Dual Panel1"Jangan-lah salahkan orang, spaya jangan kamu pun orang salahkan.
2Kerna sperti kamu salahkan orang, bgitu juga orang nanti salahkan kamu: dan sperti kamu sukat kasi orang, bgitu juga orang nanti sukat kasi kamu.
3Dan knapa angkau tengok abok kayu yang ada dalam angkau punya sudara punya mata, ttapi s-batang kayu yang dalam mata sndiri angkau t'ada ingat?
4Atau bagimana-kah angkau boleh kata sama angkau punya sudara, 'Mari sahya kluarkan itu abok deri dalam mata angkau;' dan ada s-batang kayu itu dalam angkau sndiri punya mata?
5Hei orang pura-pura, mula-mula kluarkan itu kayu deri dalam mata angkau; kmdian bharu-lah angkau boleh tengok trang-trang mau kluarkan itu abok deri dalam angkau punya sudara punya mata.
6"Jangan-lah kasi barang yang suchi sama anjing, dan jangan champakkan kamu punya mutiara di dpan babi; spaya jangan babi pinjakkan dngan kaki-nya, dan balek koyakkan kamu pula.
7"Minta-lah, dan nanti di-bri sama kamu; chari-lah dan kamu nanti dapat; ktok-lah, dan pintu nanti di-buka pada kamu:
8kerna tiap-tiap orang yang minta dia itu trima; dan orang yang chari dia itu dapat; dan sama orang yang ktok, pintu nanti di-buka.
9Orang yang mana-kah antara kamu, kalau anak-nya minta roti nanti kasi batu;
10atau kalau minta ikan, nanti kasi ular?
11Jikalau kamu yang ada jahat tahu kasi pmbrian yang baik sama kamu punya anak, brapa lbeh lagi Bapa kamu yang di shorga nanti kasi barang yang baik sama orang yang minta sama dia?
12Sbab itu smoa apa-apa yang kamu suka orang buat sama kamu, bgitu juga biar kamu buat sama orang: kerna ini-lah hukum-taurit dan kitab nabi-nabi.
13"Masok-lah deri pintu yang smpit: kerna lebar-lah pintu dan bsar-lah jalan yang bawa k-pada binasa, dan banyak-lah orang yang masok deri situ.
14Kerna smpit-lah pintu dan ssak-lah jalan yang bawa k-pada hidop, dan sikit-lah orang yang dapat itu.
15"Jaga-lah deri-pada nabi-nabi yang dusta, yang datang k-pada kamu dngan rupa kambing, ttapi di dalam hati-nya dia-orang jadi anjing hutan yang garang.
16Deri dia-orang punya buah-buahan kamu nanti knal sama dia-orang. Ada-kah pernah orang ptek buah anggor deri pokok duri? atau buah ara deri-pada pokok onak?
17Bgitu juga tiap-tiap pokok yang baik kluarkan buah yang baik, ttapi pokok yang ta'baik kluarkan buah yang jahat.
18Pokok yang baik ta'boleh kluarkan buah jahat, dan pokok yang ta'baik ta'boleh kluarkan buah baik.
19Tiap-tiap pokok yang t'ada kluarkan buah baik kna tbang dan buangkan dalam api.
20Sbab itu deri-pada dia-orang punya buah-buahan kamu nanti knal sama dia-orang.
21Bukan-nya s-lagi orang yang kata sama sahya, 'Ya Tuhan, ya Tuhan,' nanti masok kraja'an shorga: chuma dia itu yang buat kahandak Bapa sahya yang di shorga.
22Itu hari banyak orang nanti kata sama sahya, 'Ya Tuhan, ya Tuhan, bukan-kah kita sudah ajar orang dngan nama Tuhan, dan lagi pun dngan nama Tuhan bukan-kah kita sudah buangkan jin, dan dngan nama Tuhan sudah buat brapa banyak punya m'ujizat?'
23Dan itu ktika sahya nanti mngaku sama dia-orang, 'Sahya blum pernah knal sama kamu: pergi-lah jauh deri sahya, kamu yang buat kerja jahat.'
24Sbab itu tiap-tiap orang yang dngar smoa sahya punya perkata'an ini, dan turut dia, nanti di-samakan dngan orang yang bijaksana, yang sudah naikkan rumah-nya di atas batu-karang:
25dan hujan turun, ayer bah pun datang, dan angin pun knchang tmpoh itu rumah; ttapi t'ada ruboh, kerna alas-nya batu-karang.
26Dan barang-siapa yang dngar smoa sahya punya perkata'an ini dan t'ada turut, nanti di-samakan dngan orang yang bodoh, yang sudah naikkan rumah-nya di atas pasir:
27dan hujan turun, ayer bah pun datang, dan angin pun knchang tmpoh itu rumah; dan ruboh-lah itu rumah; dan bsar-lah krubohan-nya."
28Bila Isa sudah habis kata ini smoa, orang-orang banyak jadi hairan sama dia punya pngajaran:
29kerna dia ajar dia-orang sperti orang yang ada kuasa, bukan sperti orang pnulis.