Dual PanelIda S
1I Setan mamanah ngrauhang pakewuh marep ring wong Israele. Punika awinannya, ipun ngawinang Ida Sang Prabu Daud ngardi kaputusan buat ngwentenang cacah jiwa.
2Ida Sang Prabu Daud mrentahang Dane Yoab miwah prakangge sane lianan sapuniki: “Kema jlajah gumi Israele uli di tanggunne ane besik nganteg ka tanggunne ane lenan, tur itungja rakyate. Gelah mabudi nawang akuda liunne makejang.”
3Dane Yoab tumuli matur sapuniki: “Dumadak Ida Sang Hyang Widi Wasa ngawinang wong Israele maweweh-weweh kantos ping satus, bandingang ring sane wenten mangkin. Duh ratu sang prabu, rakyate punika makasami parekan palungguh iratu. Napi awinannya palungguh iratu ngarsayang indike punika, tur ngawinang bangsane punika makasami iwang.”
4Nanging ida sang prabu maksa Dane Yoab mangda ngamargiang prentahe punika. Dane Yoab raris mamargi nylajah sakuub panegara Israele. Sasampune punika, dane raris mawali ka Yerusalem.
5Dane nguningayang ring Ida Sang Prabu Daud cacakan anake lanang-lanang sane sampun pantes medal ka payudan ring Israel wenten ajuta nanggu satus tali diri miwah ring Yehuda wenten samas pitung dasa tali diri.
6Santukan Dane Yoab nenten saadung ring titah ida sang prabu, kenginan dane nenten ngetang warga suku Lewi miwah suku Benyamine.
7Ida Sang Hyang Widi Wasa nenten pisan ledang ring paindikan sane sampun kamargiang punika. Punika awinan Ida raris nyisipang wong Israele.
8Ida Sang Prabu Daud tumuli matur ring Ida Sang Hyang Widi Wasa sapuniki: “Titiang sampun ngardi dosa sane ageng malantaran paindikan punika! Ledang Palungguh IRatu ngampurayang titiang. Titiang sampun ngardi paindikan sane kalintang nambet.”
9Sasampune punika Ida Sang Hyang Widi Wasa ngandika ring Dane Gad, nabin Ida Sang Prabu Daud, sapuniki:
10“Kema orahang teken Daud mungguing Ulun lakar nglugrain ia milih abesik uli pantaran paundukan ane tetelu ene. Encenja ane piliha, ento ane lakar laksanayang Ulun.”
11Dane Gad raris tangkil ring Ida Sang Prabu Daud, nguningayang pangandikan Ida Sang Hyang Widi Wasa punika, sarwi mataken sapuniki: “Sane encen sane jaga pilih iratu.
12Punapike sayah ageng tigang taun punapike jerih kapilayu saking wadua balan imeseh tigang sasih suenipun, punapike Ida Sang Hyang Widi Wasa ngebug iratu antuk pedang Idane tigang rahina suenipun, tur ngrauhang grubug ring panegara druene malantaran Ida ngutus malaekat Idane buat jaga mancut urip ring sakuub panegara Israele. Sapunapike pasaur iratune sane patut aturang titiang ring Ida Sang Hyang Widi Wasa?”
13Pasaur Ida Sang Prabu Daud ring Dane Gad sapuniki: “Keweh pisan manah tiange! Sakewanten tiang tan lila yen kasisipang antuk manusane. Banggayang Ida Sang Hyang Widi Wasa ngraga sane nyisipang tiang, santukan Ida maraga sih sueca.”
14Duaning punika Ida Sang Hyang Widi Wasa raris ngrauhang grubug ring rakyat Israele, mawanan rakyate padem pitung dasa tali akehipun.
15Sapanglanturipun Ida ngutus malaekat Idane buat nguugang kota Yerusaleme, nanging Ida gelis ngubah pakayunan Idane tur ngandika ring malaekate punika sapuniki: “Suud! Suba cukup amonto.” Daweg punika malaekate punika sedek ngadeg nampek ring genah panyosohan gandum Dane Arauna, wong Yebuse punika.
16Ida Sang Prabu Daud raris nyingak sang malaekat sedek ngadeg ring ambarane saha ngagem pedang sayaga jaga ngenyagang kota Yerusaleme. Irika Ida Sang Prabu Daud makamiwah parapamimpin wong Israele makasami pada ngrangsuk busana kaduhkitan raris pada sumungkem kantos prarainnyane nganteg tanah.
17Ida Sang Prabu Daud raris ngastawa sapuniki: “Duh Ratu Sang Hyang Widi Wasa wantah titiang sane ngardi iwang. Titiang sane mrentahang mangda ngamargiang cacah jiwa punika. Nanging napike iwang parakaula druene sane nista punika? Duh Ratu Sang Hyang Widi Wasa, Widin titiange, sisipangja titiang miwah kulawargan titiange, nanging luputangja kaula druene.”
18Malaekat Ida Sang Hyang Widi Wasa tumuli ngandikayang Dane Gad mangda ngaturin Ida Sang Prabu Daud rauh tur ngwangun pamorboran aturan pabuat Ida Sang Hyang Widi Wasa ring genah panyosohan gandum Dane Arauna.
19Ida Sang Prabu Daud ngiringang titah Ida Sang Hyang Widi Wasa tur ngamargiang paindikan sane kuningang antuk Dane Gad ring ida.
20Duk punika Dane Arauna miwah okan danene sareng patpat sedek nyosoh gandum ring panyosohane punika. Rikala dane nyingak malaekate punika, oka-okan danene raris malaib tur mengkeb.
21Riwau Dane Arauna nyingak Ida Sang Prabu Daud rauh, dane digelis nilar panyosohane, tumuli tangkil saha sumungkem kantos prarain danene nganteg tanah.
22Ida Sang Prabu Daud raris ngandika ring Dane Arauna sapuniki: “Baangja gelah meli tongos panyosohan pamane, apanga gelah mrasidayang ngwangun tongos pamorboran aturan pabuat Ida Sang Hyang Widi Wasa, apanga suud grubuge. Gelah lakar mayah pangajinnyane amun patutne.”
23Atur Dane Arauna sapuniki: “Duh ratu sang prabu rarisangja ambil samaliha rarisang margiang napi sane dados pakarsan palungguh iratu. Puniki wenten banteng buat anggen aturan, miwah puniki wenten papan-papan panyosohan buat anggen saang, tur puniki gandum buat anggen aturan. Puniki makasami aturang titiang ring palungguh iratu.”
24Nanging ida sang prabu ngandika asapuniki: “Edaja buka keto, gelah lakar mayah teken paman manut amun pangajinne. Gelah tusing nyak lakar ngaturang teken Ida Sang Hyang Widi Wasa aturan ane enu dadi gelah pamane, wiadin aturan ane tuara baan gelah meli.”
25Ida raris naur ring Dane Arauna tigang atak jinah mas buat naur genah panyosohane punika.
26Irika ida ngwangun pamorboran aturan buat Ida Sang Hyang Widi Wasa tur ngaturang aturan maborbor miwah aturan karahayuan. Ida raris ngastawa, tur Ida Sang Hyang Widi Wasa nagingin pangastawan idane antuk nedunang geni saking ambarane buat nunjel aturane sane ring pamorboran aturane punika.
27Ida Sang Hyang Widi Wasa ngandikayang mangda sang malaekat ngenahang pedangnyane, tur malaekate punika ngiringang pangandikan Idane.
28Ida Sang Prabu Daud wikan mungguing malantaran antuk punika Ida Sang Hyang Widi Wasa nagingin pangastawan idane. Duaning punika ida tumuli ngaturang aturan ring pamorboran aturane ring genah panyosohan Dane Arauna punika.
29Duk punika Kemah Linggih Ida Sang Hyang Widi Wasa sane kakardi antuk Dane Musa ring tegal melakange miwah pamorboran aturan genah morbor aturane, kantun magenah ring genah pangubaktine ring Gibeon.
30Nanging Ida Sang Prabu Daud tan mrasidayang lunga mrika ngaturang bakti ring Ida Sang Hyang Widi Wasa, santukan ida ajerih ring pedang malaekat Ida Sang Hyang Widi Wasa.