Dual Panel1Dane Bileam tumuli matur ring Sang Prabu Balak, sapuniki: “Karyanang titiang iriki pamorboran aturan pepitu, tur baktayang titiang mriki banteng jagiran pepitu miwah biri-biri muani pepitu.”
2Ida Sang Prabu Balak raris nglaksanayang sakadi atur Dane Bileam. Ida miwah Dane Bileam raris ngaturang banteng jagiran asiki miwah biri-biri muani asiki, ring sabilang pamorboran aturane punika.
3Sasampune punika Dane Bileam tumuli matur ring Ida Sang Prabu Balak sapuniki: “Rarisang ngadeg iriki nampek ring aturan druene. Titiang jaga mapamit ajebos buat natasang punapike Ida Sang Hyang Widi Wasa jaga ledang ngrauhin titiang punapike nenten. Titiang jaga nguningayang ring palungguh iratu, sakancan sane katitahang antuk Ida Sang Hyang Widi Wasa ring titiang.” Dane Bileam raris lunga kasalah tunggiling pucak bukite praragayan.
4Irika Ida Sang Hyang Widi Wasa ngrauhin dane. Dane tumuli matur ring Ida Sang Hyang Widi Wasa sapuniki: “Duh Ratu Sang Hyang Widi wasa, titiang sampun ngwangun pamorboran aturan pepitu, tur sampun ngaturang banteng jagiran asiki miwah biri-biri muani asiki, ring sabilang pamorboran aturane punika.”
5Sasampune punika Ida Sang Hyang Widi Wasa raris masabda ring Dane Bileam indik sane patut ucapang dane, tur dane kapangandikayang mawali ring genah Sang Prabu Balake, buat nguningayang sapangandikan Ida Sang Hyang Widi Wasa ring ida.
6Dane Bileam tumuli mawali, tur cingak dane Ida Sang Prabu Balak kantun ngadeg nampek ring aturan idane sane maborbor kasarengin antuk pamimpin Moabe makasami.
7Dane Bileam raris nguncarang ramalan danene kadi asapuniki: “Saking Aram, saking pagunungane sane bedangin, Sang Prabu Balak ratune ring Moab ngesengin titiang sapuniki: ‘Mrikija tur mabaosja buat tiang. Temahja bangsa Israele puniki.’
8Punapike titiang mrasidayang nemah ipun, yening Ida Sang Hyang Widi Wasa nenten nemah ipun? Punapike titiang mrasidayang ngukum ipun, yening Ida Sang Hyang Widi Wasa nenten nyisipang ipun?
9Saking gununge sane tegeh-tegeh, bangsane punika sampun kanten, titiang ngeton ipun, saking pucak bukit-bukite. Ipun uning mungguing ipun kamertanin, tan wenten bangsa lianan sane nyamenin ipun.
10Katurunan Israele tan bina sakadi abu, tan keni winilang akehipune. Duh Ratu Sang Hyang Widi Wasa, dumadak titiang kalugra muputang urip titiange sakadi sinalih tunggal kaula druene, lugrainja titiang padem sajeroning sutrepti sakadi anake sane patut.”
11Irika Ida Sang Prabu Balak raris ngandika ring Dane Bileam, sapuniki: “Napi sane karyanin guru pabuat tiang puniki? Guru iring tiang mriki buat jaga nemah meseh-meseh tiange, nanging jeg ngamertanin meseh-meseh tiange punika.”
12Atur Dane Bileam sapuniki: “Titiang wantah mrasidayang maosang paindikan sane kapangandikayang antuk Ida Sang Hyang Widi Wasa.”
Ramal
13Sang Prabu Balak raris ngandika ring Dane Bileam, sapuniki: “Ngiringja ka genahe sane lianan, saking irika guru mrasidayang ngaksi bangsa Israele punika wantah abagian kewanten. Rarisang temah ipun saking irika.”
14Sang Prabu Balak raris ngajak Dane Bileam ka tegal Sopime ring pucak Gunung Pisgane. Irika taler dane ngwangun pamorboran aturan pepitu, tur ngaturang banteng jagiran asiki miwah biri-biri muani asiki ring sabilang pamorboran aturane punika.
15Dane Bileam raris matur ring Sang Prabu Balak sapuniki: “Rarisang iratu ngadeg iriki, ring samping aturan druene, tur titiang jaga nangkil ring ajeng Ida Sang Hyang Widi Wasa irika.”
16Ida Sang Hyang Widi Wasa tumuli ngrauhin Dane Bileam, sarwi ngandikayang indik sane patut ucapang dane, tur dane kapangandikayang mawali ring Sang Prabu Balak buat ngrauhang pangandikan Idane.
17Irika Dane Bileam raris mawali, tur cingak dane Sang Prabu Balak kantun ngadeg ring samping aturan idane, kasarengin antuk parapamimpin Moabe. Ida Sang Prabu Balak tumuli nakenang indik sane kapangandikayang antuk Ida Sang Hyang Widi Wasa.
18Irika Dane Bileam nguncarang ramalan danene sapuniki: “Duh Sang Prabu Balak okan Ida Sipor, rarisangja mriki, wenten sane jaga uningayang titiang, rarisangja pirengang.
19Ida Sang Hyang Widi Wasa punika nenten pateh sakadi manusa sane demen mobab, sane pepinehnyane onyah-anyih. Yening Ida Sang Hyang Widi Wasa sampun majanji, pasti pacang dagingin Ida. Yening Ida ngandika, punika pasti jaga kalaksanayang.
20Titiang kapangandikayang mangda ngamertanin. Tur yen Ida Sang Hyang Widi Wasa ngamertanin, titiang nenten jaga mrasidayang ngurungang.
21Indik kawentenan bangsa Israele sane jaga rauh, sampun kanten antuk titiang wiakti jaya, tur tan keneng bencana wiadin grubug. Ida Sang Hyang Widi Wasa punika Widinnyane, Kijaja pamarginipune, Ida tansah nyarengin ipun. Ipun setata nglumbrahang mungguing Ida punika, makadados Ratunipune.
22Ida Sang Hyang Widi Wasa makta ipun medal saking Mesir. Ida mayuda ngentosin ipun, waluya sakadi banteng alasane.
23Pangiwa wiadin kasaktian, nenten wenten sane mrasidayang nglawan bangsa Israele. Bangsane punika jaga kabinawa, tur pakardin Ida Sang Hyang Widi Wasa marep ring bangsa Israele wiakti ngangobin.
24Bangsa Israele waluya sakadi singa sane kuat. Musuhnyane kasagrep, getihipune kaceret. Sadurung sakadi asapunika, ipun nenten jaga mararian.”
25Ida Sang Prabu Balak raris ngandika ring Dane Bileam, kadi asapuniki: “Puputang rauh irika! Yening guru nenten kayun nemah bangsa Israele, sampunangja guru ngamertanin ipun.”
26Atur Dane Bileam sapuniki: “Boyake titiang sampun nguningayang ring palungguh iratu, mungguing titiang wantah nglaksanayang sane katitahang antuk Ida Sang Hyang Widi Wasa ring titiang.”
Ramal
27Sang Prabu Balak tumuli ngandika, sapuniki: “Ngiringja iraga ka genahe sane lianan. Menawita Ida Sang Hyang Widi Wasa ledang nglugrain guru nemah bangsa Israele punika pabuat tiang, saking genahe punika.”
28Irika Dane Bileam raris kajak ka pucak Gunung Peore, sane marep ka tegal melakange.
29Dane Bileam tumuli matur ring Sang Prabu Balak, sapuniki: “Rarisang wangun pamorboran aturan pepitu iriki, tur baktaang titiang mriki banteng jagiran pepitu miwah biri-biri muani pepitu.”
30Ida Sang Prabu Balak raris nglaksanayang sakadi atur Dane Bileam punika. Ida ngaturang banteng jagiran asiki, miwah biri-biri muani asiki ring sabilang pamorboran aturane punika.