Dual PanelMuji
1Titiang tan mari jaga matur panyuksma ring Ida Sang Hyang Widi Wasa, tur titiang nenten jaga wus-wusan muji Ida.
2Titiang jaga muji Ida, malantaran paindikan sane sampun kardi Ida. Dumadak sakancan jadmane sane katindes miragiang tur pada girang ring manah.
3Ngiringja sareng-sareng ring titiang nglumbrahang kagungan Ida Sang Hyang Widi Wasa. Ngiringja iraga sareng-sareng muji parab Idane.
4Titiang ngastawa ring Ida Sang Hyang Widi Wasa, tur Ida nyaurin pangastawan titiange, Ida mebasang titiang saking sakancan katakutan titiange.
5Jadmane sane katindes pada nulengek ring Ida, tur ipun pada liang. Ipun nenten jaga naenin kakadoang.
6Anake sane nenten maderbe patulungan pada nunas ica ring Ida, tur Ida nagingin pinunasnyane. Ida ngluputang ipun saking sakancan kamewehanipune.
7Malaekat Idane ngebag anake sane astiti bakti ring Ida, tur ngluputang ipun saking baya.
8Indayangja resepang tur telebang, ambate becikne Ida Sang Hyang Widi Wasa. Bagia anake sane muponin sutrepti ngiring Ida.
9Ih sakancan kaulan Idane, tinutinja Ida Sang Hyang Widi Wasa. Anake sane satinut ring Ida jaga muponin sakancan sane buatang ipun.
10Yadiastun singa-singane pada nglelana santukan ipun layah katunan teda, nanging anake sane astiti bakti ring Ida Sang Hyang Widi Wasa nenten pacang kakirangan punapa-punapi.
11Duh paratruna-trunan tiange, mrikija piragiang baos tiange. Tiang jaga ngajahin semeton ngluihang Ida Sang Hyang Widi Wasa.
12Punapike semeton meled panjang umur saha muponin bagia?
13Duaning punika sampunang pisan semeton maosang paindikan sane corah miwah sane bobab.
14Kutangja paindikan sane corah tur laksanayangja paindikan sane becik. Usahayangja ngulati dame saking saguluking kayun semetone.
15Ida Sang Hyang Widi Wasa jaga ngebag jadmane sane patut tur mirengang sesambatannyane.
16Nanging Ida jaga nglawan anake sane malaksana corah, mangda yen ipun padem, digelis ipun kalaliang.
17Jadmane sane patut mapinunas ring Ida Sang Hyang Widi Wasa, tur Ida nagingin pinunasipune. Ida ngluputang ipun saking sakancan kamewehanipune.
18Ida Sang Hyang Widi Wasa tansah nampek ring anake sane sampun tan padaya, tur Ida ngrahayuang anake sane sampun telas pangajap-ajapipune.
19Jadmane sane becik akeh nandang kamewehan, nanging Ida Sang Hyang Widi Wasa ngluputang ipun saking kamewehan punika.
20Ida Sang Hyang Widi Wasa matiningin ipun saha sampurna, punika awinan nenten wenten tulangipune lung angan asiki.
21Kacorahane punika jaga ngamademang jadmane sane dursila, tur jadmane sane geting ring anake sane patut, ipun pacang kasisipang.
22Ida Sang Hyang Widi Wasa jaga ngrahayuang kaulan Idane. Anake sane tangkil nunas pasayuban ring Ida, ipun jaga karahayuang.