Alkitab Mobile SABDA
[VER] : [BABA]     [PL]  [PB] 
 <<  Markus 1 >> 

1Ini-lah permula'an injil Isa Almaseh Anak Allah.

2Sperti sudah tersurat dalam kitab nabi Yash'aya, "Tengok, sahya ada hantarkan pnyuroh sahya pergi lbeh dhulu angkau, Dia-lah nanti sdiakan jalan angkau;

3Suara satu orang yang bertriak di tanah sunyi, 'Sdiakan jalan Tuhan, Btulkan lorong-lorong-nya;'"

4Yahya datang, yang baptiskan orang di dalam tanah sunyi, dan khabarkan baptisan tobat kerna k'ampunan dosa.

5Dan smoa orang tanah Yahudiah sama smoa orang negri Yerusalim kluar pergi sama Yahya; dan dia-orang trima baptis deri-pada dia dalam sungai Yordan, serta masing-masing mngaku dosa-nya.

6Dan Yahya punya pakaian deri-pada bulu onta, dan ikat pinggang-nya kulit, dan dia makan bilalang sama gula-lbah hutan.

7Dan dia mngajar, kata, "Ada orang datang kmdian deri-pada sahya yang lbeh kuasa deri-pada sahya, dan t'ada-lah sahya layak tundok bukakan tali kasut-nya.

8Sahya sudah baptiskan kamu dngan ayer; ttapi dia pula nanti baptiskan kamu dngan Roh Alkudus."

9Dan itu ktika Isa pun datang deri Nasarat tanah Galil, dan dia trima baptis deri-pada Yahya dalam sungai Yordan.

10Sambil dia naik deri dalam ayer, itu juga dia tengok langit terbuka, dan Roh Allah turun atas-nya s-rupa burong komba:

11dan ada satu suara deri langit, "Angkau-lah Anak sahya yang sahya kaseh, dan angkau-lah berknan sama sahya."

12Dan itu juga Roh tolakkan dia pergi tanah sunyi.

13Dan ampat-puloh hari dia di tanah sunyi itu, kna choba oleh Setan; dan dia ada sama-sama binatang buas; dan ada mla'ikat-mla'ikat mlayan sama dia.

14Bila Yahya sudah di-srahkan, Isa masok tanah Galil, khabarkan injil Allah,

15dan kata, "Sudah sampai waktu-nya, dan kraja'an Allah sudah dkat: bertobat-lah kamu, dan perchaya injil."

16Ktika Isa berjalan di tpi tasek Galil, dia tengok Simon sama Andrias sudara Simon s-tngah mnjala di tasek: kerna dua-dua itu, orang tangkap ikan.

17Dan Isa kata sama dia-orang, "Mari-lah ikut sama sahya, dan sahya nanti jadikan kamu orang tangkap manusia."

18Dan itu juga dia-orang tinggalkan jala-jaring-nya, dan ikut sama dia.

19Dan bila Isa jalan lagi sikit jauh, dia tengok Yakob anak Zabdi sama sudara-nya Yahya, dan dia-orang dua-dua pun ada dalam prahu s-tngah btulkan jala-jaring-nya.

20Dan itu juga dia panggil dia-orang: dan dua-dua tinggalkan bapa-nya Zabdi dalam prahu dngan orang-orang gaji, dan pergi ikut sama Isa.

21Dan dia-orang masok negri Kafarnahum; dan itu hari perhentian juga Isa masok rumah-smbahyang mngajar.

22Dan orang-orang naik hairan sama dia punya ajaran: kerna dia mngajar sperti orang yang ada kuasa, bukan-nya sperti orang pnulis.

23Dan itu juga di dalam dia-orang punya rumah-smbahyang ada satu orang yang terkna jin yang najis; dan dia bertriak-triak,

24kata, "Hei Isa orang Nasarat, kita sama angkau apa ada terkna? sudah-kah angkau datang mau binasakan kita? Sahya pun tahu angkau siapa, ia'itu Yang Kudus datang deri-pada Allah."

25Dan Isa tngkingkan dia, kata, "Diam, dan kluar deri-pada itu orang."

26Dan itu jin yang najis tarek-tarek sama itu orang, dan bertriak dngan suara bsar, bharu dia kluar.

27Dan sklian orang terchngang-chngang, sampai satu tanya sama lain, "Apa pula ini? pngajaran yang bharu! dngan kuasa dia kasi hukum sama jin yang najis pun, dan dia-orang turut prentah-nya."

28Dan itu juga pchah-lah khabar deri-hal Isa dalam smoa tmpat sluroh jajahan Galil.

29Dan itu juga, bila dia-orang sudah kluar deri rumah-smbahyang, dia-orang masok rumah Simon dan Andrias, sama-sama Yakob dan Yahya.

30Simon punya mertua prempuan ada terbaring sakit dmam; dan itu juga dia-orang bilangkan Isa deri-hal dia:

31dan dia datang pegang tangan-nya dan kasi dia bangun; dan itu dmam pun hilang, dan itu prempuan mlayankan dia-orang.

32Dan bila sudah ptang, ktika matahari turun, orang bawa sama dia sgala orang yang sakit, sama orang yang terkna jin.

33Dan satu negri punya orang sudah berhimpon di muka pintu.

34Dan Isa sumbohkan banyak orang yang sakit macham-macham punya pnyakit, dan dia buangkan banyak jin; dan lagi pun dia ta'mau kasi itu jin smoa berchakap, kerna dia-orang knal sama dia.

35Dan pagi-pagi, waktu jauh malam lagi, Isa bangun kluar, dan pergi satu tmpat sunyi, dan di situ dia minta do'a.

36Dan Simon, dngan smoa orang yang ada sama-sama dia, ikut dia;

37dan dia-orang dapat sama dia, dan kata, "Smoa orang ada chari Tuhan."

38Dan dia kata sama dia-orang, "Mari kita pergi lain tmpat pula, di negri-negri yang dkat ini, spaya di situ pun sahya boleh mngajar; kerna itu-lah sbab-nya sahya sudah kluar."

39Dan dia pergi mngajar dalam dia-orang punya rumah-smbahyang sluroh tanah Galil, dan buangkan jin.

40Dan ada satu orang tai-ko datang sama dia, terminta-minta sama dia, dan berlutut, kata sama dia, "Jikalau Tuhan mau, Tuhan boleh kasi sahya berseh."

41Dan Isa rasa ksian, dan hulorkan tangan jamah dia, dan kata sama dia, "Sahya mau; jadi-lah angkau berseh."

42Dan itu juga hilang itu orang punya tai-ko, dan dia mnjadi berseh.

43Dan Isa psan dia baik-baik, dan itu juga suroh dia pergi,

44dan kata sama dia, "Ingat, jangan angkau kata apa-apa sama satu orang pun: ttapi pergi tunjokkan angkau punya diri sama imam, dan bawa persmbahan kerna angkau punya ksuchian, apa-apa yang Musa sudah psan, jadi satu ksaksian k-pada dia-orang."

45Ttapi itu orang kluar, dan mula'i khabarkan dan mashhurkan itu perkara, sampai Isa ta'boleh masok lagi dalam negri nyata-nyata, ttapi dia ada di luar di tmpat yang sunyi-sunyi: dan orang datang sama dia deri sana-sini.


  Share Facebook  |  Share Twitter

 <<  Markus 1 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2018
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran