Dual PanelPacaw
1Ida Sang Prabu Daud ngwangun puri pabuat ragan idane ngraga ring Kota Daud. Ida taler nyawisang genah buat linggih Peti Prajanjian Ida Sang Hyang Widi Wasa, tur genahe punika kakereb antuk kemah.
2Ida raris ngandika sapuniki: “Tuah wong Lewi dogen ane kalugra negen Peti Prajanjiane ento, sawireh tuah ia ane kapilih baan Ida Sang Hyang Widi Wasa buat negen Peti Prajanjiane ento tur ngancangin Ida salawas-lawasne.”
3Irika Ida Sang Prabu Daud raris nauhin rakyat Israele sami mangda rauh ka Yerusalem buat jaga ngingsirang Peti Prajanjiane punika ka genah sane sampun cawisang ida.
4Sapangrarisipun, Ida Sang Prabu Daud ngesengin katurunan Dane Harun miwah wong Lewine.
5Saking suku Lewi palingsehan Dane Kehat, rauh Dane Uriel sane ngamongang anak satus kalih dasa diri saking palingsehan danene.
6Saking palingsehan Dane Merari, rauh Dane Asaya sane ngamong anak satak kalih dasa diri.
7Saking palingsehan Gerson, rauh Dane Yoel, sane ngamong anak satus tigang dasa diri.
8Saking palingsehan Elsapan, rauh Dane Semaya, sane ngamong anak satak diri.
9Saking palingsehan Hebron, rauh Dane Eliel, sane ngamong anak ulung dasa diri.
10Tur saking palingsehan Dane Usiel, rauh Dane Aminadab sane ngamong anak satus roras diri.
11Ida Sang Prabu Daud nauhin Sang Pandita Sadok miwah Pandita Abyatar kasarengin antuk wong Lewi nem diri, minakadinipun Dane Uriel, Asaya, Yoel, Semaya, Eliel miwah Dane Aminadab.
12Ida Sang Prabu Daud raris mabaos ring wong Lewi punika sapuniki: “Nah nyama ene dadi pamimpin palingsehan suku Lewine. Suciangja dewek nyamane muah wong Lewi ane bareng-bareng teken nyama, apanga nyama prasida ngaba Peti Prajanjian Ida Sang Hyang Widi Wasa, Widin wong Israele ka tongose ane suba sediaang tiang.
13Sawireh nyama tusing milu dugase ngaba Peti Prajanjiane ento ipidan, Ida Sang Hyang Widi Wasa, Widin iragane suba nyisipang iraga uli krana iraga tusing nyungsung Ida amun patutne.”
14Raris parapandita miwah wong Lewine pada nyuciang raga mangda prasida jaga ngingsirang Peti Prajanjian Ida Sang Hyang Widi Wasa, Widin Israele.
15Wong Lewi punika raris negen Peti Prajanjian Ida Sang Hyang Widi Wasa, Widin Israele, kadi pituduh Ida Sang Hyang Widi Wasa malantaran Dane Musa.
16Ida Sang Prabu raris mrentahang pamimpin-pamimpin wong Lewine mangda nyelik makudang-kudang wong Lewi buat makidung muah nyuarayang tetabuhan sane ngliangin minakadinipun, kecapi miwah cengceng.
17Saking palingsehan juru kidunge kaselik makudang-kudang anak buat nyuarayang cengceng prunggu minakadinipun: Dane Heman okan Dane Yoel, pasemetonan danene sane mapesengan Asap okan Dane Berekia miwah Dane Etan okan Dane Kusaya, saking palingsehan Dane Merari. Buat nyarengin juru kidunge punika nyuarayang rebab sane masuara jangih, kaselik makudang-kudang wong Lewi inggih punika: Dane Sakaria, Yaasiel, Semiramot, Yehiel, Uni, Eliab, Maaseya miwah Dane Benaya. Buat nyuarayang rebab sane agung suarannyane, kaselik makudang-kudang wong Lewi inggih punika: Dane Matica, Elipele, Miknea, Asasya miwah pajagaan Perhyangan Agunge kekalih inggih punika Dane Obed-Edom miwah Yeiel.
18(15:17)
19(15:17)
20(15:17)
21(15:17)
22Dane Kenanya kaselik dados pamimpin seka tabuh wong Lewine, santukan dane pascad magambel.
23Dane Berekia miwah Dane Elkana kasarengin antuk Dane Obed-Edom miwah Dane Yehia, kaselik dados pajagaan Peti Prajanjiane. Sang Pandita Sebanya, Pandita Yosapat, Pandita Netaneel, Pandita Amasai, Pandita Sakaria, Pandita Benaya miwah Pandita Elieser, kaselik dados juru ngupin trompet ring ajeng Peti Prajanjiane.
24(15:23)
Peti
25Irika Ida Sang Prabu Daud kairing antuk parapamimpin wong Israele, ping kalih parakomandan wadua balane lunga ka jeron Dane Obed-Edom buat ngambil Peti Prajanjiane, tur ida ngwentenang rerainan sane ageng.
26Ida ngaturang banteng jagiran pepitu, miwah biri-biri pepitu ring ayun Ida Sang Hyang Widi Wasa, buat majatiang mungguing Ida Sang Hyang Widi Wasa jaga ngiangin wong Lewine sane negen Peti Prajanjiane punika.
27Ida Sang Prabu Daud mabusana jubah kain lenen sane pinih becik, kadi asapunika taler juru tabuhe miwah Dane Kenanya pamimpinnyane makamiwah parawong Lewine sane negen Peti Prajanjiane. Ida Sang Prabu Daud taler nganggen kawaca epod.
28Wong Israele sami ngiringang Peti Prajanjiane ka Yerusalem sarwi masuryak maliang-liang kadulurin antuk suaran trompet, sungu, cengceng miwah kecapi.
29Ritatkala Peti Prajanjiane punika ngranjing ring kota, Ida Mikal, okan Ida Sang Prabu Saul sane istri, macingakan saking jendelane. Irika cingak ida, Ida Sang Prabu Daud sedek masolah sinambi kecag-kecog kabatek antuk ledang kayun idane. Ida Mikal rumasa seneb nyingak Ida Sang Prabu Daud kadi asapunika.