Dual PanelDane
1Kacrita ring jagat Us, wenten anak lanang mapesengan Ayub, sane nyungsung Ida Sang Hyang Widi Wasa saha astiti bakti ring Ida. Dane kalintang sadu, jujur miwah tan naen malaksana dursila.
2Dane madue oka lanang-lanang pitung diri miwah oka istri tigang diri.
3Dane taler madue biri-biri pitung tali, unta tigang tali, banteng siu miwah keledae limang atus ukud. Dane taler madue parekan akeh pisan. Dane punika dados anak sane pinih sugih ring jagate kangin.
4Okan Dane Ayub sane lanang-lanang madue kabiasaan ngwentenang pepestan magilir ring genahnyane suang-suang, tur rikala punika semeton-semetonnyane sane istri taler pada kaundang sareng-sareng mapesta irika.
5Sabilang wusan pestane punika, benjangne pasemengan Dane Ayub sampun matangi, tur ngaturang aturan ring ayun Ida Sang Hyang Widi Wasa, pabuat okan danene suang-suang, buat nyuciang oka-okan danene punika. Dane setata ngamargiang indike punika, santukan kapakayun antuk dane, menawita wenten salah tunggil oka-okan danene sane ngardi dosa, malantaran nenten nyelapang nganistayang parab Ida Sang Hyang Widi Wasa.
6Rikala sampun masanipun parawadua balan Ida Sang Hyang Widi Wasa pada umedek tangkil ring ayun Idane, Ratun Setane taler sareng-sareng pedek tangkil irika.
7Irika Ida Sang Hyang Widi Wasa tumuli mataken ring ipun sapuniki: “Kita teka uli dija?” Ratun Setane raris masaur sapuniki: “Titiang sampun nglelana nylajah mrecapadane makasami.”
8Ida Sang Hyang Widi Wasa malih mataken sapuniki: “Apake kita nepukin parekan Ulune I Ayub? Di gumine tusing ada anak ane astiti bakti muah sadu buka ia. Ia astiti bakti teken Ulun tur ia tusing taen malaksana dursila.”
9Ratun Setane raris matur sapuniki: “Punapike I Ayub jaga astiti bakti ring Palungguh IRatu, yening ipun nenten molih punapa-punapi saking Palungguh IRatu?
10Palungguh IRatu tansah nyayubin ipun, kulawarganipune miwah saananing paderbeanipune. Palungguh IRatu ngamertanin saparilaksanan ipune, tur Palungguh IRatu sampun mapaica ingon-ingon akeh pisan ring ipun, kantos ngebekin jagate punika.
11Nanging sane mangkin yening Palungguh IRatu ngaonang saananing paderbeanipune, menawita ipun jaga nemah Palungguh IRatu ring ayun Palungguh IRatu.”
12Ida Sang Hyang Widi Wasa ngandika ring Ratun Setane, sapuniki: “Nah sakancan pagelahan I Ayube serahang Ulun teken kita, nanging eda pesan kita nyakitin ia.” Sasampune punika Ratun Setane raris mapamit saking ayun Ida Sang Hyang Widi Wasa.
Oka-o
13Sedek rahina anu, ritatkala paraputran Dane Ayub sedekan mapesta ring genah rakan danene sane pinih duur,
14jeg wenten utusan rauh malaib-laib, matur piuning ring Dane Ayub, kadi asapuniki: “Titiang sedekan nenggala ring tegale nganggen banteng, tur keledae-keledaene pada kangonang ring pategalane sane ring samping titiange nenggala.
15Tan dumade jeg wenten wong Seba rauh ngebug tur ngrampas keledae-keledaene miwah bantenge punika makasami. Parekan druene makasami kapademang, sajawining titiang newek. Wantah titiang newek sane luput, mawinan titiang mrasidayang matur piuning ring pamekele.”
16Durung puput ipun matur, saget wenten parekan lianan rauh tur matur piuning kadi asapuniki: “Biri-biri druene miwah pangangon-pangangonnyane sami telas padem sander krebek. Wantah titiang newek sane kantun luput, mawinan titiang mrasidayang matur piuning ring pamekele.”
17Durung puput ipun matur, jeg wenten malih parekan lianan rauh, tur matur piuning sapuniki: “Wenten wong Kasdim sareng tigang pasukan rauh ngebug titiang tur ngrampas unta-unta druene makasami. Sajawining titiang newek, parekan-parekan druene makasami pademang ipun. Wantah titiang sane kantun urip, mawinan titiang mrasidayang nguningayang ring pamekele.”
18Durung puput ipun matur, jeg wenten malih parekan lianan rauh tur matur piuning, sapuniki: “Risedek oka-okan pamekele pada mapesta ring okan pamekele sane pinih duura,
19jeg wenten angin ribut mampeh saking tegal melakange. Angine punika nempuh jeroan genah oka-okan pamekele punika ngantos bah mabriug, tur oka-okan pamekele seda makasami. Wantah titiang sane luput, mawinan titiang mrasidayang nguningayang ring pamekele.”
20Riwau mireng indike punika makasami, Dane Ayub rumasa kalintang duhkita ring kayun. Dane raris ngadeg tur nyeset busanan danene. Dane raris ngundul prabun danene, tumuli nylempoh ring tanahe saha ngaturang sembah.
21Dane maucap-ucap sapuniki: “Tiang lekad malalung, tiang masih lakar mati malalung. Ida Sang Hyang Widi Wasa ane suba mapaica teken tiang, ane jani Ida ane ngambil. Pujija parab Idane!”
22Ring sajeroning paindikane punika makasami, Dane Ayub nenten pisan ngardi dosa, malantaran nyelsel tur nalih Ida Sang Hyang Widi Wasa ngamargiang paindikan sane kirang patut marep ring ragan danene.