Alkitab Mobile SABDA
[VER] : [BALI]     [PL]  [PB] 
 <<  1 Tawarikh 13 >> 

Peti

1Ida Sang Prabu Daud mapiguman sareng ring sakancan komandan sane ngamong prajurit siu diri miwah sane ngamong prajurit satus diri.

2Sasampune punika ida sang prabu ngandika ring wong Israele makasami sapuniki: “Yening nyama pada saadung buina yen kaledangin baan Ida Sang Hyang Widi Wasa, Widin iragane, jalan iraga ngutus utusan buat nekain nyama-nyamaan iragane ane lenan, parapandita muah wong Lewi di kotannyane suang-suang. Arahin ia ajaka makejang apanga ia pada teka paum ngajak iraga dini.

3Sasubane keto iraga lakar nyemak Peti Prajanjian Ida Sang Hyang Widi Wasa ane tusing kalinguang dugas panyeneng Ida Sang Prabu Saul.”

4Rakyate sami pada liang tur saadung ring paindikan sane kapangandikayang punika.

5Ida Sang Prabu Daud raris maumang rakyat Israele saking sakancan wewidangannyane ngawit saking wates jagat Mesire sane bedelod ngantos rauh ring margine ka Hamat sane baler, buat jaga ngingsirang Peti Prajanjiane punika saking Kiryat-Yearim ka Yerusalem.

6Ida Sang Prabu Daud miwah parawong Israele sami lunga ka kota Baala, inggih punika Kiryat-Yearim, ring wewengkon Yehuda buat ngambil Peti Prajanjian Ida Sang Hyang Widi Wasa. Petine punika kawastanin “Ida Sang Hyang Widi Wasa sane malingga ring duur malaekate”.

7Peti Prajanjiane punika kambil saking jeroan Dane Abinadab tumuli kagenahang ring kretane sane anyar. Dane Usa miwah Dane Ahio ngabih kretane punika,

8tur Ida Sang Prabu Daud miwah rakyate sami pada masolah sabecik-becikipun buat ngluihang Ida Sang Hyang Widi Wasa. Ida dane ipun pada makidung tur nyuarayang tetabuhan luire: Gong, rebab, kendang, cengceng miwah suling.

9Ritatkala ida dane rauh ring panyosohan gandum Dane Kidone, lembune sane ngedeng kretane nyauh buntutipun, tur Dane Usa digelis ngambel Peti Prajanjiane punika.

10Duk punika ugi Ida Sang Hyang Widi Wasa bendu ring Dane Usa tur dane raris kasedayang, santukan dane ngusud Peti Prajanjian punika. Irika Dane Usa seda ring ayun Ida Sang Hyang Widi Wasa.

11Punika awinanipun genahe punika kawastanin Peres-Usa rauh mangkin. Ida Sang Prabu Daud kalintang duka santukan Ida Sang Hyang Widi Wasa sampun nyisipang Dane Usa antuk pidukan Idane.

12Ida Sang Prabu Daud rumasa ajerih pisan ring Ida Sang Hyang Widi Wasa, tumuli ida ngandika sapuniki: “Kudiang tiang jani ngaba Peti Prajanjiane ene?”

13Duaning punika Ida Sang Prabu Daud tan durus makta Peti Prajanjiane punika ka Yerusalem. Nanging Peti Prajanjiane punika genahang ida ring jeron Dane Obed-Edom anak uedan kota Gat.

14Peti Prajanjiane punika magenah irika tigang sasih suenipun. Ida Sang Hyang Widi Wasa ngamertanin kulawargan Dane Obed-Edom miwah sakancan paderbeannyane.


  Share Facebook  |  Share Twitter

 <<  1 Tawarikh 13 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel