Dual PanelSih p
1Pujija Ida Sang Hyang Widi Wasa! Pada ngaturang panyuksmaja ring Ida Sang Hyang Widi Wasa santukan Ida kalintang becik. Sih pasuecan Idane langgeng salami-laminipun.
2Sapasirake sane mrasidayang nyritayang sakancan paindikan sane ageng-ageng sane sampun kardi Ida? Sapasirake sane mrasidayang tegep muji Ida?
3Bagia sakancan anake sane satinut ring pituduh-pituduh Idane, sane setata nglaksanayang paindikan-paindikan sane patut.
4Duh Ratu Sang Hyang Widi Wasa elingangja taler titiang, rikalaning Palungguh IRatu mapaica pitulungan ring kaula druene. Etangja taler titiang rikalaning Palungguh IRatu ngrahayuang ipun.
5Lugrainja titiang ngeton gemuh landuh sane kapuponin antuk kaulan Palungguh IRatune, tur sareng muponin kaliangan bangsa druene, ring sakancan kabungahan kaula druen Palungguh IRatu.
6Titiang sareng sami sampun madosa, sakadi sane sampun kalaksanayang antuk leluur titiange. Titiang sampun malaksana dursila tur corah.
7Leluur titiange ring Mesir nenten ngresep ring pakardin Ida Sang Hyang Widi Wasa sane tawah-tawah. Ipun lali mungguing sampun ping kuda-kuda Ida nyinahang sih pasuecan Idane ring ipun, tur ipun pada brontak ring Segara Teberau pamantuka ring Ida Sang Maha Kuasa.
8Nanging Ida ngrahayuang ipun sakadi sane sampun janjiang Ida, mangda sinah kawisesan Idane sane agung.
9Ida ngrauhang prentah ring Segara Teberau punika, tur segarane tumuli nyat. Ida nuntun kaulan Idane nglintang ring dasar segarane sane tuh.
10Ida ngluputang ipun saking sakancan anak sane geting ring ipun. Ida ngrahayuang ipun saking sakancan meseh-mesehipune.
11Nanging meseh-mesehipune sami kalancah antuk toya, tur angan adiriko nenten wenten sane kantun urip.
12Duaning punika kaulan Idane raris ngega ring prajanjian-prajanjian Idane tur pada makidung muji-muji Ida.
13Nanging ipun digelis lali ring paindikan sane sampun kardi Ida tur nenten nyak nyantosang pituduh Idane.
14Ring tegal melakange ipun pada kaliput antuk indriannyane, sarwi mintonin Ida Sang Hyang Widi Wasa.
15Irika Ida nagingin pinunasipune, nanging Ida taler ngrauhang grubug ageng ring pantaranipune.
16Ring tegal melakange puniki ipun pada iri ati ring Dane Musa miwah ring Dane Harun, parekan Ida Sang Hyang Widi Wasa sane suci.
17Duaning punika, pretiwine raris engkag tur nguluh Datan miwah Abiram tumuli kapendem sakulawargannyane.
18Geni tedun nilap paraanake sane nyarengin ipun, tur ngeseng sakancan jadmane sane dursila.
19Ipun pada ngardi arca banteng mas ring Sinai, tumuli pada nyumbah arcane punika.
20Ipun nyilurin kaluihan Ida Sang Hyang Widi Wasa antuk arca banteng, buron sane neda padang.
21Ipun lali ring Ida Sang Hyang Widi Wasa sane sampun ngrahayuang ipun antuk pakardin Idane sane mawisesa ring Mesir.
22Ambate luih paindikan sane kardi Ida irika! Kalintang ngangobin pisan pakardin Idane ring Segara Teberau.
23Rikala Ida Sang Hyang Widi Wasa ngandikayang jaga nyirnayang kaulan Idane, irika Dane Musa, parekan seselikan Idane, raris nangkil ring ajeng Ida Sang Hyang Widi Wasa, buat nambakin pidukan Idane mangda sampunang Ida kantos nyirnayang kaulan Idane.
24Sapanglanturipun, ipun raris nulak tanah sane ngliangin punika, santukan ipun nenten ngega ring janjin Ida Sang Hyang Widi Wasa.
25Ipun pada negak ring kemahipune sarwi ngrengkeng, tur nenten nyak miragiang sabdan Ida Sang Hyang Widi Wasa.
26Punika awinannya Ida duka ring ipun, mungguing Ida jaga ngamademang ipun ring tegal melakange,
27tur jaga nyambehang katurunanipune ring pantaran bangsa-bangsane sane nenten nyungsung Widi, saha manggayang ipun padem ring gumin anak tios.
28Sapanglanturipun ring Peor parakaulan Ida Sang Hyang Widi Wasa pada sruron nyumbah Dewa Baal, tur nunas surudan sane pecak katur ring dewa sane nenten mangkihan.
29Ipun pada nanginin pidukan Ida Sang Hyang Widi Wasa, malantaran laksananipune punika, mawanan grubuge ageng nibenin ipun.
30Nanging Dane Pinehas raris ngadeg tur ngukum jadmane sane iwang, duaning punika pidukan Ida Sang Hyang Widi Wasa raris purna.
31Pakardin danene sane becik punika kelingang rauh mangkin tur jaga kelingang ring masa-masa sane jaga rauh.
32Ring toya kalebutane ring Meriba kaulan Idane ngawinang Ida duka, tur Dane Musa keni pakewuh ulihan ipun sareng sami.
33Ipun sareng sami ngawinang Dane Musa kalintang duka, ngantos dane tan jangkayan ngwedalang pangandika.
34Ipun sareng sami, nenten ngamademang jadmane sane nenten nyungsung Widi, sakadi pituduh Ida Sang Hyang Widi Wasa ring ipun.
35Nanging ipun pada saling juang ngajak jadmane punika, tur ninutin tata kramanipune.
36Kaulan Ida Sang Hyang Widi Wasa pada nyungsung arca, tur paindikane punika ngawinang kakaonanipun.
37Ipun pada ngaturang pianak-pianakipune muani miwah luh, makadados aturan ring arcane ring Kanaan.
38Ipun pada ngamademang rarene sane tan paiwang punika, tur tanahe irika kaletehin antuk sawannyane.
39Ipun sareng sami ngawinang deweknyane cemer, malantaran laksanannyane punika tur sampun nenten satia tuu ring Ida Sang Hyang Widi Wasa.
40Punika awinan Ida Sang Hyang Widi Wasa menggah piduka ring kaulan Idane, tur nenten seneng malih ring ipun.
41Ipun kaserahang ring kakuasan bangsa sane nenten nyungsung Widi, tur meseh-mesehipune pada mrentah ipun.
42Ipun pada kajajah antuk meseh-mesehipune, tur ipun pada nungkul ring meseh-mesehipune.
43Ping kuda-kuda Ida Sang Hyang Widi Wasa mebasang kaulan Idane, nanging ipun adenan mambek dura cara nglawan Ida, tur sayan dalem kalebu ring dosane.
44Nanging, Ida Sang Hyang Widi Wasa tansah mirengang pinunasnyane, rikalaning ipun masesambatan, tur Ida nglinguang ipun.
45Pabuat kabecikanipune, Ida eling ring janjin Idane, tur malantaran sih pasuecan Idane sane kalangkung ageng Ida kawelas arsan.
46Ida ngawinang sakancan bangsane sane nindes ipun marasa kangen ring ipun.
47Duh Ratu Sang Hyang Widi Wasa, Widin titiange, luputangja titiang tur baktaja titiang mawali saking pantaran bangsa-bangsane punika, mangda titiang mrasidayang ngaturang panyuksma tur muji parab Palungguh IRatu sane suci.
48Pujija Ida Sang Hyang Widi Wasa, Widin Israele! Pujija Ida sane mangkin ngantos salawas-lawasipun! Ngiringja iraga sareng sami pada mabaos Amin! Pujija Ida Sang Hyang Widi Wasa!