Dual Panel1Sbab itu bila Tuhan dapat tahu bagimana orang Farisi sudah dngar yang Isa ada jadikan dan baptiskan lbeh banyak murid-murid deri-pada Yahya
2(mski pun Isa sndiri t'ada baptiskan orang, ttapi dia punya murid-murid yang baptiskan),
3Isa tinggalkan tanah Yahudiah, dan pergi tanah Galil lagi skali.
4Dan dia msti lalu tanah Samariah.
5Jadi itu dia datang sampai satu negri Samariah yang bernama Sukhar, dkat tanah yang Yakob sudah kasi sama dia punya anak Yusof:
6di situ pula ada prigi Yakob. Sbab itu kerna dia sudah pnat jalan, Isa dudok-lah di tpi prigi itu dngan bgini punya hal. Itu ktika ada pukol dua-blas tngah hari bgitu.
7Ada satu prempuan Samariah datang mau timba ayer: Isa kata sama dia, "Kasi sahya minum."
8Kerna dia punya murid-murid sudah pergi negri bli barang makanan.
9Jadi itu prempuan Samariah kata sama dia, "Bagimana pula tuan ini, satu orang Yahudi, mau minta minum deri-pada sahya ini, satu prempuan Samariah?" (Kerna orang Yahudi t'ada champur sama orang Samariah.)
10Isa jawab, kata sama dia, "Jikalau nyonya sudah tahu Allah punya pmbrian, dan siapa-kah yang ada bilang, 'Kasi sahya minum,' tntu-lah nyonya sudah minta deri dia pula, dan dia nanti kasi ayer yang hidop."
11Itu prempuan kata sama dia, "Tuhan ini t'ada timba, lagi pun ini prigi dalam: deri mana pula tuan ada ayer yang hidop itu?
12Tuan ini lbeh bsar-kah deri-pada kita punya nenek-moyang Yakob, yang sudah kasi kita ini prigi? dan dia pun sudah minum sndiri, dan anak-anak-nya, sama binatang-nya skali."
13Isa jawab kata sama dia, "Tiap-tiap orang yang minum ini ayer nanti jadi haus lagi,
14ttapi barang-siapa yang minum ayer yang sahya nanti kasi sama dia, itu orang skali-kali t'ada nanti haus; ttapi ayer yang sahya kasi sama dia nanti mnjadi dalam-nya satu mata-ayer yang panchar kerna hidop yang kkal."
15Itu prempuan kata sama dia, "Tuan kasi sahya ini ayer, spaya sahya jangan haus, dan spaya sahya ta'usah datang sampai sini mau timba ayer."
16Isa kata sama dia, "Pergi panggil nyonya punya laki, dan mari sini."
17Itu prempuan jawab, kata sama dia, "Sahya t'ada laki." Isa kata sama dia, "Nyonya sudah chakap btul, 'Sahya t'ada laki,'
18kerna nyonya sudah ada lima laki; dan itu orang yang skarang nyonya ada, bukan nyonya punya laki: dalam ini hal nyonya sudah chakap btul."
19Itu prempuan kata sama dia, "Ya Tuan, sahya tengok Tuan ini satu nabi.
20Kita ini punya nenek-moyang smbahyang di gunong ini; dan kamu smoa kata di Yerusalim-lah orang patut smbahyang."
21Isa kata sama dia, "Hei nyonya, perchaya-lah sahya, waktu-nya nanti datang bila kamu nanti smbah Bapa itu bukan di gunong ini, dan bukan di Yerusalim pun.
22Kamu smoa ada smbah apa yang kamu ta'tahu: kita ini smbah apa yang kita tahu: kerna slamat datang deri orang Yahudi.
23Ttapi waktu-nya nanti datang, dan skarang pun sudah ada, bila orang yang smbahyang dngan btul nanti smbah Bapa dngan Roh dan kbtulan: kerna ini macham punya orang Allah ada chari spaya dia-orang boleh smbah dia.
24Allah itu Roh: dan orang yang smbah dia msti smbah dia dngan Roh dan kbtulan."
25Itu prempuan kata sama dia, "Sahya tahu itu Masiha nanti datang (yang di-sbot Almaseh); bila dia sudah datang, dia nanti khabarkan smoa perkara sama kita."
26Isa kata sama dia, "Sahya ini-lah dia yang berchakap sama nyonya."
27Habis itu dia punya murid-murid datang; dan dia-orang hairan sbab dia berchakap sama satu prempuan; ttapi satu orang pun t'ada tanya, "Apa tuan chari?" atau, "Knapa tuan berchakap sama dia?"
28Jadi itu prempuan tinggalkan dia punya buyong, dan pergi negri dan bilang sama orang-orang di situ,
29"Mari tengok satu orang yang sudah bilangkan sahya s-lagi perkara yang sahya sudah buat: dia ini-kah Almaseh?"
30Dia-orang kluar deri negri, dan datang k-pada Isa.
31Dalam antara itu, murid-murid terminta-minta sama dia, dan kata, "Rabbi makan-lah."
32Ttapi dia kata sama dia-orang, "Sahya ada jerki mau makan yang kamu smoa ta'tahu."
33Sbab itu, murid-murid bilang satu sama lain, "Ada-kah orang bawa apa-apa kasi dia makan?"
34Isa kata sama dia-orang, "Jerki sahya ia'itu buat kahandak dia yang sudah hantarkan sahya, dan habiskan dia punya pkerja'an.
35Bukan-kah kamu kata, 'Ada lagi ampat bulan, kmdian bharu-lah musim mnuai'? sahya bilang sama kamu, angkat-lah kamu punya mata, dan tengok-lah di ladang-ladang itu, kerna sudah pun kuning boleh mnuai.
36Orang yang mnuai dapat upah, dan kumpolkan buah-buah kerna hidop yang kkal; spaya orang yang mnabur sama orang yang mnuai boleh sama-sama bersuka-suka.
37Kerna dalam ini hal-lah ada btul ini perkata'an, ia'itu, "Lain orang yang mnabur, lain pula yang mnuai.'
38Sahya sudah hantarkan kamu mnuai apa yang atas-nya kamu t'ada berpnat: lain orang sudah berpnat, dan kamu pula sudah dapat bhagian pnat-nya."
39Dan deri itu negri ada banyak orang Samariah sudah perchaya sama dia, deri sbab perkata'an itu prempuan yang sudah bersaksi, "Dia sudah bilangkan sahya s-lagi perkara yang sahya sudah buat."
40Jadi itu, bila orang-orang Samariah itu datang sama dia, dia-orang minta dia tinggal sama dia-orang, dan dia tinggal di situ dua hari punya lama.
41Dan ada lbeh banyak lagi orang yang perchaya deri sbab dia sndiri punya perkata'an;
42dan ini orang smoa kata sama itu prempuan, "Skarang kita sudah perchaya bukan-nya sbab nyonya punya perchakapan: kerna kita sndiri sudah dngar, dan kita tahu yang btul-lah dia ini Juru-Slamat dunia ini."
43Lpas itu dua hari, dia kluar deri sana pergi di Galil.
44Kerna Isa sndiri bersaksi yang satu nabi t'ada dapat hormat dalam negri-nya sndiri.
45Bila dia sampai di Galil, itu orang Galil trima sama dia, sbab dia-orang sudah tengok smoa perkara yang dia sudah buat di Yerusalim tempo hari-bsar, kerna dia-orang pun sudah pergi k-pada hari-bsar itu.
46Sbab itu dia datang lagi skali di negri Kana di tanah Galil, di mana itu ayer sudah di-jadikan ayer-anggor. Dan ada satu raja punya orang yang anak dlaki-nya ada sakit di Kafarnahum.
47Ini orang bila dia dngar khabar yang Isa sudah datang di Galil deri Yahudiah, dia pergi k-pada Isa, dan minta dia datang smbohkan dia punya anak; kerna itu anak hampir mati.
48Isa kata sama dia, "Kamu smoa, kalau blum tengok tanda-tanda dan perkara yang hairan, t'ada skali-kali nanti perchaya."
49Itu raja punya orang kata sama dia, "Tuhan, turun-lah s-blum anak sahya mati."
50Isa kata sama dia, "Angkau boleh pergi; angkau punya anak ada hidop." Itu orang perchaya itu perkata'an yang Isa sudah katakan sama dia, dan dia pergi.
51Waktu dia berjalan turun, hamba-hamba-nya berjumpa sama dia, dan kata anak-nya ada hidop.
52Jadi dia tanya sama dia-orang pukol brapa itu anak mula'i snang. Dan dia-orang kata, "S-malam pukol satu dmam-nya hilang."
53Dan bapa-nya tahu yang itu jam juga Isa sudah kata, "Angkau punya anak ada hidop:" dan dia pun perchaya, dan smoa isi-rumah-nya.
54Ini-lah tanda yang kdua yang Isa buat bila dia kluar deri Yahudiah pergi di Galil.