Dual PanelPangu
1Ida Sang Hyang Widi Wasa, Sane Maha Wisesa, masabda. Ida ngesengin sakuub jagate makasami saking tanggu kangin rauh tanggu kauh.
2Ida Sang Hyang Widi Wasa masinar saking Sion, kota sane wiakti asri pisan.
3Widin iragane rauh tur Ida nentenja meneng kewanten. Ida kariinin antuk geni ngendih murub miwah kiter antuk angin ribut.
4Ida ngesengin akasa miwah pretiwine makadados saksi, buat nyaksinin Ida nepasin kaulan Idane.
5Ida ngandika sapuniki: “Punduhangja kaulan Ulune ane satia tuu di ayun Ulune, nah ento anak ane ngae prajanjian ngajak Ulun malantaran ngaturang aturan.”
6Akasane nglumbrahang mungguing Ida Sang Hyang Widi Wasa punika maraga adil, tur Ida maraga hakim.
7“Ih kaulan Ulun, padingehangja Ulun lakar masabda. Ulun lakar nyaksiang teken kita. Ih Israel Ulun ene Widi, Widin kitane.
8Ulun tusing nglemekin kita uli krana aturan kitane muah aturan maborbor ane setata aturang kita teken Ulun.
9Ulun tusing merluang sampi uli umah kitane, wiadin kambing uli ingon-ingon kitane.
10Sawatek burone ane di alase muah panyiuan ingon-ingon ane di bukit-bukite, ento duen Ulune.
11Sakancan kedise ane di alase muah sawatek ane idup di pategalane ento makejang duen Ulune.
12Yening Ulun marasa lue, Ulun tusingja ngorahang teken kita sawireh gumi muah saisinne makejang ento duen Ulune.
13Apake Ulun ngrayunang be sampi wiadin nginum getih kambing?
14Aturangja aturan panyuksman kitane teken Ida Sang Hyang Widi Wasa, muah bayahja sakancan sesangin kitane teken Ida Sang Maha Wisesa.
15Nunas icaja teken Ulun dikalan teka kakewehane. Ulun lakar ngluputang kita, tur kita lakar muji Ulun.”
16Nanging Ida Sang Hyang Widi Wasa masabda ring jadmane dursila, kadi asapuniki: “Apa kranane kita ngrambang pituduh-pituduh Ulune? Apa kranane kita ngraosang Prajanjian Ulune?
17Kita tusing nyak nampi panglemek Ulune, tur kita tulak teken pituduh-pituduh Ulune.
18Kita dadi sawitran sakancan malinge ane tepukin kita muah kita sruron teken sakancan anake ane mamitra.
19Kita setata ngraosang paundukan ane corah, tur tusing suud-suud ngraosang paundukan ane bobab.
20Kita nalih nyaman kitane padidi muah ngalih-alihin kapelihannyane.
21Ulun meneng dogen yadiastu kita suba nglaksanayang sakancan paundukane ento. Ento awanane kita ngaden Ulun patuh buka kita. Nanging ane jani Ulun nglemekin kita muah nyinahang unduke ento teken kita.
22Ih anak ane tuara lingu teken Ulun, resepangja ene. Yen tusing keto Ulun lakar nyirnayang kita, tur tusing ada anak lakar ngluputang kita.
23Aturan panyuksmane ento makadadi aturan ane ngluihang Ulun, tur Ulun pedas lakar ngrahayuang sakancan anake ane astiti bakti teken Ulun.”