Dual Panel1Ada satu orang yang sakit, bernama Lazarus, orang Bait-Ani, ia'itu kampong Mariam dan sudara-nya Marta.
2Itu Mariam-lah yang sudah minyakkan Isa dngan minyak wangi, dan sapukan kaki-nya dngan rambot-nya, dia-lah punya sudara Lazarus ada sakit.
3Jadi itu, dua adek-beradek itu hantarkan orang k-pada Isa, dan kata, "Ya Tuhan, dia itu yang Tuhan kaseh ada sakit."
4Ttapi bila Isa dngar, dia kata, "Ini pnyakit bukan spaya bawa mati, ttapi kerna Allah punya kmulia'an, spaya oleh-nya Anak Allah boleh di-muliakan."
5Isa ada kaseh sama Marta, dan sudara-nya, dan Lazarus.
6Jadi, bila dia dngar yang Lazarus ada sakit, dia tinggal lagi dua hari di tmpat itu juga.
7Kmdian deri-pada itu dia kata sama murid-murid-nya, "Mari kita balek pergi Yahudiah."
8Murid-murid kata sama dia, "Rabbi, bharu tadi orang Yahudi sudah chari jalan mau hntam batu sama Rabbi; dan mau-kah pergi di sana lagi?"
9Isa jawab, "Bukan-kah satu hari ada dua-blas jam? Jikalau orang jalan bila siang hari, dia t'ada terantok, kerna dia boleh tengok trang dunia ini.
10Ttapi jikalau orang jalan bila malam, dia nanti terantok, kerna trang itu tidak ada dalam-nya."
11Bgini-lah Isa berchakap: dan habis itu dia kata sama dia-orang, "Kita punya sohbat Lazarus ada tertidor; ttapi sahya pergi mau bangunkan dia deri tidor."
12Sbab itu murid-murid kata sama dia, "Ya Tuhan, jikalau dia sudah tertidor, dia nanti baik."
13Isa sudah chakap bgini deri-hal Lazarus punya kmatian: ttapi dia-orang pula sangkakan dia sudah chakap fasal brentikan pnat dalam tidor.
14Jadi kmdian Isa kata trang-trang sama dia orang, "Lazarus sudah mati.
15Dan deri kerna kamu smoa sahya suka-hati sbab sahya t'ada di sana, spaya kamu boleh perchaya; ttapi mari kita pergi k-pada dia."
16Sbab itu Tomas, yang di-glarkan Didumus, kata sama dia punya kawan-murid-murid, "Mari kita pun pergi, spaya kita boleh mati sama-sama dia."
17Jadi, bila Isa sudah sampai, dia dapat tahu yang Lazarus sudah ada dalam kubor ampat hari punya lama.
18Bait-Ani itu dkat Yerusalim, ada dua batu punya jauh:
19dan antara orang Yahudi banyak orang sudah datang k-pada Marta dan Mariam, mau hiburkan dia-orang kerna sudara-nya.
20Jadi, bila Marta dngar Isa ada datang, dia pergi jumpa sama dia: ttapi Mariam lagi dudok di rumah.
21Marta kata sama Isa, "Ya Tuhan, jikalau Tuhan sudah ada di sini, sahya punya sudara t'ada mati.
22Dan skarang pun sahya tahu apa-apa Tuhan minta sama Allah, nanti Allah bri k-pada Tuhan."
23Isa kata sama dia, "Angkau punya sudara nanti berbangkit."
24Marta kata sama dia, "Sahya tahu dia nanti berbangkit dalam kbangkitan hari pnghabisan."
25Isa kata sama dia, "Sahya ini-lah kbangkitan, dan hidop itu: orang yang perchaya sama sahya, kalau sudah mati pun, nanti hidop:
26dan barang-siapa yang hidop dan perchaya sama sahya, skali-kali t'ada nanti mati. Angkau perchaya-kah ini?"
27Marta jawab sama dia, "Btul, Tuhan: sahya sudah perchaya yang Tuhan-lah Almaseh, Anak Allah, yang datang dalam dunia."
28Bila dia sudah kata ini, dia pergi panggil dia punya sudara Mariam diam-diam, dan kata, "Guru sudah datang, dan dia panggil angkau."
29Bila dia dngar bgitu, dia pun bangun lkas, dan datang sama Isa.
30(Ini ktika Isa blum masok kampong, ttapi ada lagi di luar di tmpat Marta sudah jumpa sama dia.)
31Dan itu orang-orang Yahudi yang ada sama-sama Mariam dalam rumah dan hiburkan dia, bila dia-orang tengok Mariam lkas bangun dan kluar, dia-orang ikut sama dia, kerna dia-orang sangkakan Mariam mau pergi di kubor mau mnangis di situ.
32Dan bila Mariam sampai di tmpat Isa ada, dan tengok dia, dia jatoh di kaki-nya dan kata sama dia, "Ya Tuhan, kalau Tuhan sudah ada di sini, sahya punya sudara t'ada mati."
33Jadi, bila Isa tengok dia mnangis, dan itu orang-orang Yahudi yang datang sama-sama dia pun mnangis, dia mngrang dalam roh-nya, dan hati-nya terkachau,
34dan dia kata, "Di mana kamu sudah tarohkan dia?" Dia-orang kata sama dia, "Tuhan mari tengok."
35Isa mnangis.
36Sbab itu orang Yahudi kata, "Tengok, apa macham dia sayang sama dia!"
37Ttapi antara dia-orang ada yang kata, "Ini orang yang sudah chlekkan mata orang buta, bukan-kah dia ada kuasa kasi ini orang jangan mati?"
38Jadi, Isa datang di kubor dngan mngrang dalam diri-nya. Itu kubor satu goa batu, dan ada satu batu tersandar pada-nya.
39Isa kata, "Undorkan itu batu." Marta, itu orang mati punya sudara, kata sama Isa, "Tuhan, skarang dia sudah berbau: kerna sudah ampat hari."
40Isa kata sama dia, "Bukan-kah sahya sudah bilang sama angkau, kalau angkau perchaya angkau nanti tengok kmulia'an Allah?"
41Jadi dia-orang undorkan itu batu. Isa tngadah, dan kata, "Ya Bapa, sahya mnguchap shukor sbab Bapa sudah dngar sama sahya.
42Dan sahya sudah tahu yang Bapa slalu dngar sama sahya: ttapi deri sbab orang-banyak yang berdiri kliling sini sahya sudah kata bgitu, spaya dia-orang boleh perchaya yang Bapa sudah hantarkan sahya."
43Dan bila dia sudah chakap bgini, dia bertriak dngan suara bsar, "Hei Lazarus, mari kluar."
44Itu orang yang sudah mati kluar-lah, dngan kaki-tangan-nya terikat sama kain kapan; dan muka-nya ada berbalut sama sapu-tangan. Isa kata sama dia-orang, "Lpaskan dia, dan biar dia pergi."
45Sbab itu, antara orang Yahudi yang sudah datang k-pada Mariam dan sudah tengok apa yang dia sudah buat, banyak juga yang perchaya sama dia.
46Ttapi ada orang yang pergi k-pada orang Farisi, dan bilangkan sama dia-orang apa-apa yang Isa sudah buat.
47Sbab itu kpala-kpala imam sama orang-orang Farisi himponkan orang majlis bsar, dan kata, "Apa kita msti buat? kerna itu orang ada buat banyak tanda-tanda.
48Kalau kita biarkan dia bgini, smoa orang nanti perchaya sama dia: dan orang Rom nanti datang ambil kita punya tmpat dan kita punya bangsa pun."
49Ttapi di antara dia-orang ada satu orang bernama Kayafa, ia'itu imam-bsar itu tahun, yang kata sama dia-orang, "Kamu ini ta'tahu satu apa,
50dan kamu t'ada kirakan yang ada untong sama kamu kalau satu orang mati gantikan bangsa kita, jangan s-gnap bangsa pula binasa."
51Dan ini dia kata bukan deri-pada diri-nya sndiri: ttapi sbab dia jadi imam-bsar itu tahun, dia bernabuat yang Isa nanti mati kerna itu bangsa;
52dan bukan saja kerna itu bangsa, ttapi spaya dia boleh himponkan mnjadi satu sgala anak-anak Allah yang sudah chrai-brai.
53Jadi, deri-pada itu hari juga dia-orang berpakat mau bunoh sama Isa.
54Sbab itu Isa t'ada lagi berjalan di antara orang Yahudi dngan nyata-nyata, ttapi dia undor deri situ pergi jajahan sblah tanah sunyi, di satu negri yang bernama Ifra'im; dan dia tinggal di sana sama murid-murid itu.
55Orang Yahudi punya hari-bsar Paska sudah dkat; dan banyak orang pergi di Yerusalim deri dusun-dusun dhulu deri-pada Paska, mau chuchikan diri-nya.
56Jadi, orang chari sama Isa, dan kata satu sama lain, waktu dia-orang ada berdiri di ka'abah, "Apa macham kamu smoa fikir? T'ada-kah dia nanti datang k-pada ini hari-bsar?"
57Ttapi kpala-kpala imam sama orang Farisi sudah psan, jikalau barang-siapa tahu di mana Isa ada, dia msti nyatakan, spaya dia-orang boleh tangkap sama dia.