Alkitab Mobile SABDA
[VER] : [BABA]     [PL]  [PB] 
 <<  Matius 28 >> 

1Kmdian deri-pada hari perhentian, dan ktika mau trang tanah, hari yang pertama dalam itu minggo, Mariam orang Magdala sama Mariam yang lain datang tengok itu kubor.

2Dan ada jadi satu gmpa bumi yang bsar; kerna satu mla'ikat Tuhan turun deri shorga, datang golekkan itu batu kluar, dan dudok atas-nya.

3Rupa-nya sperti kilat, dan pakaian-nya puteh sperti salju:

4dan sbab takot sama dia itu orang jaga mngglitar, dan jadi sperti mati.

5Dan itu mla'ikat jawab kata sama itu prempuan-prempuan, "Kamu jangan takot: kerna sahya tahu kamu ada chari Isa, yang sudah di-salibkan.

6Dia t'ada di sini; kerna dia sudah bangkit, sperti dia kata. Mari tengok itu tmpat di mana Tuhan sudah terbaring.

7Dan lkas pergi bilang sama dia punya murid-murid, 'Dia sudah bangkit deri antara orang mati; dan ingat, dia ada berjalan lbeh dhulu kamu pergi Galil; di sana kamu nanti tengok sama dia:' ingat, sahya sudah katakan kamu."

8Dan itu prempuan lkas undor deri itu kubor, dngan ktakotan dan sangat suka-hati, dan dia-orang lari mau khabarkan itu hal sama murid-murid Isa.

9Dan itu juga Isa jumpa dia-orang, dan kata, "Slamat-lah." Dan dia-orang datang dkat pegang kaki-nya, dan berlutut dpan dia.

10Kmdian Isa kata sama dia-orang, "Jangan takot: pergi khabarkan sama sahya punya sudara-sudara, suroh dia-orang pergi Galil, dan di sana dia-orang nanti tengok sahya."

11Waktu itu dua prempuan pergi, sparoh itu orang-jaga masok negri kasi tahu sama kpala-kpala imam smoa perkara yang sudah jadi.

12Dan bila dia-orang sudah berhimpon sama-sama ktua-ktua, dan sudah bichara, dia-orang kasi banyak wang sama itu soldado-soldado,

13dan kata, "Kamu msti kata, 'Ktika kita tidor, murid-murid-nya sudah datang tempo malam churi sama dia.'

14Dan kalau ini hal kdngaran sama gobernor, kita ini nanti pujok dia, dan kamu ta'usah kna khuatir."

15Dan dia-orang ambil itu wang, dan buat sperti dia-orang sudah di-ajarkan: dan ini macham punya chakap jadi mashhur antara orang Yahudi sampai skarang.

16Ttapi itu s-blas murid-murid pergi Galil, dkat itu gunong yang Isa sudah tntukan sama dia-orang.

17Dan bila dia-orang tengok sama dia, dia-orang berlutut: ttapi ada juga yang bimbang hati.

18Dan Isa datang berchakap sama dia-orang, dan kata, "Sgala kuasa, baik di shorga baik di atas bumi, sudah di-bri k-pada sahya.

19Sbab itu pergi-lah kamu, bawa sgala bangsa mnjadi murid-murid, dan baptiskan dia-orang dalam nama Bapa dan Anak dan Roh Alkudus:

20dan ajarkan dia-orang turut smoa perkara yang sahya sudah psan sama kamu; dan ingat, sahya ada sama-sama kamu s-hari-hari, sampai ksudahan jman."


  Share Facebook  |  Share Twitter

 <<  Matius 28 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel