Alkitab Mobile SABDA
[VER] : [BABA]     [PL]  [PB] 
 <<  Matius 3 >> 

1Itu ktika Yahya Pmbaptis pun datang, mngajar orang di tanah sunyi Yahudiah,

2dan kata, "Bertobat-lah kamu; kerna kraja'an shorga sudah dkat."

3Kerna deri-hal dia ini-lah nabi Yash'aya sudah katakan, "Suara satu orang yang bertriak di tanah sunyi, 'Sdiakan jalan Tuhan, Btulkan lorong-lorong-nya.'"

4Yahya punya pakaian deri-pada bulu onta, dan ikat pinggang-nya kulit, dan makanan-nya bilalang sama gula-lbah hutan.

5Itu waktu orang deri Yerusalim, dan satu tanah Yahudiah, dan deri smoa tmpat kliling sungai Yordan pergi sama dia:

6dan Yahya baptiskan dia-orang dalam sungai Yordan, dan masing-masing mngaku dosa-nya.

7Ttapi bila dia tengok banyak orang Farisi sama orang Saduki datang minta baptis, dia kata sama dia-orang, "Hei kturunan ular, siapa sudah ajarkan kamu lari deri-pada marah yang nanti datang?

8Sbab itu kluarkan-lah buah yang padan dngan tobat:

9dan jangan ingat mau kata dalam hati sndiri, 'Kita ada Ibrahim jadi kita punya bapa:' kerna sahya kata sama kamu, yang deri-pada ini batu-batu pun Allah ada kuasa adakan anak-chuchu kerna Ibrahim.

10Dan skarang pun sudah ada kapak terltak dkat pokok-pokok punya akar: sbab itu tiap-tiap pokok yang t'ada kluarkan buah yang baik itu pokok kna tbang dan kna buang dalam api.

11Sahya ini baptiskan kamu dngan ayer kerna tobat: ttapi dia yang datang kmdian deri-pada sahya ada lbeh kuasa deri-pada sahya, dan dia punya kasut pun sahya t'ada layak angkat, dia-lah nanti baptiskan kamu dngan Roh Alkudus dan api.

12Dia punya nyiru ada di tangan-nya, dan dia nanti tampikan dia punya trigu baik-baik: dan trigu-nya dia nanti kumpolkan masok dalam gudang, ttapi skam-nya dia nanti bakarkan dngan api yang ta'boleh padam."

13Dan itu waktu Isa pun datang deri Galil pergi sungai Yordan k-pada Yahya, mau trima baptis deri-pada dia. Ttapi Yahya mau larangkan dia, dan kata, "Patut-nya sahya ini trima baptis deri-pada Tuhan, bagimana pula Tuhan datang sama sahya?"

14(3-13)

15Ttapi Isa jawab dan kata sama dia, "Biarkan skarang, kerna bgini-lah patut kita gnapkan smoa kbnaran." Kmdian bharu Yahya biarkan dia.

16Dan Isa, bila sudah baptis, itu juga naik deri ayer; dan langit terbuka k-pada dia, dan dia tengok Roh Allah turun s-rupa burong komba, dan datang atas dia;

17dan ada satu suara deri langit yang kata, "Ini-lah Anak sahya yang sahya kaseh, dia-lah yang berknan sama sahya."


  Share Facebook  |  Share Twitter

 <<  Matius 3 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran