Dual PanelKidun
1Masuryakja saha muji Ida Sang Hyang Widi Wasa patindih iragane, tur makidungja ngluihang Widin Dane Yakube.
2Tabuhja tetabuhan miwah tepakja rebanane, tur tembangangja tembang sane becik antuk rebab miwah suling.
3Suarayangja trompet buat marerainan, rikalaning sasih tanggal apisan miwah rikalaning sasih purnama.
4Puniki pidabdab sane manggeh ring Israel, inggih punika pituduh saking Widin Dane Yakube.
5Ida maicayang pidabdab punika ring bangsa Israel, rikalaning Ida nglurug jagat Mesire. Tiang miragi wenten satunggaling suara sane tan uningin tiang masuara sapuniki:
6“Ulun nyuangin tetegenan kitane uli baong kitane. Ulun nglugrain kita nuunang batu ane tegen kita.
7Dikalan kita nandang kewuh, kita masesambatan teken Ulun, tur Ulun ngrahayuang kita. Uli tongos Ulune ane ilid di tengah angin ribute, Ulun nyautin kita. Ulun mintonin kita sig yeh kalebutane di Meriba.
8Ih kaulan Ulune, padingehangja piteket Ulune. Ih Israel, Ulun dot pesan apang kita nyak madingehang sabdan Ulune.
9Kita tusing pesan dadi nyungsung Widi ane lenan.
10Ulun ene Sang Hyang Widi Wasa, Widin kitane ane nantan kita pesu uli tanah Mesir. Enggangangja bibih kitane. Ulun lakar madaarin kita.
11Nanging kaulan Ulune tuara nyak madingehang sabdan Ulune tur Israel tusing nyak satinut teken Ulun.
12Ento awanane Ulun nepinin ia nyalanang kenehne ane bengkung, muah nglaksanayang sapakitannyane.
13Ulun dot pesan apanga kaulan Ulune nyak madingehang Ulun. Ulun dot pesan apanga ia nyak astiti bakti teken Ulun.
14Ulun dienggal lakar ngalahang musuh-musuhnyane muah nyirnayang sakancan satrunnyane.
15Anake ane gedeg teken Ulun, lakar pada sumungkem tur jejeh di ajeng Ulune. Ukumannyane lakar kajalanang kanti salawas-lawasne.
16Nanging Ulun lakar madaarin kita aji gandum ane paling melaha muah lakar ngwaregang kita aji madu alas.”