Dual PanelIndik
1Meseh-meseh wong Yehudane miwah wong Benyamine miragi mungguing anake sane mawali saking paselongan punika sedekan ngwangun Perhyangan Ida Sang Hyang Widi Wasa, Widin Israele.
2Duaning punika ipun pada rauh ring Dane Serubabel miwah parapanglingsir kulawargane, maduluran baos sapuniki: “Ajakja tiang sareng ngwangun Perhyangan Agunge punika, duaning tiang taler nyungsung Widin semetone, pateh sakadi semeton. Sajaba punika, tiang mula setata ngaturang aturan ring Ida, ngawit saking daweg Ida Sang Prabu Esar-Hadon, ratun panegara Asure ngisidang tiang mriki.”
3Nanging Dane Serubabel, Dane Yosua miwah parapanglingsir kulawargan bangsa Israele mabaos ring ipun sapuniki: “Buat ngwangun Perhyangan Agung Ida Sang Hyang Widi Wasa, Widin tiange, tiang durung muatang pitulungan semetone. Puput wantah tiang kewanten sane pacang ngwangun satinut ring prentah Ida Sang Prabu Kores ratun panegara Persiane ring tiang.”
4Irika jadma uedane punika ngusahayang mangda wong Yehudane mamanah wusan ngwangun tur ajerih makarya.
5Malahan sapanyeneng Ida Sang Prabu Kores madeg ratu ring Persia kantos rauh masan panyeneng Ida Sang Prabu Darius madeg ratu ring panegara Persia, ipun pada ngangsok parapajabat pamrentah Persiane mangda nglawan wong Yehudane tur ngurungang rencanannyane punika.
Indik
6Duk Ida Sang Prabu Ahasweros ngawit jumeneng ratu, jadma uedane irika raris nulis surat sane dagingipun nalih anake sane sampun jenek ring Yehuda miwah ring Yerusalem punika.
7Kadi asapunika taler rikala Ida Sang Prabu Artahsasta jumeneng ratu, Dane Bislam, Mitredat, Tabeel miwah parakantinnyane sane tiosan, ngaturang surat ring Ida Sang Prabu Artahsasta, ratun panegara Persiane. Surate punika nganggen basa Aram, tur patut kasalin rikala kawacen.
8Kadi asapunika taler Gubernur Rehum miwah Dane Simsai sekretaris daerahe sampun ngaturang surat ring Ida Sang Prabu Artahsasta, ngeniang indik kota Yerusaleme.
9Saking Gubernur Rehum miwah Simsai sekretaris daerahe miwah saking timpal-timpalnyane inggih punika parahakim miwah saking sakancan pegawe sane tiosan sane pecak kawitipun saking Erek, Babel miwah Susan sane ring tanah Elam,
10kasarengin antuk rakyate sane lianan, sane pecak kakisidang saking panegarannyane suang-suang antuk Ida Sang Prabu Asnapar Sane Agung tur kagenahang ring kota Samaria miwah ring wewidangan-wewidangan sane tiosan ring dauh Tukad Eprate.
11Sapuniki daging surate punika: “Katur ring ayun Ida Sang Prabu Artahsasta, saking paraparekan iratune jadma sane magenah ring dauh Tukad Eprate.
12Titiang matur piuning ring palungguh iratu mungguing wong Yahudi sane sampun kesah saking ayun palungguh iratune tur ngungsi genah titiange, ipun sami sampun pada rauh ring Yerusalem. Sane mangkin ipun sedek ngwangun malih kota sane duraka miwah jaat punika. Ipun sampun makarya dasar miwah ngwangun temboknyane tur digelis pacang muputang pakaryane punika.
13Mangda palungguh iratu sauninga, mungguing yening kotane punika sampun kawangun tur tembok-temboknyane sami sampun puput, ipun nenten pacang nyak malih naur pajeg, upeti miwah bea cukai. Pamuputipun, indike punika pacang ngawinang tuna jinah upeti druene.
14Sane mangkin santukan titiang maderbe tetegenan pamantuka ring palungguh iratu, titiang nenten pisan liang yening iratu keni bencana. Duaning punika, titiang ngutus utusan buat matur piuning ring iratu,
15mangda iratu ledang nureksain ring cakepan babad paraleluur iratune. Ring cakepane punika iratu pacang manggihin tur wikan, mungguing kotane punika kota sane nguni tansah dura cara, ngawinang kamewehan ring pararatu miwah parapamrentah propinsine. Jadmane ring kotane punika setata meweh antuk mrentah. Punika awinanipun kotane punika kuugang.
16Duaning punika titiang matur piuning ring iratu, mungguing yening kotane punika sampun prasida puput, iratu nenten jaga mrasidayang malih mrentah propinsi-propinsine sane dauh Tukad Eprate.”
17Ida sang prabu raris ngwales surate punika sapuniki: “Katiba teken Gubernur Rehum muah teken Simsai sekretaris daerahe, makamuah teken parakantinnyane ane nongos di Samaria muah di daerah lenan di dauh Tukad Eprate.
18Suastiastu! Surat ane kirim paman teken gelahe suba kapaca di arepan gelahe tur makejang suba terang.
19Gelah suba mrentahang buat nureksain tur kapangguh mungguing uli maluan Yerusaleme ento tansah brontak nglawan pamrentah ida sang prabu, tur kotane ento bek misi jlema jaat muah jlema ane demen ngae iur.
20Sajaba ento, imaluan raja-rajane ane ngwengku di Yerusalem, ane mrentah sawewidangan dauh Tukad Eprate, makejang pada katurin pajeg, upeti muah bea cukai.
21Sawireh keto, prentahangja apanga anake ento pada suud ngwangun. Kotane ento tusing dadi buin kawangun satondenne ada prentah uli gelahe.
22Ingetangja apang melah, eda pesan paman lemenah teken unduke ene, apanga eda liunan buin gelahe pocol.”
23Sasampune surat Ida Sang Prabu Artahsasta kawacen ring ajeng Dane Rehum, Simsai sekretaris daerahe miwah ring ajeng parakantin danene sami, dane sareng sami digelis lunga ka Yerusalem, maranin wong Yahudine tumuli mamaksa wong Yahudine mangda ngrarianang pakaryane punika.
Pakar
24Daweg punika ugi, pakaryan ngwangun Perhyangan Agung Ida Sang Hyang Widi Wasa ring Yerusalem raris mandeg. Pakaryane punika nenten kalanturang kantos rauh ring taun sane kaping kalih panyeneng Ida Sang Prabu Darius ring Persia.