Alkitab Mobile SABDA
[VER] : [BALI]     [PL]  [PB] 
 <<  Mazmur 31 >> 

Panga

1Duh Ratu Sang Hyang Widi Wasa, titiang pedek tangkil ring ayun Palungguh IRatu buat nunas pasayuban. Sampunang pisan titiang banggayanga kakaonang antuk imeseh. Palungguh IRatu maraga Widi sane adil. Titiang ngastawa, luputangja titiang!

2Pirengangja pinunas titiange! Sane mangkin ledang Palungguh IRatu ngrahayuang titiang. Ledang Palungguh IRatu makadados genah pasayuban miwah benteng titiange, buat ngluputang titiang.

3Palungguh IRatu makadados genah pasayuban miwah benteng titiange. Duaning punika tuntun tur aterangja titiang sakadi sane sampun janjiang Palungguh IRatu.

4Luputangja titiang saking jeet sane sampun kapasang pabuat titiang. Samaliha lempasangja titiang saking bebaya.

5Titiang nyuksrahang dewek ring Palungguh IRatu. Palungguh IRatu jaga ngrahayuang titiang. Duh Ratu Sang Hyang Widi Wasa, Palungguh IRatu maraga Widi sane satia tuu.

6Palungguh IRatu bendu ring jadmane sane nyungsung widi sane palsu, nanging titiang suksrah ring Palungguh IRatu.

7Titiang jaga marasa liang tur bungah ring manah, malantaran sih pasuecan Palungguh IRatu sane nenten rered-rered. Palungguh IRatu nyingak kasangsaran titiange, tur wikan ring kamewehan titiange.

8Palungguh IRatu nenten nglugrain meseh-meseh titiange ngejuk titiang. Palungguh IRatu sampun mapaica kabebasan ring titiang buat mamargi kijaja sapakitan titiange.

9Duh Ratu Sang Hyang Widi Wasa, suecaninja titiang, santukan titiang sajeroning kamewehan. Matan titiange kuyu pisan, malantaran bes sue titiang ngeling, tur titiang sampun kalintang lesu.

10Titiang kalintang lesu duaning nandang kaduhkitan, tur ling titiange nyutetang tuuh titiange. Titiang kalintang lemet malantaran sakancan kamewehan titiange, kantos tulang-tulang titiange ngrigis.

11Sakancan meseh-meseh miwah pisaga-pisagan titiange, sami pada nganistayang titiang. Jadmane sane uning ring titiang sami pada ajerih ring titiang. Yening ipun manggihin titiang ring margine, ipun sami pada malaib ninggal titiang.

12Sakancan jadmane sampun pada lali ring titiang, waluya titiang sampun padem. Titiang tan bina sakadi barang sane sampun kakutang.

13Titiang miragi meseh-meseh titiange pada makisi-kisi, tur takut miwah resres nglikub titiang. Ipun pada ngrincikang daya marep ring titiang, tur sruron jaga ngamademang titiang.

14Duh Ratu Sang Hyang Widi Wasa, titiang suksrah wantah ring ayun Palungguh IRatu kewanten. Palungguh IRatu makadados Widin titiange.

15Titiang tansah wenten sajeroning pamiaran Palungguh IRatu. Luputangja titiang saking meseh-meseh titiange miwah saking jadmane sane nyangsaren titiang.

16Cingakja kaulan Palungguh IRatu antuk sih kapiolasan. Luputangja titiang sajeroning sih pasuecan Palungguh IRatu sane nenten rered-rered.

17Duh Ratu Sang Hyang Widi Wasa, titiang masesambatan ring ayun Palungguh IRatu. Sampunangja banggayanga titiang nandang kimud. Dumadak jadmane dursila nandang kimud tur tedun ka pati loka bungkem tan pasuara.

18Dadosangja jadmane sane bobab, sane sumbung tur ngagu miwah sane mabaos nganistayang anake sane patut, mangda ipun kolok.

19Ambate luihnya paindikan-paindikan sane becik sane cawisang Palungguh IRatu pabuat jadmane sane ngluihang Palungguh IRatu! Jadmane sami sampun pada uning indik kabecikan Palungguh IRatune, tur tan kadi-kadi antuk Palungguh IRatu nyayubin jadmane sane suksrah ring Palungguh IRatu.

20Palungguh IRatu nyingidang tur ngrahayuang ipun ring ayun Palungguh IRatu, saking rerincikan manusane. Palungguh IRatu nyingidang ipun ring genah pasayuban sane sutrepti saking meseh-meseh sane minjulin ipun.

21Pujija Ida Sang Hyang Widi Wasa! Ambate luih sih pasuecan Idane sane kasinahang ring titiang, rikalaning titiang kakurung tur kagebug antuk satru.

22Titiang sampun kalintang ajerih, tur nyengguh dewek titiange sampun kasabatang saking ayun Idane. Nanging Ida mirengang sesambatan titiange rikala titiang ngastawa nunas tulung ring Ida.

23Ih sakancan anak sane satia tuu, tresna baktija ring Ida Sang Hyang Widi Wasa. Ida Sang Hyang Widi Wasa nyayubin jadmane sane satia tuu, nanging Ida nyisipang jadmane sane sumbung sakadi patutipun.

24Pada kukuh tur pagehja ragane sareng sami, ih sawatek anake sane ngajap-ajap Ida Sang Hyang Widi Wasa.


  Share Facebook  |  Share Twitter

 <<  Mazmur 31 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel