Dual Panel1Dan Isa kata sama dia-orang, "Dngan sunggoh sahya kata sama kamu, antara orang yang berdiri di sini, ada juga yang skali-kali t'ada nanti mrasa mati s-blum dia-orang tengok kraja'an Allah datang dngan kuasa."
2Lpas anam hari Isa ambil Petrus, Yakob sama Yahya, dan bawa chuma dia-orang sndiri saja naik satu gunong yang tinggi, dan dia punya rupa berubah di dpan dia-orang:
3dan pakaian-nya mnjadi berkilat-kilat dan puteh skali, sampaikan t'ada satu tukang pun di dunia boleh putehkan bgitu.
4Dan Musa sama Ilia ternampak sama dia-orang: dan itu dua orang berchakap sama Isa.
5Dan Petrus jawab kata sama Isa, "Ya Rabbi, baik juga kita ada di sini: baik kita bikin tiga pondok; satu sbab Rabbi, satu sbab Musa, dan satu sbab Ilia."
6Kerna Petrus ta'tahu apa mau jawab; sbab dia-orang banyak takot.
7Dan ada satu awan tutopkan dia-orang: dan ada satu suara deri dalam awan, "Ini-lah Anak sahya, yang sahya kaseh: dngar-lah sama dia."
8Dan tiba-tiba bila dia-orang tengok kliling, satu orang pun t'ada dia-orang nampak, chuma Isa saja sama-sama dia-orang.
9Dan sambil dia-orang turun deri atas gunong, Isa psan sama dia-orang jangan katakan lain orang apa-apa dia-orang sudah tengok, chuma bila Anak-manusia sudah bangkit deri antara orang mati.
10Dia-orang simpan itu chakap dalam hati sndiri, dan tanya-mnanya apa-kah arti-nya bangkit deri antara orang mati itu.
11Dan dia-orang tanya sama dia, dan kata, "Orang pnulis kata Ilia msti datang dhulu."
12Isa kata sama dia-orang, "Btul Ilia nanti datang dhulu, dan pulangkan s-mula sgala perkara: dan bagimana pula sudah tersurat deri-hal Anak-manusia, yang dia msti tanggong banyak sngsara, dan kna orang hinakan?
13Ttapi sahya kata sama kamu, Ilia sudah pun datang, dan orang sudah pun buat sama dia apa-apa dia-orang suka, sama sperti ada tersurat deri-hal dia."
14Bila dia-orang sampai dkat murid-murid, dia-orang tengok terlalu banyak orang kliling murid-murid, dan orang pnulis ada berbantah sama dia-orang.
15Dan itu juga smoa orang-banyak itu sangat-lah terchngang-chngang, bila dia-orang tengok Isa, dan lari kasi tabek sama dia.
16Dan dia tanya sama dia-orang, "Apa itu kamu ada berbantah sama dia-orang?"
17Ada satu orang deri antara orang-banyak itu jawab sama dia,"Guru, sahya sudah bawa sama guru anak jantan sahya yang terkna jin bisu;
18dan mana-mana itu jin kna sama dia, dia champakkan ini budak di tanah: dan mulut-nya berbusa-busa, dan dia gertak gigi, dan mnjadi kurus: dan sahya sudah chakap sama guru punya murid-murid spaya dia-orang boleh buangkan ini jin; ttapi dia-orang ta'boleh."
19Dan dia jawab sama dia-orang, kata, "Hei orang jman yang kurang perchaya! brapa lama lagi sahya bersama-sama kamu? brapa lama lagi sahya boleh sabarkan kamu? bawa dia sama sahya."
20Dan dia-orang bawa dia sama Isa: dan bila itu budak tengok Isa, itu juga itu jin tarek-tarek sama dia banyak skali: dan dia jatoh di tanah, serta bantingkan diri-nya dngan mulut berbusa-busa.
21Dan Isa tanya bapa-nya, "Sudah brapa lama ini sudah jadi sama dia?" Dia kata, "Deri kchil.
22Dan krap kali itu jin champakkan dia dalam api dan dalam ayer pun, mau binasakan dia: ttapi jikalau guru boleh buat apa-apa, ksiankan-lah sama kita, dan tolong-lah kita."
23Dan Isa pula kata sama dia, "Angkau kata 'Kalau boleh?' Sgala perkara boleh jadi k-pada orang yang perchaya."
24Dan itu juga itu budak punya bapa bertriak kata "Sahya perchaya juga; tolong-lah sahya punya kurang perchaya."
25Bila Isa tengok ada orang-banyak datang berlari-lari, dia tngkingkan itu jin yang najis, dan kata sama dia, "Hei jin yang bisu dan pkak, sahya ini suroh angkau kluar deri-pada ini budak, dan jangan angkau masok dalam-nya lagi."
26Itu jin bertriak-triak, dan banyak tarek-tarek sama itu budak, bharu dia kluar: dan itu budak mnjadi sperti orang mati bgitu; sampaikan kbanyakan orang kata, "Sudah mati."
27Ttapi Isa pegang tangan-nya, dan bangunkan dia; kmdian dia berdiri.
28Dan bila Isa sudah masok rumah, murid-murid-nya tanya sama dia sndiri saja, "Knapa kita ta'boleh buangkan itu jin?"
29Dan dia kata sama dia-orang, "Ini macham ta'boleh kluar dngan apa-apa pun, chuma dngan minta do'a."
30Dan dia-orang kluar deri situ, dan lalu tanah Galil, dan Isa ta'mau satu orang pun tahu.
31Kerna dia ajar murid-murid-nya, dan kata sama dia-orang, "Anak-manusia di-srahkan k-pada tangan orang, dan orang nanti bunoh dia; dan bila dia sudah kna bunoh tiga hari kmdian dia nanti hidop s-mula."
32Ttapi dia-orang ta'mngerti itu chakap, dan takot mau tanya sama dia.
33Dan dia-orang sampai di Kafarnahum: dan bila dia ada dalam rumah, dia tanya dia-orang, "Apa itu kamu sudah berrondeng di tngah jalan?
34Ttapi dia-orang diam skali: kerna di tngah jalan dia-orang sudah berbantah satu sama lain fasal siapa-kah yang lbeh bsar.
35Isa dudok, dan panggil itu dua-blas orang; dan kata sama dia-orang, "Jikalau barang-siapa mau jadi yang mula-mula, dia msti jadi yang blakang skali, dan jadi playan k-pada smoa."
36Dan dia ambil satu anak kchil, dan dirikan dia di tngah-tngah dia-orang: dan dia dokong itu budak, dan kata sama dia-orang,
37"Barang-siapa yang sambot satu anak kchil sperti dia ini kerna sahya punya nama, dia sambot sahya: dan barang-siapa yang sambot sahya, dia bukan sambot sama sahya, ttapi sama dia yang sudah hantarkan sahya."
38Yahya kata sama dia, "Guru, kita sudah tengok satu orang buangkan jin dngan guru punya nama, dan kita larangkan dia, sbab dia bukan ikut sama kita."
39Ttapi Isa kata, "Jangan larangkan dia: kerna t'ada orang yang buat m'ujizat dalam nama sahya boleh lkas jahatkan sahya.
40Kerna orang yang t'ada lawan kita, dia sblah kita.
41Kerna barang-siapa yang nanti kasi kamu minum satu changkir ayer saja, sbab kamu jadi Almaseh punya, dngan sunggoh sahya kata sama kamu, t'ada-lah skali-kali dia nanti hilang dia punya pahala.
42Dan barang-siapa yang kasi terantok satu pun deri antara ini orang yang kchil yang perchaya sama sahya, lagi baik kerna itu orang jikalau satu batu kisaran di-gantongkan kliling lehir-nya, dan dia di-tngglamkan di tngah-tngah laut.
43Dan jikalau angkau punya tangan kasi angkau buat salah, kratkan, dan buangkan deri-pada angkau: kerna lbeh baik angkau masok hidop dngan kodong, deri-pada dngan dua-dua tangan masok jhannam, ia'itu dalam api yang t'ada boleh di-padamkan.
44[KOSONG]
45Dan jikalau angkau punya kaki kasi angkau buat salah, kratkan: kerna lbeh baik angkau masok hidop dngan tempang, deri-pada kna buang dalam jhannam dngan dua-dua kaki.
46[KOSONG]
47Dan jikalau angkau punya mata kasi angkau buat salah, kluarkan: lbeh baik angkau masok kraja'an Allah dngan sblah mata, deri-pada kna buang dalam jhannam dngan dua-dua mata;
48di tmpat ulat-nya t'ada mati, dan api t'ada padam.
49Kerna tiap-tiap orang nanti di-asinkan dngan api.
50Garam ada baik: ttapi jikalau garam sudah hilang asin-nya, dngan apa-kah boleh kasi dia asin? Baik kamu ada garam dalam diri, dan berdamai satu sama lain."