Dual PanelIndik
1Ida Sang Hyang Widi Wasa ngandikayang Dane Musa mangda dane ngrauhang sabdan Idane ring parapandita katurunan Dane Harun kadi asapuniki: “Anake ane dadi pandita tusing dadi ngletehin dewekne, ulihan ia milu mrateka kadang warganne ane mati,
2sajabaning yening ane mati ento memenne, bapanne, pianakne muani, wiadin luh, nyama tugelan ane muani,
3wiadin nyamanne ane luh ane tonden nganten, ane enu ngerob ajaka ia.
4Ia tusing dadi ngletehin dewekne uli krana matin anake ane enu patut makadang ajak ia ulihan juang kajuang.
5Anake ane dadi pandita tusing dadi nyukur sirahne, yadiastu angan abedik, buina ia tusing dadi nguris jenggotne wiadin nues-nues awakne aji tiuk mangan buat ngedengang dewekne mungguing ia katempuh baan kaduhkitan.
6Ia suba kanehang dadi duen Ulune, sawireh keto ia tusing dadi ngletehin parab Ulune. Ia anak ane patut ngaturang aturan rayunan teken Ulun. Sawireh keto ia patut suci.
7Anak ane dadi pandita tan wenang nyuang anak ane dadi panayang wiadin anak luh ane tusing bajang genten wiadin ane suba sapihan, sawireh panditane ento suba kanehang dadi duen Ulune.
8Pasamuane patut ngangkenin, mungguing panditane ento, duen Ulune ane anehang Ulun, sawireh ia ane ngaturang aturan rayunan di ajeng Ulune. Ulun ene Sang Hyang Widi Wasa. Ulun maraga suci, tur Ulun nyuciang kaulan Ulune.
9Yening ada pianak pandita ane luh dadi panayang, anake luh ento nganistayang bapanne. Dadinne ia patut katunjel kanti mati.
10Sang Pandita Agung suba kaselik tur kanehang pabuat Ida Sang Hyang Widi Wasa buat nyalanang darmaning pandita. Ia kamanggehang malantaran sirahne kasriokin aji lengis ane suci tur kasalukin panganggon pandita. Sawireh keto ia tan wenang nepang bokne tusing masuah, wiadin nyetset panganggonne buat nyinahang dewekne nandang duhkita.
11Ia suba katurang di ayun Ulune dadi due seselikan Ulune, dadinne ia tan wenang ngletehin dewekne. Ia masih tusing dadi ngletehin Kemah Ulune ane suci, malantaran ia magedi uli ditu laut macelep ka umah anake ane ngelah alangan mati, yadianja anake ane mati ento bapanne wiadin memenne padidi.
12(21:11)
13Ia tuah dadi nganten ajak anak luh bajang genten ane uli palingsehannyane niri. Tur tusing dadi nganten ngajak anak balu wiadin sapihan wiadin anak luh ane taen dadi panayang.
14(21:13)
15Yen ia malaksana buka keto, dadinne pianak-pianakne ane benehne suci, lakar dadi leteh. Ulun ene Sang Hyang Widi Wasa tur Ulun suba nyelik muah nganehang ia dadi Pandita Agung.”
16Ida Sang Hyang Widi Wasa ngandikayang Dane Musa,
17mangda ngrauhang sabdan Idane ring Dane Harun kadi asapuniki: “Anak ane cacad uli katurunan kitane, tan wenang ngaturang aturan rayunan di ayun Ulune. Unduke ene patut kapagehang kanti salawas-lawasne.
18Anak ane cacad, tusing pesan dadi ngaturang aturan, luire anak buta, anak rumpuh, cacad mua muah pawakane,
19anak ane kepek limanne wiadin batisne,
20anak ane bungkut wiadin kate, anak ane sakit mata muah sakit kulit, muah anak ane suba materes.
21Anak ane cacad uli katurunan Pandita Harune tan wenang ngaturang aturan rayunan di ayun Ulune.
22Nanging ia dadi naar lungsuran aturan rayunane ento, yadian surudan aturan rayunan ane suci, wiadin surudan aturan rayunan ane maha suci.
23Sawireh ia cacad ia tan wenang maekin korden panyelenge ane suci, wiadin maekin pamorboran aturane ento. Ia tusing dadi ngletehin barang-barang ane suci, sawireh Ulun ene Sang Hyang Widi Wasa, tur Ulun ane nyuciang barang-barange ento.”
24Kenginan, kadi asapunika sane karauhang antuk Dane Musa ring Dane Harun miwah paraputran danene ping kalih ring parabangsa Israele makasami.