Dual PanelIndik
1Ida Sang Hyang Widi Wasa masabda ring Dane Musa, sapuniki:
2“Tundenja bangsa Israele mesuang tungked roras besik. Asing-asing pamimpin suku mesuang tungked abesik. Asing-asing tungkede ento apanga katulisin adan pamimpin sukune ento suang-suang,
3tur adan Harune tulis sig tungkede ane dadi wakil suku Lewine. Sabilang pamimpin sukune ento apang ada tungkedne abesik.
4Aba tungked-tungkede ento ka Kemah Linggih Ulune tur pejangja di arepan Peti Prajanjiane, di tongos Ulune matemu teken kita.
5Tungked anake ane selik Ulun ento lakar maseen. Aketo caran Ulune lakar nyuudang pakrimik jalmane ane sing rerenan pakrengkeng nglawan kita.”
6Indike punika raris karauhang antuk Dane Musa ring bangsa Israele. Duaning punika parapamimpinnyane raris pada nyerahang tungked pada masiki ring Dane Musa, sabilang suku wenten tungkednyane asiki. Makasami akehipun wenten roras, tur ring pantarannyane wenten teteken Dane Harun.
7Sasampune punika, tungkede punika raris kagenahang antuk Dane Musa ring Kemah Linggih Ida Sang Hyang Widi Wasa, ring ajeng Peti Prajanjiane.
8Benjangne rikala Dane Musa ngranjing ka Kemahe punika, cingak dane mungguing teteken Dane Harun, sane dados wakil saking suku Lewi, sampun maseen. Tetekene punika sampun mapusuh, masekar tur ngwetuang woh ketapang sane sampun wayah.
9Dane Musa raris ngambil tungkede punika makasami, tumuli kedengang ring bangsa Israele. Ipun sareng sami ngeton paindikan sane sampun mamargi punika. Irika parapamimpine tumuli pada ngambil tungkednyane suang-suang.
10Sasampune punika Ida Sang Hyang Widi Wasa tumuli ngandika ring Dane Musa kadi asapuniki: “Pejangja buin tungked Harune ento ditu di arepan Peti Prajanjiane. Tungkede ento patut kasimpen, makadadi painget buat wong Israele ane demen brontak ento, mungguing ia lakar mati yening ia tusing nyak suud ngrengkeng.”
11Dane Musa raris nglaksanayang sakancan titah Ida Sang Hyang Widi Wasa punika.
12Bangsa Israele raris matur ring Dane Musa, sapuniki: “Yening kadi asapunika, sengkala pisan titiang sareng sami.
13Yening anake sane nganampekin Kemah Linggih Ida Sang Hyang Widi Wasa patut padem, punika mapiteges iraga sareng sami tan urungan pacang padem!”