Alkitab Mobile SABDA
[VER] : [BABA]     [PL]  [PB] 
 <<  Yohanes 21 >> 

1Kmdian deri-pada ini smoa, Isa nyatakan diri-nya k-pada murid-murid lagi s-kali dkat tasek Tibirias; dan dia nyatakan diri-nya bgini.

2Di situ ada berhimpon Simon Petrus, dan Tomas yang di-sbot Didumus, dan Natana'el yang deri Kana di tanah Galil, dan anak-anak Zabdi, dan lain dua murid-murid-nya.

3Dan Simon Petrus kata sama dia-orang, "Sahya mau pergi tangkap ikan." Dia-orang kata sama dia, "Kita pun mau pergi sama angkau." Dia-orang kluar-lah, dan naik prahu; dan itu malam satu ekor pun dia-orang t'ada tangkap.

4Ttapi bila hari sudah mau siang, Isa ada berdiri di pantai: ttapi murid-murid ta'tahu itu-lah Isa.

5Jadi Isa kata sama dia-orang, "Hei anak-anak, kamu ada-kah lauk?" Dia-orang jawab sama dia, "T'ada."

6Dia kata sama dia-orang, "Buangkan pukat kamu sblah kanan prahu, kamu nanti dapat." Sbab itu dia-orang buangkan-lah, dan dia-orang ta'boleh tarek itu pukat lagi, sbab terlalu banyak ikan.

7Sbab itu-lah itu anak-murid yang Isa kaseh punya kata sama Petrus, "Ini Tuhan." Jadi, bila Simon Petrus dngar yang itu-lah Tuhan, dia ikatkan baju-nya (kerna badan-nya terbuka), dan terjunkan diri-nya dalam ayer.

8Ttapi murid-murid yang lain datang dalam prahu kchil (kerna dia-orang t'ada brapa jauh deri darat, chuma ada lima-puloh dpa saja bgitu), sambil tarek itu pukat yang pnoh ikan.

9Jadi, bila dia-orang sudah kluar naik darat, dia-orang tengok di situ ada api-arang, dan ikan terltak atas-nya dngan roti.

10Isa kata sama dia-orang, "Bawa ikan yang tadi kamu tangkap."

11Dan Simon Petrus pergi tarek pukat itu naik darat, pnoh ikan yang bsar-bsar, s-ratus lima-puloh-tiga ekor punya banyak: ttapi, mski pun ada bgitu banyak s-kali, itu pukat t'ada koyak.

12Isa kata sama dia-orang, "Mari makan." Dan t'ada satu anak-murid pun brani tanya dia, "Tuan siapa?" sbab dia-orang tahu yang dia-lah Tuhan.

13Isa datang, dan ambil roti kasi sama dia-orang, dngan itu ikan pun.

14Ini sudah tiga kali yang Isa nyatakan diri-nya k-pada murid-murid, kmdian deri-pada dia bangkit deri antara orang mati.

15Jadi, bila dia-orang sudah habis makan pagi, Isa kata sama Simon Petrus, "Hei Simon anak Yahya, ada-kah angkau kaseh sama sahya lbeh deri-pada ini smoa?" Dia kata sama Isa, "Ya, Tuhan; Tuhan tahu-lah yang sahya sayang sama Tuhan." Isa kata sama dia, "Kasi makan sama anak-domba sahya."

16Nombor dua kali Isa kata sama dia, "Hei Simon anak Yahya, ada-kah angkau kaseh sama sahya?" Petrus kata sama dia, "Ya, Tuhan; Tuhan tahu-lah yang sahya sayang sama Tuhan." Isa kata sama dia, "Gombalakan domba-domba sahya."

17Nombor tiga kali Isa kata sama dia, "Hei Simon anak Yahya, ada-kah angkau sayang sama sahya?" Dan Petrus susah hati sbab nombor tiga kali Isa kata sama dia, "Ada-kah angkau sayang sama sahya?" Dan dia kata sama Isa, "Tuhan tahu smoa perkara; Tuhan tahu yang sahya ada sayang sama Tuhan." Isa kata sama dia, "Kasi makan sama domba sahya.

18Dngan sunggoh-sunggoh sahya bilang sama angkau, s-lagi angkau muda angkau sudah ikat pinggang sndiri, dan jalan mana-mana angkau suka: ttapi bila angkau sudah tua, angkau nanti hulorkan dua blah tangan angkau, dan lain orang pula nanti ikatkan angkau punya pinggang, dan bawa angkau di tmpat yang angkau t'ada suka."

19Isa chakap ini mau tandakan dngan apa macham punya kmatian Petrus nanti muliakan Allah. Dan bila sudah chakap ini, dia kata sama Petrus, "Ikut sama sahya."

20Petrus pula balek muka, dan tengok itu anak-murid yang Isa kaseh ada mngikut; ia'itu yang sudah sandar di dada Isa tempo perjamuan malam, dan yang sudah kata, "Ya Tuhan, siapa-kah itu yang nanti srahkan Tuhan?"

21Jadi bila Petrus tengok itu anak-murid, dia kata sama Isa, "Ya Tuhan, ini orang pula, apa?"

22Isa kata sama dia, "Jikalau sahya suka ini orang tinggal sampai sahya datang, apa ada terkna sama angkau? Angkau ikut sama sahya."

23Sbab itu ini chakap sudah mashhur antara sudara-sudara itu, ia'itu yang itu satu anak-murid ta'nanti mati: ttapi Isa bukan-nya kata sama dia, yang dia ta'nanti mati; chuma dia kata, "Jikalau sahya suka ini orang tinggal sampai sahya datang, apa ada terkna sama angkau?"

24Dan dia ini-lah itu anak-murid yang ada bersaksi deri-hal ini smoa, dan sudah suratkan ini smoa: dan kita tahu yang dia punya ksaksian ada btul.

25Dan lagi pun, ada banyak lain-lain perkara yang Isa sudah buat, dan jikalau itu smoa di-suratkan satu-satu, pada sahya punya fikiran, dunia ini pun t'ada termuat kitab-kitab yang nanti di-suratkan.


  Share Facebook  |  Share Twitter

 <<  Yohanes 21 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel