Dual Panel1Dan sambil Isa berjalan, dia lihat satu orang yang buta deri-pada jadi-nya.
2Dan murid-murid-nya tanya, dan kata sama dia, "Rabbi, siapa yang buat dosa, ini orang-kah atau mak-bapa-nya, yang dia di-beranakkan buta?"
3Isa jawab, "Bukan-nya ini orang sudah buat dosa, dan bukan mak-bapa-nya: ttapi spaya Allah punya perbuatan boleh di-nyatakan dalam dia.
4Kita ini msti buat perbuatan Allah yang hantarkan sahya s-lagi hari siang: kerna malam nanti datang bila satu orang pun ta'boleh kerja.
5S-lagi sahya ada dalam dunia, sahya-lah trang dunia."
6Bila dia sudah chakap bgini, dia ludah di tanah, dan bikin tanah liat dngan ludah itu, dan lkapkan itu tanah liat di mata orang itu,
7dan kata sama dia, "Pergi chuchi di kolam Siloam" (yang kalau tersalin arti-nya 'Surohan'). Sbab itu dia pergi chuchi, dan balek dngan mata-nya chlek.
8Sbab itu, orang sblah-mnyblah dan orang-orang yang dhulu sudah tengok sama dia, yang dia satu orang minta sdkah, smoa-nya kata, "Bukan-kah dia ini yang dudok minta sdkah?"
9Lain orang kata, "Ya, dia:" dan lain orang pula kata, "Bukan, ttapi s-rupa dia." Ttapi dia sndiri kata, "Ya, sahya-lah dia."
10Jadi itu dia-orang kata sama dia, "Bagimana pula angkau punya mata sudah di-chlekkan?"
11Dia jawab, "Itu orang yang bernama Isa sudah bikin tanah liat, dan sudah lkapkan di mata sahya, dan sudah kata sama sahya, 'Pergi chuchi di Siloam:' dan sahya pergi chuchi, dan sudah dapat nampak."
12Dia-orang kata sama dia, "Mana dia itu?" Dia kata, "Ta'tahu."
13Dia-orang bawa itu orang yang dhulu buta k-pada orang Farisi.
14Itu hari bila Isa sudah bikin tanah lihat dan chlekkan dia punya mata jadi hari-perhentian.
15Sbab itu orang Farisi pula tanya sama dia bagimana dia sudah dapat nampak. Dia kata sama dia-orang, "Dia sudah taroh tanah liat di mata sahya, dan sahya chuchi, dan boleh tengok."
16Sbab itu ada orang Farisi yang kata, "Ini orang bukan deri-pada Allah, kerna dia t'ada pegang hari-perhentian." Ttapi yang lain pula kata, "Bagimana orang berdosa boleh buat ini macham punya tanda-tanda?" Dan jadi satu perslisehan antara dia-orang.
17Lagi s-kali dia-orang kata sama itu orang buta, "Angkau pula apa kata deri-hal dia itu, sdang dia sudah chlekkan angkau punya mata?" Dan dia kata, "Dia satu nabi."
18Sbab itu orang Yahudi t'ada perchaya deri-hal itu orang, yang dia sudah di-beranakkan buta dan sudah nampak s-mula, s-blum dia-orang panggil mak-bapa itu orang yang sudah dapat nampak,
19dan sudah tanya sama dia-orang, "Ya-kah dia ini kamu punya anak, yang kamu kata sudah beranak buta? bagimana pula dia boleh nampak?"
20Dia punya mak-bapa jawab kata, "Kita tahu yang dia ini anak kita, dan dia btul sudah beranak buta:
21ttapi 'ntah apa macham dia boleh nampak skarang, kita ta'tahu; atau 'ntah siapa-kah chlekkan mata-nya pun kita ta'tahu juga: tanya-lah sama dia; dia chukop umor: dia boleh chakap deri-hal diri-nya sndiri."
22Dia punya mak-bapa kata ini smoa, sbab dia-orang takot sama orang Yahudi: kerna orang Yahudi smoa sudah s-tuju kalau siapa mngaku yang Isa itu Almaseh, dia msti kna buang deri rumah-smbahyang.
23Itu sbab-lah mak-bapa-nya kata: "Dia chukop umor; tanya sama dia."
24Jadi kdua kali dia-orang panggil itu orang yang dhulu buta, dan kata sama dia, "Baik angkau muliakan Allah: kita tahu baik-baik dia itu satu orang berdosa."
25Sbab itu dia jawab, "'Ntah dia satu orang berdosa-kah, ta'tahu pula sahya: ada satu perkara sahya tahu, ia'itu dhulu sahya buta, skarang boleh nampak."
26Sbab itu dia-orang kata sama dia, "Apa dia sudah buat sama angkau? apa macham dia sudah chlekkan angkau punya mata?"
27Dia jawab sama dia-orang, "Bharu sahya sudah bilang sama kamu, dan kamu t'ada dngar: apa sbab kamu mau dngar lagi? mau-kah kamu pun jadi murid-murid-nya?"
28Dia-orang maki sama dia, dan kata, "Angkau-lah anak-murid-nya; kita ini murid-murid Musa.
29Kita tahu yang Allah sudah berchakap k-pada Musa, fasal dia ini kita ta'tahu 'ntah deri mana-kah dia."
30Itu orang jawab kata sama dia-orang, "Ini-lah perkara yang hairan, ia'itu kamu ta'tahu deri mana dia, dan dia sudah chlekkan sahya punya mata.
31Kita tahu yang Allah t'ada dngar orang berdosa: ttapi jikalau satu orang takot Allah dan buat dia punya kahandak, sama dia-lah Allah dngar.
32Deri asal dunia blum pernah orang dngar siapa-siapa chlekkan mata orang yang beranak buta.
33Jikalau ini orang bukan datang deri Allah, dia ta'boleh buat apa-apa."
34Dia orang jawab kata sama dia, "Angkau ini sudah jadi dalam dosa s-mata-mata, dan angkau ini-kah mau ajar sama kita?" Dan dia-orang buangkan dia.
35Isa dngar yang dia-orang sudah buangkan dia; dan bila jumpa sama dia, Isa kata, "Ada-kah angkau perchaya sama Anak Allah?"
36Dia jawab kata, "Siapa-kah dia itu, Tuan, spaya sahya boleh perchaya sama dia?"
37Isa kata sama dia, "Sudah pun angkau tengok dia, dan dia-lah yang ada berchakap sama angkau."
38Dan itu orang kata, "Ya Tuan, sahya perchaya." Dan dia smbah sama Isa.
39Dan Isa kata, "Sahya sudah masok ini dunia kerna perkara hukuman, spaya orang yang t'ada nampak boleh nampak, dan orang yang nampak boleh jadi buta."
40Orang-orang Farisi yang ada sama-sama dia dngar ini smoa, dan kata sama dia, "Kita ini pun buta-kah?"
41Isa kata sama dia-orang, "Kalau kamu buta, kamu t'ada dosa: ttapi skarang kamu bilang, 'Kita boleh nampak;' jadi kamu punya dosa ada tinggal.