Alkitab Mobile SABDA
[VER] : [BABA]     [PL]  [PB] 
 <<  Roma 2 >> 

1Sbab itu angkau t'ada daleh lagi, hei orang, baik siapa pun yang salahkan orang: kerna dalam perkara yang angkau salahkan lain orang, angkau ada hukumkan diri sndiri; sbab angkau yang salahkan orang ada buat ini smoa juga.

2Dan kita tahu yang Allah punya hukuman datang dngan btul atas orang yang buat itu macham perkara.

3Hei orang yang salahkan orang yang buat ini smoa, sdang angkau pun buat bgitu juga, ada-kah angkau sangka angkau sndiri nanti terlpas deri-pada hukuman Allah?

4Atau ada-kah angkau hinakan kmurahan-nya yang sangat kaya itu dan sabar-nya dan panjang hati-nya, sbab angkau t'ada tahu yang kmurahan Allah bawa angkau k-pada tobat?

5ttapi sperti angkau punya kkrasan dan hati yang ta'mau bertobat itu angkau ada simpankan marah kerna diri sndiri sampai hari marah, ia'itu hari bila Allah punya hukum yang adil itu nanti di-nyatakan;

6dan dia-lah nanti balaskan k-pada tiap-tiap orang sperti masing-masing punya perbuatan:

7k-pada orang yang chari kmulia'an, dan hormat, dan hal yang ta'boleh binasa, dalam buat baik dngan sabar, dia nanti balaskan hidop yang kkal:

8ttapi k-pada orang yang kras kpala, dan yang t'ada turut kbtulan, ttapi turut kjahatan, nanti datang marah dan mradang,

9dan ksusahan dan sngsara di atas tiap-tiap jiwa orang yang jalankan kjahatan, mula-mula k-pada orang Yahudi, dan k-pada orang Grik pun;

10ttapi kmulia'an dan hormat dan sjahtra di atas sgala orang yang jalankan kbaikan, mula-mula k-pada orang Yahudi, dan k-pada orang Grik pun:

11kerna Allah t'ada tengok orang punya muka.

12Kerna s-brapa orang sudah buat dosa dngan t'ada hukum-taurit, dia nanti binasa dngan t'ada hukum-taurit: dan s-brapa orang sudah buat dosa sdang dia ada di bawah hukum-taurit, dia pula nanti di-hukumkan deri-pada hukum-taurit;

13kerna bukan-nya orang yang dngar saja sama hukum-taurit ada bnar di dpan Allah, ttapi orang yang buat sperti hukum-taurit, dia-orang-lah nanti di bnarkan:

14kerna bila orang bangsa-asing yang tidak ada hukum-taurit buat sperti hukum-taurit itu sbab memang tabi'at-nya bgini, orang-orang itu mnjadi satu hukum k-pada diri-nya sndiri, sunggoh pun dia-orang tidak ada hukum-taurit itu:

15dalam hal dia-orang ada nyatakan pkerja'an hukum-taurit tertulis di dalam hati-nya, dan angan-angan hati-nya pun bersaksi bgitu, dan fikiran-nya pun antara satu sama lain salahkan atau bnarkan:

16itu hari yang Allah nanti bicharakan sgala ruhsia orang oleh Isa Almaseh, ikut sperti injil yang sahya khabarkan.

17Ttapi jikalau angkau di-sbot orang Yahudi, dan bergantong k-pada hukum-taurit, dan mgahkan diri sbab angkau smbah Allah,

18dan tahu kahandak-nya, dan berknan sama perkara yang baik skali sbab blajar deri dalam hukum-taurit,

19dan perchaya yang angkau ini satu pmimpin k-pada orang buta, satu chahya k-pada orang yang dalam glap,

20satu pngajar k-pada orang yang bodoh, satu guru k-pada budak-budak kchil, kerna deri dalam hukum-taurit angkau dapat chontoh pngtahuan dan kbtulan;

21kalau bgitu angkau ini yang ajarkan lain orang, t'ada-kah angkau ajarkan sndiri juga? angkau ini yang ajar jangan orang churi, ada-kah angkau pula churi?

22angkau ini yang bilang jangan orang buat zina, ada-kah angkau pula buat zina? angkau ini yang bnchi sama datok, ada-kah angkau pula mrampas rumah datok?

23angkau ini yang mgahkan diri kerna taurit itu, ada-kah angkau pula kurang hormat sama Allah dalam hal angkau mlanggar taurit?

24Kerna nama Allah orang ada hujatkan antara bangsa-asing deri sbab kamu smoa, sperti ada tersurat.

25Sunat itu ada juga untong-nya jikalau angkau turut hukum-taurit: ttapi jikalau angkau mlanggar hukum-taurit, angkau punya sunat sudah jadi ta'sunat.

26Sbab itu, jikalau orang yang t'ada bersunat simpan sgala prentah taurit, bukan-kah dia punya hal ta'sunat itu di-hitongkan sperti sunat?

27dan lagi, orang yang sudah di-beranakkan dalam hal ta'sunat, jikalau dia chukop turut hukum-taurit, bukan-kah dia nanti salahkan angkau ini yang mlanggar hukum-taurit sunggoh pun angkau ada kitab dan ada bersunat?

28Kerna dia yang jadi orang Yahudi di luar saja, bukan-nya dia Yahudi btul; dan sunat yang di luar dalam badan saja, itu bukan sunat btul;

29ttapi dia yang jadi Yahudi dalam hati, dia-lah Yahudi btul; dan sunat yang btul itu dalam hati, bukan mnurut perkata'an hukum, ttapi rohani; dan ini macham punya orang dapat puji bukan deri-pada manusia, ttapi deri-pada Allah.


  Share Facebook  |  Share Twitter

 <<  Roma 2 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran