Dual PanelRatun
1Bangsa Israele raris nglanturang pamargi, tumuli ngwangun kemahnyane ring tanahe dangsah ring Moab dangin Tukad Yordane benengan kota Yerikone.
2Rikala ratune ring Moab sane maparab Balak, okan Ida Sipor, mireng indik wong Israele ngaonang wong Amorine, samaliha indik akehipun wong Israel punika,
3ida miwah kaulan idane pada ajerih pisan.
4Irika wong Moabe raris matur ring parapamimpin wong Midiane, sapuniki: “Grombolane puniki, tanja malih amunapi suenipun, jaga nyirnayang saananing sane wenten ring kiwa tengennyane, tan bina sakadi bantenge neda padang ring tegale.” Duaning punika Ida Sang Prabu Balak,
5ngutus buat ngaturin Dane Bileam, okan Dane Beor, sane malinggih ring kota Petor, sane nampek ring Tukad Eprate, ring wewidangan Amau. Parautusane punika nguningayang sapangandikan Sang Prabu Balake ring Dane Bileam, sapuniki: “Mangda guru sauninga, mungguing sane mangkin wenten satunggiling bangsa rauh saking Mesir. Jadmanipune pada pasrambiah mrika-mriki, tur indike punika makadados pakewuh pabuat wewidangan tiange.
6Ipun akehan ring tiang. Duaning punika ledang guru rauh tur temahja ipun pabuat tiang. Menawite tiang mrasidayang ngaonang tur ngulah ipun saking panegaran tiange. Tiang pracaya, mungguing yen guru ngamertanin anak, anake punika jaga molih merta, tur yen guru nemah, ipun jaga keni temah.”
7Irika parapamimpin wong Moab miwah Midiane mamargi tangkil ring Dane Bileam, saha maduluran aturan mangda dane ledang nemah wong Israele. Parapamimpine punika raris rauh tur nguningayang pangandikan Sang Prabu Balak ring Dane Bileam.
8Pangandikan Dane Bileam ring parapamimpine punika sapuniki: “Rarisangja marerepan iriki. Benjang tiang jaga nguningayang ring ragane, indik sane jaga kapangandikayang antuk Ida Sang Hyang Widi Wasa ring tiang.” Irika parapamimpine punika marerepan ring jeron Dane Bileam.
9Ida Sang Hyang Widi Wasa tumuli ngrauhin Dane Bileam sarwi mataken sapuniki: “Ih Bileam nyenke jlemane ene ane nginep sig kitane?”
10Atur Dane Bileam asapuniki: “Jadmane punika utusan Sang Prabu Balak, saking panegara Moab, gumanti jagi ngrauhang orti,
11mungguing wenten satunggiling bangsa sane rauh saking Mesir sampun pasrambiah ring wewidangan panegaran idane. Sang Prabu Balak ngarsayang titiang, mangda titiang nemah bangsane punika pabuat ida, mangda ida mrasidayang ngebug tur ngulah bangsane punika.”
12Pangandikan Ida Sang Hyang Widi Wasa ring Dane Bileam, sapuniki: “Edaja kita nututin anake ento, muah eda kita nemah wong Israele ento, sawireh bangsane ento suba mertanin Ulun.”
13Benjangipun, Dane Bileam raris matemu ring utusan-utusan Sang Prabu Balake punika, sarwi mabaos sapuniki: “Rarisangja mamargi mantuk. Ida Sang Hyang Widi Wasa nenten nglugrain tiang ngiringang ragane.”
14Duaning punika parautusane punika tumuli mamargi mawali tangkil ring Sang Prabu Balak, tur nguningayang ring ida, mungguing Dane Bileam nenten kayun rauh sinarengan ring ipun.
15Sasampune punika Sang Prabu Balak malih ngutus anak akehan ring sane dumun, samaliha linggihnyane taler luihan ring sane riin.
16Parautusane punika tangkil ring Dane Bileam, saha nguningayang pangandikan Sang Prabu Balake, sapuniki: “Saking sarat pisan pinunas tiange, mangda ledang udi guru ngrauhin tiang.
17Tiang jaga maturan akeh pisan ring guru, samaliha tiang jaga nglaksanayang pangandikan gurune. Rarisangja rauh tur nemah bangsane punika pabuat tiang.”
18Nanging atur Dane Bileam sapuniki: “Yadiastun sakancan mas perak sane wenten ring purin Ida Sang Prabu Balake punika kapaicayang ring tiang, tiang nenten pisan mrasidayang tempal ring titah Ida Sang Hyang Widi Wasa, Widi sane sungsung tiang. Yadiastun sajeroning paindikan sane pinih alit, tiang taler tan purun tempal ring Ida.
19Nanging indayang ragane marerepan dumun iriki, sakadi indike sane kamargiang antuk semeton ragane sane riin. Tiang meled uning, punapike wenten paindikan sane lian, sane jaga kapangandikayang antuk Ida Sang Hyang Widi Wasa ring tiang.”
20Wengine punika Ida Sang Hyang Widi Wasa ngrauhin Dane Bileam, sarwi masabda, sapuniki: “Jalmane ene teka buat ngajak kita apanga kita nututin ia. Wireh keto kinkinangja iban kitane lakar luas. Nanging kita patut nglaksanayang apa ane suba titahang Ulun teken kita.”
21Benjangne Dane Bileam tumuli masang kedapa ring keledaen danene, tumuli lunga nyarengin parapamimpin wong Moabe punika.
Dane
22Rikala Dane Bileam mamargi, Ida Sang Hyang Widi Wasa duka pisan. Duaning punika rikala Dane Bileam nunggang keledaen danene, kairing antuk parekan danene sareng kalih, malaekat Idang Sang Hyang Widi Wasa tumuli ngadeg ring basan tengah margine, ngalang-alangin pamargin danene.
23Rikala keledaene ngeton wenten malaekat ngadeg nganggar pedang ring basan tengah margine, keledaene punika raris nyamping saking margine, tumuli mabelok ka tegale. Dane Bileam tumuli nigtig keledaen danene punika, tur kabakta malih ka margine.
24Sasampune punika malaekat Ida Sang Hyang Widi Wasa tumuli ngadeg ring margine sane cupit, ring selagan abian anggure sane matembok batu sabilang samping.
25Rikala keledaene punika ngeton malaekat Ida Sang Hyang Widi Wasa, irika ipun mepet ka samping ngantos cokor Dane Bileam kajepit ring temboke. Duaning punika Dane Bileam malih nigtig keledaene punika.
26Malaekat Ida Sang Hyang Widi Wasa tumuli malih ngarepang, tur ngadeg ring genahe sane cupitan, kantos nenten wenten margi malih ring kiwa tengennyane.
27Duk punika rikala keledaene punika ngeton malaekat Ida Sang Hyang Widi Wasa, keledaene punika raris ngebahang dewekipune. Dane Bileam kalintang duka, kantos keledaene punika lempag dane antuk tungked.
28Ida Sang Hyang Widi Wasa raris mapaica karirihan ring keledaene punika mangda mrasidayang mabaos. Duaning punika keledaene punika raris mabaos ring Dane Bileam sapuniki: “Napike iwang titiange ring pamekele, mawanan pamekele nglempag titiang kantos ping tiga?”
29Pasaur Dane Bileam, sapuniki: “Sawireh iba mlegendahang kai. Yen kai ngaba pedang, sinah iba matiang kai.”
30Atur keledaene punika sapuniki: “Boyake titiang puniki sampun sue pisan dados padruen pamekele tur sampun biasa linggihin pamekele? Punapike titiang naenin tempal ring pamekele?” Pasaur Dane Bileam: “Tusing.”
31Ida Sang Hyang Widi Wasa tumuli ngawinang Dane Bileam mrasidayang ngaksi malaekat Ida Sang Hyang Widi Wasa ngambel pedang membus irika. Irika Dane Bileam raris nylempoh tur makakeb sarwi nyumbah.
32Malaekat Ida Sang Hyang Widi Wasa raris mataken, sapuniki: “Ngudiang dadi kita nglempag keledaen kitane kanti ping telu? Manira teka ene buat ngalang-alangin kita, sawireh patutne kita tusing dadi kema.
33Aget keledaen kitane nepukin manira, tur ia nyamping kanti ping telu. Yen tusing keto, sinah kita suba matiang manira, nanging keledaene depang manira idup.”
34Atur Dane Bileam, sapuniki: “Titiang puniki sampun madosa, titiang nenten uning, mungguing IRatu ngadeg ring basan tengah margine, buat ngalang-alangin titiang. Nanging sane mangkin yen manut pakayunan IRatu titiang iwang buat nglanturang pamargin titiange, titiang jaga mawali.”
35Nanging malaekat Ida Sang Hyang Widi Wasa raris ngandika sapuniki: “Tututin dogen anake ento, nanging tuah ane tunden manira ngorahang dogen ane dadi orahang kita.” Dane Bileam tumuli nglanturang pamargin danene sinarengan ring parautusan Sang Prabu Balake punika.
Sang
36Ritatkala Sang Prabu Balak mireng mungguing Dane Bileam jaga rauh, ida raris lunga mendakin Dane Bileam ring Ar, satunggiling kota sane wenten ring sisin Tukad Arnone, ring tepi siring wewidangan Moabe.
37Pangandikan sang prabu ring Dane Bileam sapuniki: “Punapi awinan guru nenten kayun rauh ritatkala tiang ngaturin guru sane pangawit? Punapike guru mitaenang tiang nenten mrasidayang ngaturin guru pikolih sane cukup?”
38Atur Dane Bileam sapuniki: “Boyake sane mangkin titiang sampun rauh? Nanging titiang nenten wenang maosang punapa-punapi, sajawining sane kapangandikayang antuk Ida Sang Hyang Widi Wasa ring titiang.”
39Duaning punika Dane Bileam raris lunga ka kota Husot, kasarengin antuk Sang Prabu Balak.
40Irika Ida Sang Prabu Balak nampah banteng miwah biri-biri, tur ulam sane apahan katurin Dane Bileam miwah parapamimpin sane nyarengin dane punika.
Ramal
41Benjang semengnyane Sang Prabu Balak tumuli ngajak Dane Bileam munggah ka bukit Bamot Baal. Saking genahe punika Dane Bileam mrasidayang nyingak bangsa Israel punika abagian.