Dual Panel1Deri-pada Paulus, hamba Allah, dan rasul Isa Almaseh, kerna Allah punya orang pilehan punya iman, dan kerna pngtahuan deri-hal kbtulan yang turut kbaktian,
2dngan harap mau dapat hidop yang kkal, yang Allah yang ta'boleh bohong sudah janji dhulu deri-pada asal jman;
3ttapi bila waktu-nya, dia sudah nyatakan dia punya perkata'an dalam khabar yang sudah di-srahkan k-pada sahya, turut sperti Juru-slamat kita Allah punya hukum;
4datang k-pada Titus, yang s-btul-nya anak sahya dalam iman yang satu itu: biar-lah datang k-pada angkau anugrah dan sjahtra deri-pada Allah Bapa, dan deri-pada Juru-slamat kita Isa Almaseh.
5Ini-lah sbab-nya sahya sudah tinggalkan angkau di Kriti, ia'itu spaya angkau boleh btulkan apa-apa yang terkurang, dan spaya angkau boleh tntukan ktua-ktua dalam tiap-tiap negri, sperti sahya sudah psan k-pada angkau;
6jikalau ada orang yang t'ada chla, dia punya bini satu saja, ada anak-anak yang perchaya, dan yang t'ada kna d'awa fasal perchabolan, dan bukan orang derhaka.
7Kerna satu bishop msti t'ada berchla, kerna dia Allah punya juru-kunchi; bukan kras kpala, bukan lkas marah, bukan orang yang gadoh-gadoh, atau berklahi, dan bukan chari untong jahat;
8ttapi suka sambot orang dagang, chinta apa yang baik, mnahan diri, orang bnar, suchi, prentahkan diri;
9dan pegang sama perkata'an yang kperchaya'an turut sperti kita punya pngajaran, spaya dia boleh dapat nasihatkan orang dalam pngajaran yang baik itu, dan tunjokkan salah orang yang mlawan.
10Kerna ada banyak orang yang derhaka, yang chakap sia-sia, dan mnipu orang, terlbeh skali orang yang pegang adat sunat,
11dan mulut-nya msti kna tutop; orang-orang yang terbalekkan orang punya s-gnap isi rumah, sambil mngajar perkara-perkara yang t'ada patut, sbab mau chari untong jahat.
12Ada satu dia punya orang, ia'itu dia-orang sndiri punya nabi, yang sudah kata, "Orang Kriti slalu pmbohong, binatang jahat, prot malas."
13Ini ksaksian ada btul. Sbab itu kalotkan-lah dia-orang dngan kras, spaya dia-orang boleh mnjadi baik dalam iman,
14dan jangan dia-orang ingat sama orang Yahudi punya chrita yang bukan-bukan, dan sama hukum-hukum orang yang paling deri-pada kbtulan itu.
15K-pada orang yang suchi, smoa perkara jadi suchi: ttapi k-pada orang yang kotor dan t'ada perchaya, satu pun t'ada suchi; ttapi dia-orang punya ingatan dan dia-orang punya angan-angan hati sdia sudah kotor.
16Dia-orang mngaku dia-orang knal sama Allah; ttapi dngan dia-orang punya perbuatan dia-orang sangkalkan dia; dia-orang kbnchian, dan derhaka, dan dalam smoa pkerja'an yang baik dia-orang ta'guna.