Alkitab Mobile SABDA
[VER] : [BABA]     [PL]  [PB] 
 <<  Yohanes 2 >> 

1Dan lusa-nya ada satu perjamuan kahwin di negri Kana, di tanah Galil; dan Isa punya mak ada situ:

2dan Isa sama murid-murid-nya pun sudah kita jmpot k-pada itu perjamuan kahwin.

3Bila ayer-anggor sudah kurang, Isa punya mak kata sama dia, "Dia-orang t'ada ayer-anggor."

4Dan Isa kata sama mak-nya, "Sahya sama mak apa terkna? Sahya punya waktu blum sampai lagi."

5Dia punya mak kata sama orang-orang playan, "Apa-apa dia bilang sama kamu, buat-lah."

6Di situ ada terltak anam tmpayan, sperti orang Yahudi punya adat chuchi, masing-masing tmpayan muat dua-tiga buyong ayer.

7Isa kata sama dia-orang, "Isikan ayer dalam ini tmpayan." Dan dia-orang isikan pnoh sampai di mulut.

8Dan dia kata sama dia-orang, "Skarang boleh chedok, dan bawa pergi sama itu kpala-perjamuan." Dan dia-orang bawa pergi.

9Bila itu kpala-perjamuan sudah kchap itu ayer yang skarang sudah mnjadi ayer-anggor, (dan ta'tahu deri mana itu ttapi orang-orang playan yang sudah chedokkan saja tahu), dia panggil itu kmantin jantan,

10dan kata sama dia, "Smoa orang taroh ayer-anggor yang baik lbeh dhulu; dan bila orang sudah puas minum, bharu-lah orang taroh yang kurang baik punya: ttapi angkau ini sudah simpan ayer-anggor yang baik sampai skarang."

11Ini tanda yang mula-mula Isa sudah buat di negri Kana di tanah Galil, dan dia nyatakan dia punya kmulia'an; dan murid-murid-nya perchaya sama dia.

12Kmdian deri-pada itu, Isa turun pergi Kafarnahum, dia sama mak-nya dan sudara-sudara dlaki, dan murid-murid-nya: dan dia-orang smoa tinggal di sana t'ada brapa hari punya lama.

13Orang Yahudi punya Paska sudah dkat, dan Isa naik pergi Yerusalim.

14Dan di ka'abah dia jumpa orang yang jual Imbu dan kambing dan burong komba, dan orang-orang yang tukar wang pun dudok di situ:

15dan dia bikin satu chabok deri tali, dan halaukan smoa kluar deri-pada ka'abah itu, baik kambing dan lmbu pun; dan dia churahkan duit orang-orang yang tukar wang, dan balekkan dia-orang punya meja;

16dan sama orang uang jual burong komba dia kata, "Bawa pergi ini smoa; jangan buat rumah Bapa sahya satu rumah mniaga."

17Dia punya murid-murid ingat yang ada tersurat, "Hati sahya nanti termakan oleh sbab chmburu kerna rumah-mu."

18Sbab itu orang Yahudi jawab kata sama dia, "Sdang angkau ada buat ini smoa, apa-kah tanda angkau ada tunjokkan sama kita?"

19Isa jawab, kata sama dia-orang, "Rubohkan ini ka'abah, dan dalam tiga hari sahya nanti bangunkan pula."

20Sbab itu orang Yahudi kata, "Sudah ampat-puloh-anam tahun punya lama orang bikin ini ka'abah, dan angkau nanti bangunkan dalam tiga hari-kah?"

21Ttapi Isa chakap deri-hal dia punya badan punya ka'abah.

22Sbab itu bila Isa sudah berbangkit deri antara orang mati, bharu-lah murid-murid-nya teringat yang dia sudah chakap bgini; dan dia-orang perchaya kitab dan perkata'an yang Isa sudah kata.

23Bila Isa di Yerusalim tempo hari-bsar Paska, banyak orang perchaya sama dia punya nama, sbab dia-orang tengok sgala tanda-tanda yang dia buat.

24Ttapi Isa t'ada harapkan diri-nya k-pada itu orang smoa, sbab dia tahu smoa orang,

25dan sbab ta'berguna sama dia kalau orang bersaksi deri-hal manusia; kerna dia sndiri tahu apa ada dalam manusia.


  Share Facebook  |  Share Twitter

 <<  Yohanes 2 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran