Alkitab Mobile SABDA
[VER] : [BABA]     [PL]  [PB] 
 <<  Yohanes 16 >> 

1"Ini smoa sahya sudah chakapkan sama kamu, spaya kamu jangan terantok.

2Orang nanti tolakkan kamu kluar deri rumah-rumah smbahyang: ya, waktu-nya ada datang bila barang-siapa yang bunoh sama kamu nanti fikir yang dia buat smbahyang sama Allah.

3Dan smoa ini dia-orang nanti buat, sbab blum knal sama Bapa atau sama sahya.

4Ttapi ini smoa sahya sudah chakapkan sama kamu, spaya bila waktu-nya sudah sampai, kamu boleh ingat bagimana sahya sudah bilangkan kamu. Dan sahya t'ada katakan ini smoa sama kamu deri mula-nya, sbab sahya ada sama-sama kamu.

5Ttapi skarang sahya ada pergi k-pada dia yang hantarkan sahya; dan t'ada satu orang pun antara kamu yang tanya sama sahya, 'Tuan pergi mana?'

6Balek, sbab sahya sudah chakapkan ini smoa sama kamu, kamu punya hati pnoh dngan ksusahan.

7Dalam pada itu, sahya ada bilang sama kamu perkara yang btul; ada untong sama kamu yang sahya pergi: kerna kalau sahya tidak pergi, itu Pnghibur t'ada nanti datang k-pada kamu; ttapi kalau sahya pergi, sahya nanti hantarkan dia k-pada kamu.

8Dan dia pula, bila dia sudah datang, nanti salahkan ini dunia deri-hal dosa, dan deri-hal kbnaran, dan deri-hal hukuman:

9deri-hal dosa, sbab orang t'ada perchaya sama sahya;

10deri-hal kbnaran, sbab sahya pergi k-pada Bapa sahya, dan kamu smoa t'ada nanti tengok sahya lagi;

11deri-hal hukuman, sbab ini dunia punya raja sudah kna hukuman.

12Ada lagi banyak perkara sahya mau katakan sama kamu, ttapi skarang kamu ta'boleh tanggong dia.

13Ttapi bila dia itu datang, ia'itu Roh kbtulan, dia nanti bawa kamu jalan dalam smoa kbtulan: kerna dia t'ada nanti chakap deri sndiri; ttapi apa-apa dia dngar, itu smoa-lah dia nanti chakapkan: dan dia nanti khabarkan k-pada kamu perkara-perkara yang mndatang.

14Dia nanti muliakan sahya: kerna dia nanti ambil sahya punya perkara, dan khabarkan k-pada kamu.

15Smoa apa-apa yang Bapa ada, itu smoa sahya punya: itu-lah sbab sahya sudah bilang, dia nanti ambil sahya punya perkara, dan nanti khabarkan k-pada kamu.

16Lagi sikit, dan kamu t'ada nanti nampak sahya; kmdian lagi sikit pula, dan kamu nanti tengok sahya."

17Sbab itu ada murid-murid-nya kata satu sama lain, "Apa ini dia ada bilang sama kita, 'Lagi sikit, dan kamu t'ada nanti nampak sahya; kmdian lagi sikit pula, dan kamu nanti tengok sahya:' dan, 'Sbab sahya ada pergi k-pada Bapa'?"

18Jadi, dia-orang kata, "Apa-kah ini yang dia kata, 'Lagi sikit'? Kita ta'tahu apa dia ada bilang."

19Isa tahu yang dia-orang mau tanya sama dia, dan dia kata sama dia-orang, "Ada-kah kamu tanya-mnanya satu sama lain deri-hal ini, ia'itu yang sahya sudah bilang, 'Lagi sikit, dan kamu t'ada nanti nampak sahya; kmdian lagi sikit pula, dan kamu nanti tengok sahya.'

20Dngan sunggoh-sunggoh sahya bilang sama kamu, yang kamu ini nanti mnangis dan mratap, ttapi ini dunia nanti bersuka-suka: dan kamu ini nanti jadi susah-hati, ttapi kamu punya ksusahan nanti berubah jadi ksuka'an pula.

21Satu prempuan bila dia beranak jadi susah-hati, sbab tempo-nya sudah sampai: ttapi bila dia sudah kluarkan itu anak, dia t'ada ingat lagi itu seksa, deri sbab ksuka'an kerna satu manusia sudah jadi dalam dunia.

22Jadi kamu ini skarang ada ksusahan: ttapi sahya nanti tengok sama kamu lagi s-kali, dan kamu punya hati nanti bersuka-suka, dan kamu punya ksuka'an t'ada satu orang pun nanti ambil deri-pada kamu.

23Dan itu waktu kamu t'ada nanti tanya sahya apa-apa. Dngan sunggoh-sunggoh sahya bilang sama kamu, jikalau kamu minta apa-apa sama Bapa, dia nanti kasi kamu dalam nama sahya.

24Sampai skarang kamu blum minta apa-apa dalam nama sahya: minta-lah dan kamu nanti trima, spaya kamu punya ksuka'an boleh di-gnapkan.

25"Ini smoa sahya sudah chakapkan sama kamu dngan ma'ana: waktu-nya ada datang bila sahya t'ada lagi nanti chakap sama kamu dngan ma'ana, ttapi sahya nanti khabarkan k-pada kamu nyata-nyata deri-hal Bapa.

26Itu waktu kamu nanti minta dalam nama sahya: dan bukan sahya kata sama kamu yang sahya ini nanti minta sama Bapa kerna kamu;

27sbab Bapa sndiri sayang sama kamu, kerna kamu sudah sayang sama sahya, dan sudah perchaya yang sahya sudah kluar deri Bapa.

28Sahya sudah kluar deri Bapa, dan sudah datang dalam dunia: kmdian sahya tinggalkan dunia dan pergi k-pada Bapa."

29Murid-murid-nya kata, "Itu-lah, Tuan skarang ada chakap dngan nyata-nyata, dan t'ada chakap ma'ana.

30Skarang kita tahu yang Tuan tahu sgala perkara, dan ta'usah pula orang tanya-mnanya sama Tuan: oleh ini kita perchaya yang Tuan sudah kluar deri Allah."

31Isa jawab sama dia-orang, "Ada-kah kamu perchaya skarang?

32Ingat, waktu-nya ada datang, dan sudah pun sampai, yang kamu nanti di-chrai-braikan, masing-masing orang k-pada dia punya tmpat sndiri, dan nanti tinggalkan sahya s'orang-s'orang: ttapi sahya t'ada s'orang-s'orang, kerna Bapa ada sama-sama sahya.

33Ini smoa sahya sudah chakapkan sama kamu, spaya dalam sahya kamu boleh dapat sntosa. Dalam dunia ini kamu nanti dapat ksusahan: ttapi ttapkan kamu punya hati; sahya ini sudah kalahkan dunia."


  Share Facebook  |  Share Twitter

 <<  Yohanes 16 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel