 'Tuan, sahya sudah knal sama tuan, yang tuan satu orang kras, yang mnuai di tmpat tuan t'ada mnabur, dan kumpol di tmpat tuan t'ada tebar:
25jadi sahya sudah naik takot, dan pergi smbunyikan tuan punya talanta dalam tanah: tengok ini-tah tuan sndiri punya.'
26Ttapi dia punya tuan jawab, kata sama dia, 'Hei hamba yang jahat dan malas, sudah pun angkau tahu sahya mnuai di mana sahya t'ada mnabur, dan kumpol di mana sahya t'ada tebar;
27sbab itu angkau patut srahkan sahya punya wang sama bank punya orang, spaya bila sahya pulang sahya boleh trima wang sahya balek dngan bunga-nya.
28Sbab itu kamu sklian ambil itu satu talanta deri-pada ini orang, dan kasikan sama orang yang ada s-puloh talanta.
29Kerna barang-siapa yang ada, pada dia nanti di-brikan, dan dia nanti dapat mewah: ttapi barang-siapa yang t'ada apa-apa, apa yang ada sama dia, itu pun nanti di-ambil deri-pada dia,
30Dan buangkan itu hamba yang ta'berguna dalam glap yang di luar: di situ-lah nanti ada mratap sama gertak gigi.'
31"Ttapi bila Anak-manusia datang dngan kmulia'an-nya, dan sgala mla'ikat-nya pun sama-sama dia, itu ktika dia nanti dudok di atas takhta kmulia'an-nya:
32dan dpan dia nanti di-himponkan sgala bangsa: dan dia nanti asingkan s'orang deri-pada s'orang, sperti satu gombala asingkan domba-domba deri-pada kambing:
33dan itu domba dia nanti dirikan sblah kanan-nya, ttapi itu kambing sblah kiri-nya.
34Kmdian Raja nanti kata sama orang yang sblah kanan-nya, 'Mari-lah kamu yang di-berkatkan oleh Bapa sahya, trima-lah psaka, ia'itu kraja'an yang sudah di-sdiakan kerna kamu deri-pada asal dunia:
35sbab bila sahya lapar, kamu sudah kasi sahya makan: sahya haus, dan kamu kasi sahya minum: sahya orang dagang, dan kamu kasi sahya tumpang;
36sahya tlanjang, dan kamu kasi sahya pakaian: sahya sakit, dan kamu mlawat sahya: sahya dalam jel, dan kamu datang sama sahya.'
37Habis itu, orang yang bnar itu nanti jawab sama Raja, dan kata, 'Ya Tuhan, bila-kah kita tengok Tuhan lapar, dan kasi Tuhan makan? atau haus, dan kasi Tuhan minum?
38Dan bila-kah kita sudah tengok Tuhan orang dagang, dan kasi Tuhan tumpang? atau tlanjang, dan kasi Tuhan pakaian?
39Dan bila-kah kita sudah tengok Tuhan sakit, atau dalam jel, dan sudah pergi sama Tuhan?'
40Itu Raja nanti jawab kata sama dia-orang, 'Dngan sunggoh sahya kata sama kamu, dalam hal kamu sudah buat bgitu k-pada satu deri-pada sahya punya sudara-sudara ini yang kchil skali, kamu sudah buat k-pada sahya.'
41Kmdian dia nanti kata pula sama orang yang di sblah kiri-nya 'Hei kamu yang kna kutok undor deri-pada sahya masok api yang kkal, yang sudah sdia kerna iblis sama sgala mla'ikat-nya:
42sbab bila sahya lapar, kamu t'ada kasi sahya makan: sahya haus, dan t'ada kamu kasi sahya minum:
43sahya orang dagang, dan t'ada kamu kasi sahya tumpang; sahya tlanjang, dan t'ada kamu kasi sahya pakaian; sahya sakit dan dalam jel, dan t'ada kamu mlawat sahya.'
44Kmdian dia-orang pula nanti jawab, dan kata, 'Tuhan, bila-kah kita sudah tengok Tuhan s'orang lapar, atau haus, atau dagang, atau tlanjang, atau sakit, atau dalam jel, dan kita t'ada layankan Tuhan?'
45Kmdian itu Raja nanti jawab kata sama dia-orang, 'Dngan sunggoh sahya kata sama kamu, dalam hal kamu t'ada buat bgitu k-pada satu deri-pada orang yang kchil ini, kamu t'ada buat k-pada sahya.'
46Dan ini smoa nanti pergi masok hukuman yang kkal: ttapi orang-orang yang bnar masok hidop yang kkal."