Alkitab Mobile SABDA
[VER] : [BABA]     [PL]  [PB] 
 <<  Markus 6 >> 

1Isa kluar deri situ, dan masok negri-nya sndiri, dan murid-murid-nya pun ikut dia.

2Dan bila sampai hari perhentian, dia mula'i mngajar di dalam rumah smbahyang: dan banyak orang hairan dngarkan dia, dan kata, "Deri mana dia ini sudah dapat smoa ini? dan apa macham punya bijaksana ini yang sudah di-brikan sama dia, dan ini m'ujizat yang di-jadikan oleh tangan-nya?

3Bukan-kah dia ini itu tukang kayu, anak Mariam, dan sudara Yakob, Yusis, Yahuda dan Simon? dan bukan-kah dia punya sudara-sudara prempuan ada di sini sama kita?" Dan dia-orang khuatir fasal dia.

4Ttapi Isa kata sama dia-orang, "Satu nabi t'ada kurang hormat, chuma dalam negri-nya sndiri, dan di antara daging-darah-nya dan orang rumah tangga-nya sndiri."

5Dan Isa ta'boleh buat satu m'ujizat pun di situ, chuma ada sikit orang sakit yang dia tarohkan tangan-nya dan smbohkan.

6Dan dia mnjadi hairan sbab dia-orang punya-kurang perchaya. Dan dia berjalan kliling kampong-kampong mngajar orang.

7Dan dia panggil itu dua-blas murid, dan mula'i hantarkan dia-orang pergi dua sama dua; dan dia kasi dia-orang kuasa atas sgala jin yang najis;

8dan dia psan dia-orang jangan bawa satu apa pun kerna perjalanan-nya, chuma tongkat saja; roti pun jangan, pundi pun jangan, wang dalam ikat pinggang pun jangan;

9chuma pakai kasut saja, dan jangan pakai dua lai baju.

10Dan dia kata sama dia-orang, "Di mana-mana kamu masok rumah orang, tinggal-lah kamu di situ sampai kamu kluar deri itu tmpat.

11Dan tmpat yang ta'mau sambot sama kamu, dan orang ta'mau dngar kamu, bila kamu kluar deri situ, kbaskan habok yang ada di tapak kaki kamu mnjadi ksaksian k-pada dia-orang."

12Dan dia-orang kluar mngajar yang orang patut bertobat.

13Dan dia-orang buangkan banyak jin, dan banyak orang sakit dia-orang minyakkan dngan minyak, dan smbohkan.

14Dan raja Herodis pun dngar, kerna nama Isa sudah mashhur: dan dia kata, "Yahya Pmbaptis sudah bangkit deri antara orang mati, dan sbab itu-lah dia ada buat smoa ini m'ujizat."

15Ttapi ada orang lain pula kata, "Dia ini Ilia." Dan orang lain pula kata, "Dia ini satu nabi, sama sperti satu deri-pada sgala nabi."

16Ttapi bila Herodis dngar ini smoa, dia kata, "Itu Yahya yang sahya sudah kratkan kpala, dia sudah bangkit."

17Kerna Herodis sndiri sudah suroh orang tangkap sama Yahya, dan sudah ikat dia dalam jel, kerna sbab Herodiah sudara-nya Filipus punya bini: sbab Herodis sudah kahwin sama dia.

18Kerna Yahya sudah kata sama Herodis, "T'ada halal angkau buat bini sama angkau punya sudara punya bini."

19Dan Herodiah taroh dndam sama Yahya, dan mau bunoh dia; ttapi ta'boleh;

20kerna Herodis ada takot sama Yahya, sbab dia tahu dia satu orang yang bnar dan suchi, jadi dia jagakan dia. Dan bila-bila dia dngar sama Yahya, hati-nya jadi serba-salah; dalam pada itu dia suka juga dngar sama dia.

21Ada satu hari yang baik, ktika Herodis buat satu perjamuan hari jadi-nya kerna smoa orang bsar-bsar-nya, dan panglima-panglima-nya, dan kpala-kpala negri Galil;

22dan bila Herodiah punya anak prempuan sndiri masok bertandak, dia sukakan Herodis sama orang-orang yang dudok makan dngan dia; dan raja kata sama itu anak prempuan, "Apa-apa nyonya suka, minta-lah sama sahya, dan tntu sahya nanti kasi."

23Lagi pun dia bersumpah sama itu budak, "Baik apa pun nyonya minta, sahya nanti kasi, sampai sparoh kraja'an sahya skali pun."

24Dan itu budak kluar, kata sama mak-nya, "Apa baik sahya minta?" Dan mak-nya kata, "Kpala Yahya Pmbaptis."

25Dan itu juga dngan sgra dia masok mnghadap raja minta, dan kata, "Sahya minta yang ini jam juga raja boleh kasi sahya kpala Yahya Pmbaptis dalam satu pinggan."

26Dan itu raja punya hati jadi susah skali, ttapi sbab dia punya sumpah, dan sbab orang-orang yang dudok meja, dia t'ada sudi mau tolakkan itu budak.

27Ttapi itu juga raja suroh satu soldado pergi bawa kpala-nya: dan itu orang pergi kratkan kpala-nya di dalam jel,

28dan bawa itu kpala dalam satu pinggan, dan kasi sama itu budak prempuan; dan dia pula kasi sama dia punya mak.

29Dan bila Yahya punya murid-murid dngar, dia-orang datang ambil dia punya mayat, dan tarohkan dalam kubor.

30Dan rasul-rasul itu berhimpon datang sama Isa: dan dia-orang bilangkan dia smoa perkara, apa-apa yang dia-orang sudah buat dan sudah ajar.

31Dan Isa kata sama dia-orang, "Mari-lah kamu ini sndiri saja di tmpat yang sunyi, dan brenti s-kjap." Kerna banyak orang yang pergi datang, sampai mau makan pun t'ada smpat.

32Jadi dia-orang pergi-lah dalam itu prahu di tmpat yang sunyi sndiri saja.

33Ttapi orang nampak dia-orang pergi, dan banyak juga yang knal sama dia-orang, dan lari berhimpon di sana deri dalam sgala negri dngan jalan kaki, dan sampai lbeh dhulu dia-orang.

34Bila Isa turun, dia tengok banyak skali orang, dan dia rasa ksian sama dia-orang, kerna dia-orang sperti kambing-kambing yang t'ada gombala-nya: dan dia mula'i mngajar dia-orang banyak perkara.

35Dan bila sudah ptang, murid-murid-nya datang sama dia, dan kata, "Ini tmpat sunyi, dan skarang sudah ptang:

36baik suroh ini orang smoa pulang, spaya dia-orang boleh pergi di dusun-dusun dan kampong-kampong yang kliling, bli makanan kerna diri-nya."

37Ttapi Isa jawab kata sama dia-orang, "Baik kamu ini kasi dia-orang makan." Dan dia-orang kata sama dia, "Baik-kah kita pergi bli dua-ratus dinar punya roti, dan kasi dia-orang makan?"

38Isa kata sama dia-orang, "Brapa biji roti kamu ada? pergi tengok." Dan bila dia-orang sudah dapat tahu, dia-orang kata, "Lima biji, sama dua ekor ikan."

39Dan dia suroh murid-murid-nya kasi smoa orang dudok s-tompok s-tompok di atas rumput yang hijau itu.

40Dan smoa-nya dudok berbaris-baris, ada yang s-ratus, ada yang lima-puloh.

41Dan dia ambil itu lima biji roti sama dua ekor ikan, dan bila dia sudah tngadah k-langit, dia minta berkat, dan pchahkan itu roti; dan bhagikan sama murid-murid, spaya boleh ltakkan dpan dia-orang; dan itu dua ekor ikan pun dia bhagikan sama dia-orang smoa.

42Dan smoa-nya makan sampai knnyang.

43Dan orang pungut sisa-sisa dua-blas bakul pnoh, dan deri-pada ikan-ikan itu pun.

44Itu orang yang makan ada lima-ribu orang dlaki.

45Dan itu juga dia paksa murid-murid-nya naik prahu, dan pergi sbrang Ibeh dhulu dia di negri Bait-Saida, ktika dia sndiri ada kasi orang-banyak itu pulang.

46Bila dia sudah minta lpas, dia naik gunong mau minta do'a.

47Dan bila sudah malam, itu prahu sampai di tngah-tngah tasek, dan dia sndiri ada di darat s'orang-s'orang.

48Dan bila dia tengok dia-orang terlalu susah berdayong, sbab angin pukol deri dpan, ada pukol tiga pagi bgitu dia datang sama dia-orang berjalan di atas tasek; dan dia mau lalu Ipas dia-orang:

49ttapi bila dia-orang tengok dia berjalan di atas tasek, dia-orang sangkakan dia satu hantu, dan dia-orang bertriak:

50kerna smoa-nya tengok dia, dan terpranjat. Ttapi itu juga Isa berchakap sama dia-orang, dan kata, Ttapkan kamu punya hati: ini sahya; jangan takot."

51Dan Isa naik prahu k-pada dia-orang; dan angin pun tdoh: dan dia-orang terchngang skali dalam diri-nya;

52sbab blum lagi dia-orang mngerti deri-hal roti itu, ttapi hati-nya ada kras juga.

53Bila sudah sbrang, dia-orang naik darat di Gnesarat, dan tambat prahu-nya.

54Dan bila dia-orang turun deri prahu, itu juga orang knal sama Isa,

55dan berlari-lari kliling tanah itu, dan mula'i bawa s-lagi orang sakit di atas tmpat-tidor-nya di mana-mana dia-orang dngar dia ada.

56Dan baik di mana Isa masok, baik di kampong-kampong, atau di negri-negri, atau di dusun pun, dia-orang ltakkan orang sakit di pasar-pasar, dan minta dia jamah chuma kaki baju-nya saja: dan s-brapa banyak orang yang jamah dia, smoa-nya jadi baik.


  Share Facebook  |  Share Twitter

 <<  Markus 6 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2017
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran