Dual PanelKota-
1Ring tanahe sane dangsah ring Moab, nampek ring Tukad Yordane, marep-arepan ring kota Yerikone, Ida Sang Hyang Widi Wasa ngandika ring Dane Musa sapuniki:
2“Tekedang teken wong Israele, mungguing uli tanah waris ane tampina ento, makudang-kudang kota muah tegalan ane di kiwa tengen kotane ento patut kaserahang pabuat wong Lewi, apanga wong Lewine ento nyidayang nongos ditu.
3Kota-kotane ento lakar dadi gelah wong Lewi, buat dadi tongosne magumana. Tegalan ane di kiwa tengennyane dadi tongos ubuh-ubuhan muah wewalungannyane ane lenan.
4Tegalan ento linggahne 450 meter milehan kukur uli tembok kotane ento.
5Dadinne tongos wong Lewine ento mrepat, sisine suang-suang malantang 900 meter tur kotanne ento dibasa tengahne.
6Wong Lewine ento patut masih baang kita kota pasayuban nemnem, makadadi pasayuban buat anake ane tusing nyelapang ngamatiang anak. Sasubane keto wong Lewine patut masih baang kota-kota ane lenan petang dasa dadua liunne,
7kayang tegalannyane. Dadinne ada kota petang dasa kutus liunne ane kaserahang pabuat wong Lewine ento.
8Liun kota-kotan wong Lewine sig wewidangan suku Israele suang-suang, patut kapastiang manut linggah wiadin cupit wewidangane ento.”
Kota-
9Ida Sang Hyang Widi Wasa ngandikayang Dane Musa,
10mangda dane ngrauhang ring bangsa Israele, titah-titah sane kadi asapuniki: “Sasubane kita ngliwatin Tukad Yordane tur ngaug gumi Kanaane,
11kita patut netepang kota-kota pasayuban apanga anake ane tusing nyelapang ngamatiang anak, nyidayang malaib kema.
12Di kotane ento anake ento lakar luput uli kadang wargan anake ane mati, ane makeneh ngwirangang anake ane mati ento. Sawireh anake ane kadalih ngamatiang anak len, tusing dadi tibakin ukuman mati, yen prakarannyane tonden katureksain baan pangadilan di arepan anake liu.
13Kita patut mastiang kota nemnem,
14nah ento dangin Tukad Yordane tetelu, di tanah Kanaan tetelu.
15Kota-kotane ento lakar dadi pasayuban bangsa Israel muah wong sunantara ane nongos di pantaran kitane, yadian akejep wiadin tetep. Nyenja tusing nyelapang ngamatiang anak, ia dadi malaib ka salah tunggal kotane ento.
16Nanging yen ada anak ngamatiang anak aji sanjata besi wiadin batu muah kayu, anake ento kadanin pelih sawireh ia ngamatiang anak. Duaning keto ia patut kukum mati.
17(35:16)
18(35:16)
19Kadang wargan sang mati ane ulihan purusa ento ane patut nglaksanayang ukuman matine ento. Yen anake ane ngamatiang ento bakatanga, kadang wargannyane patut ngamatiang anake ento.
20Yen ada anak ane geting teken anak, lantas ia ngamatiang anake ento malantaran mantigang wiadin nimpug ia aji satunggaling barang,
21wiadin nyagur anake ento, anake ento kadanin salah ngamatiang, sawireh keto ia patut kukum mati. Kadang wargan sang mati ane ulihan purusa ane patut nyalanang ukuman matine ento. Yening anake ane ngamatiang ento tepukina, ia ane patut ngamatiang anake ento.
22Yen pet ada anak tusing nyelapang ngamatiang anak ane tuara gedeganga, upamane aji mantigang anake ento, wiadin ulihan nimpug aji satunggaling barang,
23wiadin ada anak ulihan tusing ningalin ngulungang batu ane ngranayang mati anake lenan ento, ane tuara dadi musuhne, tur ia mula tusing makeneh nyengkalen anake ento.
24Sajeroning paundukane ane buka keto ento, rakyate patut ngilonin anake ane ngranayang anake mati ento, tur tusingja ngilonin nyaman sang mati, ane makeneh ngwirangang sang mati ento.
25Anake ane tusing nyelapang ngamatiang anak len, patut kasayubin baan rakyate uli panyengkalen nyaman anake ane mati. Anake ento patut kajak mabalik ka kota pasayubane, tongos iane masayuban. Ditu ia patut nongos kanti Sang Pandita Agung ane madeg pandita dugase ento mati. Suud keto mara ia dadi malipetan mulih. Nanging dipradene ia makaad uli kota pasayuban tongosnyane ngelidang awak, laut bakatanga tur matianga baan nyaman sang mati, dadinne laksanan anake ane ngawinang matin sang mati ento tusing dadi kadanin ngamatiang anak.
26(35:25)
27(35:25)
28(35:25)
29Pidabdabe ene manggeh buat kita muah katurunan kitane, dijaja kita nongos.
30Sajeroning prakara ngamatiang anak, anak ane kadalih ngamatiang anak, tuah nyidayang kadanin pelih, tur kukum mati, yen laksanannyane nyidayang kasaksinin baan saksi dadua wiadin lebihan teken ento. Saksine aukud tusing cukup buat nyaksinin mungguing dedalihannyane ento amun sasajaane.
31Anak ane ngamatiang anak patut kukum mati. Anake ento tusing dadi nebus ukumane ento aji pipis.
32Yen ada anak ngluputang dewek ka salah tunggal kota pasayubane ento, satonden Sang Pandita Agung mati, eda pesan baanga mulih malantaran ia nebus aji pipis.
33Yen kita nyak nampi pipise ento, kita lakar ngletehin tanah ane tongosin kita. Unduk ngamatiang anak ento ngletehin gumi. Dadinne tusing ada cara ane patut anggon mresihin gumine ento sajabaning mancut urip anake ane ngamatiang anak ento.
34Edaja kita ngletehin tanah ane tongosin kita, sawireh Ulun ene Sang Hyang Widi Wasa tur Ulun malingga di pantaran bangsa Israele.”