Dual Panel1Dan satu orang deri antara itu tujoh mla'ikat yang ada itu tujoh mangkok datang berchakap sama sahya, dan kata, "Mari sini, dan sahya nanti tunjokkan angkau hukuman yang sudah jatoh atas itu sundal yang bsar, yang dudok di atas banyak ayer;
2dan dngan dia-lah sklian raja-raja bumi sudah buat perchabolan, dan smoa orang yang tinggal di bumi pun sudah mabok dngan ayer-anggor persundalan-nya.
3Dan dia bawa sahya dalam Roh pergi satu tanah sunyi: dan sahya tengok satu prempuan dudok di atas satu binatang merah, yang pnoh dngan nama hujat, dan ada tujoh kpala dan s-puloh tandok.
4Dan itu prempuan pakai pakaian ungu dan merah, dan berrias dngan mas dan permata dan mutiara, dan tangan-nya pegang satu chawan mas yang pnoh dngan datok-datok kbnchian, dan sgala persundalan-nya punya kotor-kotor,
5dan di dahi-nya ada tersurat satu nama, ia'itu, RUHSIA BABIL YANG BSAR, IBU SGALA SUNDAL DAN SGALA DATOK KBNCHIAN DI BUMI.
6Dan sahya tengok itu prempuan ada mabok dngan darah orang kudus, dan dngan darah sgala saksi Isa. Dan bila sahya tengok sama dia, sahya hairan dngan hairan yang bsar.
7Dan itu mla'ikat kata sama sahya, "Knapa angkau hairan? Sahya nanti bilang sama angkau ruhsia itu prempuan, dan ruhsia itu binatang yang dia tunggang, yang ada tujoh kpala dan s-puloh tandok.
8Itu binatang yang angkau sudah tengok sudah ada, dan skarang t'ada; dan dia nanti kluar deri-pada itu tmpat yang tiada terduga, dan pergi masok kbinasa'an. Dan orang-orang yang tinggal di bumi, ia'itu orang yang nama-nya t'ada tertulis dalam kitab hidop deri-pada tempo kjadian dunia, nanti hairan bila dia-orang tengokkan itu binatang, bagimana dia sudah ada, dan skarang t'ada, dan nanti datang pula.
9Dalam ini hal ada akal yang bijaksana. Itu tujoh kpala jadi tujoh gunong, di mana itu prempuan ada dudok:
10dan ada tujoh raja; lima sudah jatoh, satu ada lagi, dan lagi satu pula blum datang; dan bila dia datang dia msti tinggal sdikit tempo punya lama.
11Dan itu binatang yang sudah ada, dan skarang t'ada, dia sndiri jadi yang nombor lapan, dan asal-nya deri-pada itu tujoh, dan dia pun pergi masok kbinasa'an.
12Dan itu s-puloh tandok yang angkau sudah tengok jadi s-puloh raja, yang blum trima kraja'an-nya lagi; ttapi dia-orang trima kuasa sperti raja sama-sama itu binatang, satu jam punya lama.
13Dan ini smoa satu bichara, dan dia-orang srahkan dia-orang punya kkuatan dan kuasa k-pada itu binatang.
14Ini smoa nanti berprang mlawan itu Anak-domba, dan itu Anak-domba nanti kalahkan dia-orang, kerna dia-lah Tuan atas sgala tuan dan Raja atas sgala raja; dan sgala orang yang ada sama-sama dia pun nanti mnang, ia'itu sgala orang yang sudah di-panggil, dan sudah di-pileh, dan yang stiawan.
15Dan dia kata sama sahya, "Itu ayer yang angkau sudah tengok, tmpat di mana itu sundal ada dudok, ia'itu bbrapa kaum, dan orang-orang banyak, dan bangsa-bangsa, dan bhasa-bhasa.
16Dan itu s-puloh tandok yang angkau sudah tengok, dan itu binatang, smoa ini nanti bnchi sama itu sundal, dan nanti jadikan dia sunyi, dan tlanjangkan sama dia, dan nanti makankan dia punya daging, dan nanti hanguskan dia dngan api.
17Kerna Allah sudah masokkan hati dia-orang mau buat dia punya bichara, dan mnjadi satu bichara, dan srahkan dia-orang punya kraja'an k-pada itu binatang, sampai perkata'an Allah sudah gnap.
18Dan itu prempuan yang angkau sudah tengok, ia'itu negri yang bsar itu, yang jadi raja atas sgala raja bumi.