Alkitab Mobile SABDA
[VER] : [BABA]     [PL]  [PB] 
 <<  Yohanes 13 >> 

1Dhulu deri-pada hari-bsar Paska, Isa sudah tahu waktu-nya sudah sampai yang dia msti pindah deri dunia ini pergi sama Bapa, dan sdang dia sudah sayang orang-orang-nya sndiri yang di dalam dunia, dia sayang sama dia-orang sampai ksudahan.

2Tngah makan, bila iblis sudah masokkan dalam hati Yudas Iskariot, anak Simon, spaya srahkan Isa,

3mski pun Isa tahu yang Bapa sudah kasi smoa perkara di tangan-nya, dan lagi dia sudah datang deri-pada Allah, dan dia nanti pulang k-pada Allah,

4dia bangun deri-pada makan, dan buka dia punya pakaian; dan dia ambil satu tuala, dan ikat pinggang-nya.

5Habis itu dia taroh ayer dalam mangkok, dan mula'i chuchikan murid-murid punya kaki, dan sapukan dngan tuala yang terikat di pinggang-nya.

6Jadi dia datang k-pada Simon Petrus. Dia kata sama Isa, "Ya Tuhan, Tuhan-kah chuchikan kaki sahya?"

7Isa jawab kata sama dia, "Apa yang sahya ada buat, angkau t'ada tahu skarang; ttapi kmdian angkau nanti mngerti."

8Petrus kata sama dia, "Jangan skali-kali Tuhan chuchikan kaki sahya." Isa jawab sama dia, "Jikalau sahya t'ada chuchikan angkau, angkau t'ada bhagian sama sahya."

9Simon Petrus kata sama dia, "Ya Tuhan, bukan saja kaki sahya, ttapi tangan dan kpala pun."

10Isa kata sama dia, "Orang yang sudah mandi, ta'usah chuchi, chuma dia punya kaki saja, ttapi dia ada berseh smoa skali: dan kamu ada berseh, ttapi bukan kamu smoa."

11Kerna dia tahu siapa nanti srahkan dia, sbab itu dia kata, "Bukan kamu smoa ada berseh."

12Bila dia sudah chuchikan dia-orang punya kaki, dan sudah ambil dia punya pakaian dan dudok, dia kata sama dia-orang, "Ada-kah kamu mngerti apa sahya sudah buat sama kamu?

13Kamu triak sahya 'Guru' dan 'Tuhan:' dan patut juga kamu kata bgitu; kerna sahya-lah dia.

14Jadi jikalau sahya, Tuhan dan Guru ini, sudah chuchikan kamu punya kaki, patut-lah kamu pun chuchikan kaki satu sama lain.

15Kerna sahya sudah kasi satu tuladan sama kamu, spaya kamu pun boleh buat sperti sahya sudah buat sama kamu.

16Dngan sunggoh-sunggoh sahya bilang sama kamu, satu hamba bukan lbeh bsar deri-pada tuan-nya; dan satu surohan pun bukan lbeh bsar deri-pada orang yang surohkan dia.

17Kalau kamu tahu ini smoa, berkat-lah kamu kalau kamu buat.

18Sahya bukan berchakap deri-hal kamu smoa skali: kerna sahya ini tahu siapa yang sahya sudah pileh: ttapi spaya kitab boleh di-bnarkan, 'Orang yang makan sahya punya roti sudah angkat tumit-nya mlawan sahya.'

19Deri-pada ini waktu sahya bilang sama kamu s-blum itu perkara jadi, spaya bila sudah jadi, kamu boleh perchaya yang sahya-lah dia.

20Dngan sunggoh-sunggoh sahya bilang sama kamu, orang yang sambot barang-siapa yang sahya sudah hantarkan, dia sambot sama sahya; dan orang yang sambot sahya, dia sambot dia yang hantarkan sahya."

21Bila Isa sudah kata bgitu, terkachau-lah dalam roh-nya, dan dia bersaksi dan kata, "Dngan sunggoh-sunggoh sahya bilang sama kamu, satu orang antara kamu ini nanti srahkan sahya."

22Itu murid-murid tengok satu sama lain, dngan bimbang hati 'ntah siapa-kah yang Isa sudah katakan.

23Antara murid-murid-nya ada satu orang yang tersandar di dada Isa, dia itu yang Isa kaseh.

24Sbab itu Simon Petrus kasi tanda sama itu anak-murid, dan kata sama dia, "Bilang-lah siapa itu yang dia katakan."

25Dngan itu hal, dia itu tersandar blakang di dada Isa, dan kata sama dia, "Ya Tuhan, siapa itu?"

26Sbab itu Isa jawab, "Dia-lah yang sahya nanti chlopkan s-kping roti dan kasi sama dia." Jadi bila dia sudah chlopkan itu roti, dia ambil kasi sama Yudas anak Simon Iskariot.

27Habis itu roti, Setan masok dalam Yudas. Jadi Isa kata sama dia, "Buat-lah lkas apa yang angkau mau buat."

28Di antara orang-orang yang dudok di meja itu, satu orang pun ta'tahu 'ntah apa sbab Isa sudah chakap bgitu sama dia.

29Kerna yang ada fikirkan, sdang Yudas ada pundi-pundi itu, Isa sudah kata sama dia, "Bli-lah apa-apa yang kita mau pakai kerna hari-bsar;" atau barangkali, spaya Yudas boleh kasi apa-apa k-pada orang miskin.

30Habis makan itu roti, itu juga dia kluar: dan hari pun sudah malam.

31Jadi bila dia sudah kluar, Isa kata, "Skarang-lah Anak-manusia sudah di-muliakan, dan Allah pun di-muliakan dalam dia;

32dan Allah nanti muliakan dia dalam diri-nya, dan ini juga dia nanti muliakan dia.

33Hei anak-anak, t'ada lama lagi sahya nanti ada sama-sama kamu. Kamu smoa nanti chari sama saya: dan sperti sahya sudah kata sama orang Yahudi, 'Di mana sahya pergi kamu ta'boleh datang;' bgitu-lah sahya kata sama kamu skarang.

34Satu hukum yang bharu sahya ada kasi sama kamu, ia'itu kaseh-lah satu sama lain; sperti sahya sudah kaseh sama kamu, spaya kamu pun kaseh satu sama lain.

35Dalam ini hal smoa orang boleh tahu yang kamu jadi sahya punya murid, ia'itu jikalau kamu ada taroh kaseh satu sama lain."

36Simon Petrus kata sama dia, "Tuhan mau pergi mana?" Isa jawab, "Di mana sahya pergi, angkau ta'boleh ikut sahya skarang; ttapi blakang kali angkau nanti ikut."

37Petrus kata sama dia, "Ya Tuhan, knapa pula sahya ta'boleh ikut Tuhan skarang juga? Sahya nanti srahkan nyawa sahya kerna Tuhan."

38Isa jawab, "Btul-kah angkau mau srahkan angkau punya nyawa kerna sahya? Dngan sunggoh-sunggoh sahya bilang sama angkau, ayam t'ada nanti berkokok kalau s-blum angkau sangkalkan sahya tiga kali.


  Share Facebook  |  Share Twitter

 <<  Yohanes 13 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2018
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran