Dual PanelPanga
1Duh Ratu Sang Hyang Widi Wasa, wantah ring ayun Palungguh IRatu titiang ngaturang pangastawan titiang.
2Duh Ratu, Widin titiange, wantah ring Palungguh IRatu titiang suksrah. Luputangja titiang saking nandang kimud malantaran kaon ring payudan. Sampunangja lugraina meseh-meseh titiange gargita ngatonang titiang.
3Jadmane sane pracaya ring Palungguh IRatu nenten wenten jaga kaon ring payudan nanging indike punika jaga nibenin jadmane sane digelis brontak nglawan Palungguh IRatu.
4Duh Ratu Sang Hyang Widi Wasa, urukja titiang indik margin Palungguh IRatune. Icenja titiang uning ring margi-margine punika.
5Urukja titiang malaksana satinut ring kapatutan Palungguh IRatu, santukan Palungguh IRatu sane dados Widin titiange, sane ngrahayuang titiang. Titiang tansah pracaya ring Palungguh IRatu.
6Duh Ratu Sang Hyang Widi Wasa ledang Palungguh IRatu eling ring kabecikan miwah ring sih pasuecan Palungguh IRatune sane tan rered-rered, sane sampun sinahang Palungguh IRatu saking nguni.
7Ampurayangja dosa miwah kiwangan titiange duk titiang kantun wimuda. Duh Ratu Sang Hyang Widi Wasa elingangja titiang sajeroning kabecikan miwah sih pasuecan Palungguh IRatune sane nenten rered-rered.
8Santukan Ida Sang Hyang Widi Wasa punika maraga patut miwah becik, Ida nguruk jadmane dosa indik margi sane patut tuut ipun.
9Ida nuntun jadmane sane alap asor ring margine sane patut, tur Ida ngurukang ipun sane dados pakarsan Idane.
10Saking satia tuu miwah sih pasuecan Ida nuntun sakancan jadmane sane masayuban ring Ida miwah satinut ring sapatitah Idane.
11Duh Ratu Sang Hyang Widi Wasa, manggehangja prajanjian Palungguh IRatune, tur ampurayangja dosa-dosan titiange, santukan dosa-dosan titiange kalintang akeh.
12Jadmane sane satinut ring Ida Sang Hyang Widi Wasa, pacang mlajah saking Ida, indik margi sane patut tuut ipun.
13Ipun tansah jaga muponin gemuh landuh, tur pianak-pianakipune jaga nerbeang gumine.
14Ida Sang Hyang Widi Wasa punika dados sawitran anake sane satinut ring Ida, tur Ida ngamanggehang pasubayan Idane ring ipun.
15Titiang tan mari nulengek nunas tulung ring Ida Sang Hyang Widi Wasa, tur Ida ngluputang titiang saking baya.
16Duh Ratu Sang Hyang Widi Wasa, cingakja titiang, tur suecaninja titiang santukan titiang nglisting tur lemet.
17Tulungja titiang sajeroning kaberekan titiange, tur luputangja titiang saking sakancan kamewehan titiange.
18Pakayuninja kamewehan miwah kasangsaran titiange, tur ampurayangja sakancan dosa-dosan titiange.
19Indayangja aksi, ambate akehnya titiang maderbe meseh. Indayangja aksi, ambate bangetnya ipun geting ring titiang.
20Sayubin tur luputangja titiang, mangda sampunang titiang kaon. Titiang tangkil praya nunas karahayuan ring Palungguh IRatu.
21Dumadakja kabecikan miwah kajujuran titiange matiningin titiang, santukan titiang pracaya ring Palungguh IRatu.
22Duh Ratu Sang Hyang Widi Wasa, luputangja Israel kaula druene saking sakancan kamewehannyane?