Dual PanelTaun
1Ring duur Gunung Sinaine Ida Sang Hyang Widi Wasa masabda ring Dane Musa,
2tur ngandikayang dane mangda ngrauhang pidabdab-pidabdabe sane inucap ring sor puniki, ring bangsa Israele: Yening semeton sampun ngaug jagat sane pacang kapaicayang ring semeton antuk Ida Sang Hyang Widi Wasa, sabilang taun sane kaping pitu, semeton nenten dados ngarap tanahe punika. Malantaran kadi asapunika semeton ngluihang Ida Sang Hyang Widi Wasa.
3Sajeroning nem taun suenipun, semeton patut nandurin pategalan semetone, mretenin abian anggur semetone, miwah munduhang pamupon semetone.
4Nanging taun sane kaping pitu punika makasami kanehang pabuat Ida Sang Hyang Widi Wasa. Ring taun punika tanahe patut kabanggayang neng tur nenten dados kagarap. Pategalan semetone sampunang tandurina, muah sampunang pretenina abian anggur semetone.
5Samaliha buah embong gandum wiadin buah gandum sane ngentikang iba ring tegal semetone, sampunang anyina. Kadi asapunika taler buah anggur sane wetu saking punyan anggure sane tan mapretenan, sampunang alapa. Santukan taune punika taun pararianan pabuat tanahe punika.
6Nanging yadiastun kadi asapunika, tanahe punika jaga ngwetuang pamupon, sane jaga dados pangupa jiwa pabuat semeton, pabuat panjak-panjak semetone, pabuat buruh-buruh semetone, miwah pabuat wong sunantara sane magenah ring pantaran semetone.
7Kadi asapunika taler pabuat ingon-ingon semetone, miwah sato-sato galak sane wenten ring tegalan-tegalan semetone. Sakancan sane kapupuang antuk tanahe punika sami dados ajengang.
Taun
8Rarisang etang pitung taun ping pitu, makasami dados petang dasa sia taun.
9Ring tanggal sane kaping dasa sasih sane kaping pitu inggih punika ring Rerainan Panyupat Dosane, rarisang nikayang anak adiri nyuarayang trompet milehan ring sakuubing panegara.
10Kadi asapunika patutipun semeton nganehang taun sane kaping seket punika, saha ngwarah-warahang kabebasan ring sakancan anake sane magenah ring panegarane punika. Ring taun punika sakancan arta brana sane sampun kadol, patut kawaliang ring sang sane pecak nerbeang wiadin ring katurunannyane. Anake sane sampun kadol dados panjak, ipun patut kawaliang ring kulawarganipune.
11Sampunangja semeton nandurin pategalan semetone, wiadin ngampung gandum sane ngentikang iba wiadin ngalap buah anggur saking abian anggur semetone sane nenten mapretenan.
12Taun punika dados taun sane suci pabuat semeton. Wantah pamupon entik-entikan sane ngentikang iba ring tegalan semetone kewanten sane dados ajengang semeton.
13Ring taun punika, sakancan arta branane sane sampun kadol patut kawaliang ring sang sane pecak nerbeang.
14Duaning punika, yening semeton ngadol tanah ring sesama bangsan semetone, wiadin numbas tanah saking ipun, sampunang ngamargiang padol punika nganggen cara sane nenten adil.
15Pangargan tanahe punika patut ketang manut pamupon sane jaga kapupuang kantos rauh ring Taun Kabebasan sane jaga rauh punika.
16Yening gebogan taune punika akeh, pangargan tanahe punika maelan. Nanging yen gebogan taune punika akidik, pangarganipun taler patut murahan, santukan sane kadol punika wantah pamupon tanahe punika.
17Sampunangja semeton melog-melog sesama bangsan semetone, nanging semeton patut ajerih ring Ida Sang Hyang Widi Wasa Widin semetone.
Indik
18Tinutinja sakancan pidabdab miwah pituduh Ida Sang Hyang Widi Wasa, mangda semeton prasida muponin urip saha rahayu ring jagate punika.
19Tanahe irika jaga ngwetuang pamuponnyane, ngantos semeton jaga molih pangan kinum sane cukup, miwah magenah irika saha sutrepti.
20Nanging menawita wenten anak sane jaga mataken ngeniang indik sane jaga kajengang ring taun sane kaping pitu punika, rikala tanahe punika nenten katandurin miwah pamuponnyane nenten kapunduhang.
21Ring taun sane kaping nem, Ida Sang Hyang Widi Wasa jaga ngamertanin tanahe punika, ngantos pamuponipun cukup buat kajengang sajeroning kalih taun.
22Samaliha rikala semeton nandurin tegal semetone ring taun sane kaping kutus, pamupon semetone sane ring taun sane kaping nem punika kantun wenten sisanipun buat dados ajeng-ajengan semetone. Tur pasediaan ajeng-ajengan semetone jaga cukup ngantos rauh masannya semeton munduhang pamupon semetone sane ring taun sane kaping kutus punika.
Indik
23Tanah semetone punika nenten dados kadol ngantos padem, santukan tanahe punika boya druen semetone, nanging druen Ida Sang Hyang Widi Wasa. Semeton sakewanten kalugra migunayang tanahe punika, waluya sakadi wong sunantara.
24Yening wenten tanah sane kadol, wewenang sang sane pecak nruenang jaga nebus tanahe punika, patut tansah kelingang.
25Yening wenten anak Israel sane dados tiwas, kantos ipun tan dados tan jaga ngadol tanahipune, kadang wargannya sane paling nampeke patut nebus tanahnyane punika.
26Anak sane nenten maderbe kadang warga buat nebus tanahe punika, menawita benjang pungkur ipun newek mrasidayang nebus, rikalaning ipun sampun sugih tur maderbe jinah sane cukup buat nebus tanahe punika.
27Yening kadi asapunika, anake punika patut naur pangargan pamupon tanahe punika salamin taun sane jaga rauh, sadurung taun kabebasane punika rauh, ring sang sane sampun numbas tanahnyane punika. Sapanglanturipun ring taun punika ugi tanahe punika jaga kawaliang ring ipun.
28Nanging yen ipun nenten maderbe jinah cukup buat nebus tanahe punika, sang sane sampun numbas tanahe punika tetep kantun kuasa ring tanahe punika ngantos rauh Taun Kabebasan sane jaga rauh. Ring Taun Kabebasan punika tanahe punika jaga kawaliang ring sang sane pecak nerbeang.
29Yening wenten anak ngadol umah sane magenah ring kota sane matembok panyengker, sasampun maletan ataun mepek, ipun wenang nebus umahipune punika.
30Nanging yening umahe punika nenten tumbas ipun malih sajeroning ataun punika, ipun nenten dados malih nebus umahe punika. Kenginan umahe punika tetep dados derben anake sane sampun numbas punika, miwah katurunanipune. Ring Taun Kabebasane, umahe punika nenten jaga kawaliang.
31Pabuat umah sane wenten ring desa sane nenten matembok panyengker, irika kamargiang pidabdab sakadi pidabdab pabuat pategalane, inggih punika: Sang sane pecak nerbeang dados malih nebus, tur ring Taun Kabebasane umahe punika patut kawaliang.
32Nanging wong Lewine, tan pasengker dados nebus paderbeannyane ring kota-kota sane sampun kapastiang buat ipun.
33Yening wenten wong Lewi ngadol umah ring salah tunggil kotane punika, tur ipun nenten mrasidayang nebus malih, umahe punika patut kawaliang ring ipun ring Taun Kabebasane punika. Santukan umah wong Lewine ring kota-kotannyane punika, sujatinipun dados cecatun ipun ring pantaran bangsa Israele.
34Nanging pategalan sane wenten ring kiwa tengen kotan wong Lewine, nenten pisan dados kadol. Punika dados cecatun wong Lewine buat salami-laminipun.
Indik
35Yen wenten wong Israel sane mapisaga ngajak semeton raris ipun dados tiwas, tur ipun nenten mrasidayang ngupa pira idupnyane, semeton patut nulungin ipun, aji amunapija biasane semeton ngwehin anake sane nanggap upah ring semeton.
36Sampunangja semeton nagih putran jinah semetone sane paselangang semeton ring anake punika, nanging patut semeton ajerih ring Ida Sang Hyang Widi Wasa, tur banggayangja anake punika mapisaga ngajak semeton. Samaliha sampunangja semeton ngalih bati sajeroning pangan kinum sane adol semeton ring ipun.
37(25:36)
38Sapunika pituduh Ida Sang Hyang Widi Wasa Widin semetone, sane sampun nantan semeton kesah saking Mesir, jaga maicayang tanah Kanaane punika ring semeton, mangda Ida dados Widin semetone.
Indik
39Yen wenten wong Israel sane mapisaga ngajak semeton, raris ipun dados tiwas, kantos ipun ngadol dewekipune dados panjak ring semeton, kenginan semeton nenten dados nguduhang ipun buat ngambil pakaryan sakadi panjak.
40Ipun patut ajak semeton sakadi anak nanggap upah ring semeton tur makarya pabuat semeton, kantos rauh Taun Kabebasane punika.
41Ring taune punika, ipun miwah pianak-pianakipune patut makaon saking umah semetone, tur mawali ring kulawargan ipune, miwah tanah padruen leluuripune.
42Bangsa Israel punika kaulan Ida Sang Hyang Widi Wasa. Ida sane nuntun ipun kesah saking Mesir, punika awinannya ipun tan wenang kadol dados panjak.
43Duaning punika wong Israel sane mamanjak ring semeton, sampunang ipun kasarina. Semeton patut ajerih ring Widin semetone.
44Yening semeton merluang panjak, semeton kengin numbas ring pantaran bangsa-bangsa sane wenten ring kiwa tengen semetone.
45Semeton kengin numbas pianak-pianak wong sunantara sane wenten ring pantaran semetone. Pianak-pianak wong sunantara sane lekad ring panegaran semetone, ipun kengin dados druen semetone.
46Samaliha kengin taler ipun patamiang semeton ring oka-okan semetone buat dados panjak saumur idup. Nanging marep ring sesaman semetone bangsa Israel, semeton tan wenang malaksana kasar.
47Upaminipun wenten wong sunantara sane magenah ring pantaran semetone dados anak sugih, tur sesaman semetone wong Israel dados tiwas, raris ipun ngadol dewekipune dados panjak ring wong sunantara punika, wiadin ring salah tunggil kulawargan wong sunantara punika.
48Sasampune ipun kadol, wong Israel punika kantun wenang katebus. Salah tunggil saking nyamanipune muani,
49wiadin pamanipune, wiadin misanan ipune, wiadin salah tunggal kadang warganipune sane pinih nampeka kantun dados nebus ipun. Wiadin yen benjang pungkur ipun newek cukup maderbe jinah, ipun dados nebus dewek ipune niri, mangda ipun bebas.
50Anake sane mamanjak punika patut mapiguman ngajak anake sane numbas ipun punika. Ipun sareng kalih patut ngitung taun-taun ngawit saking ipun dados panjak kantos rauh ring Taun Kabebasan sane jaga rauh. Panebus punika patut kapastiang manut upah sane katampi antuk anake nanggap upah.
51Anake sane dados panjak punika patut ngwaliang apahan saking pangarganipune sane kantun,
52(25:51)
53satmaka ipun sampun sakadi pananggap upah sane sampun nampi upah nyabran taun. Pamekelipune nenten dados mambek kasar marep ring ipun.
54Yening manut salah tunggil carane punika ipun tan prasida kabebasang, ipun miwah pianak-pianakipune patut kabebasang ring Taun Kabebasane sane jaga rauh.
55Wong Israel tan wenang dados panjak saumur idup, santukan bangsa Israel punika kaulan Ida Sang Hyang Widi Wasa. Ida Sang Hyang Widi Wasa sane sampun nuntun ipun kesah saking Mesir. Ida punika sane dados Widinipune.