Dual Panel1Ida Sang Hyang Widi Wasa Sane Maha Kuasa ngandika sapuniki: “Ulun lakar ngutus utusan Ulune buat nyediaang jalan pabuat Ulun. Sasubane keto Ida Sang Hyang Widi Wasa ane ajap kita ento, tan pararapan lakar rauh sig Perhyangan Idane. Utusane ane ati-ati kita ento lakar teka tur ngwarah-warahang pasubayan Ulune.”
2Nanging sapasirake sane jaga mrasidayang naanang rahina pangrauhan Idane punika? Sapasirake sane mrasidayang kantun urip rikalaning Ida mapakantenang raga? Ida jagi sakadi sabune sane katos, sakadi geni ring prapen pandene.
3Ida jaga rauh buat nepasin sakadi anake sane mresihin miwah nyuci perak. Sakadi pande mase mresihin perak miwah mase, kadi asapunika utusan Ida Sang Hyang Widi Wasa pacang nyuciang parapanditane mangdane dane pada ngaturang aturan sane patut ring ayun Ida Sang Hyang Widi Wasa.
4Malantaran punika aturan sane katurang antuk wong Yehuda miwah wong Yerusaleme ring ayun Ida Sang Hyang Widi Wasa, jaga kaledangin antuk Ida, sakadi sane biasanipun ring masa-masa sane sampun langkung.
5Ida Sang Hyang Widi Wasa Sane Maha Kuasa, masabda sapuniki: “Ulun lakar nyinahang raga di pantaran kitane tur lakar mapaica tetepasan. Ulun dienggal lakar dadi saksi marep teken anake ane ngadokang pangiwa, marep teken anake ane mamitra, marep teken anake ane masumpah palsu, marep teken anake ane mekelin buruh, ane nindes anak balu, anak ubuh muah anak sunantara muah marep teken sakancan ane tuara subakti teken Ulun.”
Indik
6“Ulun ene Sang Hyang Widi Wasa, tur Ulun tusingja uah-uah. Sawireh keto, kita watek katurunan Yakube, tusingja lakar sirna.
7Kita patuh buka leluur kitane ane suba tusing ngamanggehang pidabdab Ulune ento. Mabalikja sig Ulune, pedas Ulun lakar mabalik sig kitane. Nanging kita matakon kene: ‘Napike sane patut laksanayang titiang buat mawali ring ayun Palungguh IRatu?’
8Ulun matakon teken kita, apake beneh anake ngapus Ida Sang Hyang Widi Wasa? Suba sinah tusing beneh. Nanging kita ngapus Ulun. Kita buin matakon kene: ‘Kadi asapunapike antuk titiang ngapus Palungguh IRatu?’ Sajeroning unduk aturan pahdasan muah aturan-aturan ane lenan.
9Kita ajak makejang kena temah, sawireh bangsane ene makejang ngapus Ulun.
10Aturangja pahdasan kitane ka Perhyangan Agung, amunapaja benehne, apanga cukup ada pangan kinum ditu. Pintoninja Ulun, pedas kita nepukin mungguing Ulun lakar ngampakang jendelan langite, tur nyriokin kita aji merta magenepan kanti maliah-liah.
11Ulun lakar tusing nglugrain mranane ngusakang tetaneman kitane muah punyan anggur kitane lakar sarat ngaba buah.
12Sasubane keto bangsa-bangsane makejang lakar ngadanin kita bagia, sawireh gumin kitane dadi tongos magumana ane melah.”
Janji
13Ida Sang Hyang Widi Wasa masabda sapuniki: “Kita suba ngorahang unduk ane tusing patut marep teken Ulun. Nanging kita matakon kene: ‘Indik napike sane baosang titiang pamantuka ring Palungguh IRatu?’
14Kita suba ngorahang kene: ‘Tusing ada gunane subakti teken Ida Sang Hyang Widi Wasa. Apake gunane nglaksanayang pangandikan Idane, wiadin ngedengang mungguing iraga suba nyelsel teken laksanan iragane di ayun Ida Sang Hyang Widi Wasa Sane Maha Kuasa?
15Buka ane tepukin iraga, jlemane ane sumbung ia pada bagia. Jlemane ane corah, tusingja tuah aget dogen, nanging ia pada mintonin Ida Sang Hyang Widi Wasa aji laksanannyane ane corah tur ia pada luput.’”
16Irika jadmane sane nungkul ring Ida Sang Hyang Widi Wasa pada mabaos ring timpalnyane, tur Ida Sang Hyang Widi Wasa nglinguang tur mirengang baosipune. Ring ayun Idane, wenten sinurat ring satunggaling cakepan, catetan jadmane sane nungkul ring Ida Sang Hyang Widi Wasa miwah sane subakti ring Ida.
17Ida Sang Hyang Widi Wasa Sane Maha Kuasa, masabda sapuniki: “Ia ajaka makejang lakar dadi kaulan Ulune. Di panemayan Ulune malaksana, ia lakar dadi duen Ulune ane sayangang Ulun. Ulun lakar asung lugraha teken ia, buka ibapa nyayangang pianak ane subakti teken ia.
18Ditu kaulan Ulune buin lakar nawang binan pikolih anake malaksana patut muah anake ane malaksana corah, binan anake subakti teken Ulun muah anake ane tusing subakti.”