Dual PanelPanga
1Babad Dane Nehemia okan Dane Hakalya. Duk bulan Kislep, taun sane kaping kalih dasa, duk panyeneng Ida Sang Prabu Artahsasta ring Persia, tiang Nehemia nuju wenten ring ibukota Susan.
2Duk punika Hanani, salah tunggal nyaman tiange rauh saking Yehuda kasarengin antuk makudang-kudang anak lianan. Tiang tumuli nakenin ipun indik kawentenan wong Yahudi sane sampun mawali saking paselongannyane ring Babel. Sajaba punika tiang taler mataken indik kota Yerusaleme.
3Ipun sareng sami nuturang ring tiang, mungguing jadmane sane kantun urip tur mawali ka tanah palekadannyane, wenten sajeroning kamewehan ageng tur kanistayang antuk jadma sunantara sane wenten irika. Ipun taler nyritayang, mungguing tembok Yerusaleme sampun uug tur gapura-gapurannyane durung kabecikang ngawit saking daweg gapura punika katunjel.
4Rikala tiang miragi indike punika, tiang raris negak tur ngeling saha nandang duhkita makudang-kudang rahina suenipun. Tiang tumuli mapuasa tur ngastawa ring ayun Ida Sang Hyang Widi Wasa,
5kadi asapuniki: “Oduh Ratu Sang Hyang Widi Wasa sane nguasain suargane, Widi Sane Maha Agung, titiang rumasa ajerih ring ayun Palungguh IRatu. Palungguh IRatu saking satia tuu ngagem prajanjian Palungguh IRatune marep ring anake sane astiti bakti tur nglaksanayang titah Palungguh IRatu.
6Ledang Palungguh IRatu nyuryanin titiang tur mirengang pangastawan titiange sane aturang titiang ring ayun IRatune siang miwah latri, pabuat bangsa Israel, parakaula druene. Titiang ngangkenin mungguing titiang bangsa Israel sampun madosa pamantuka ring Palungguh IRatu. Titiang miwah leluur titiange maiwang pamantuka ring Palungguh IRatu.
7Titiang sampun kalintang maiwang pamantuka ring Palungguh IRatu, tur titiang nenten ngamargiang sapatitah miwah saluiring pidabdab sane sampun titahang IRatu malantaran Dane Musa, parekan druene.
8Elingangja sabdan Palungguh IRatu ring Dane Musa parekan druene sane kadi asapuniki: ‘Yening kita tusing satia, kita lakar sambehang Ulun di pantaran parabangsane.
9Nanging yening kita buin malipetan sig Ulune tur tinut muah nglaksanayang prentah-prentah Ulune, yadiastu kita suba sambeh nganteg ka tanggun gumine, Ulun lakar ngamulihang kita ka tongos ane suba selik Ulun, dadi tongos nyungsung Ulun.’
10Duh Ratu Sang Hyang Widi Wasa, boyake ipun punika parekan-parekan IRatune, pasamuan Palungguh IRatu sane sampun luputang IRatu antuk kawisesan miwah kakuatan IRatune sane ageng.
11Oduh Ratu Sang Hyang Widi Wasa, ledang IRatu mireng pangastawan parekan IRatune puniki, kadi asapunika taler pangastawan parekan-parekan IRatune sane mamanah ngluihang Palungguh IRatu. Ledang IRatu nagingin pinunas titiange ring rahina puniki, tur ngawinang mangda ida sang prabu ledang asung lugraha ring titiang.” Daweg punika tiang dados pangenter inum-inuman ida sang prabu.