Dual PanelDane
1Dane Musa nglanturang pangandika ring bangsa Israel,
2sapuniki pangandikan danene: “Sane mangkin tiang sampun matuuh satus kalih dasa taun, tur nenten malih amunapi suenipun tiang mrasidayang dados pamimpin semetone. Sajawining punika, Ida Sang Hyang Widi Wasa sampun masabda ring tiang, mungguing tiang nenten pacang nglintangin Tukad Yordane punika.
3Ida Sang Hyang Widi Wasa, Widin semetone ngraga pacang mamargi ring ajeng parasemetone, tur nyirnayang bangsa-bangsa sane wenten irika, mangda semeton mrasidayang ngaug tanah ipune. Yosua pacang dados pamimpin semetone, sakadi sane sampun kasabdayang antuk Ida Sang Hyang Widi Wasa.
4Ida Sang Hyang Widi Wasa jaga nyirnayang bangsa-bangsane punika, sakadi Ida ngaonang Sang Prabu Sihon miwah Og, pararatun wong Amorine, tur Ida sampun nguugang guminnyane.
5Ida Sang Hyang Widi Wasa pacang mapaica kamenangan ring semeton marep ring ipun, tur semeton patut nibakang ring ipun sakancan paindikan sane sampun rauhang tiang ring semeton.
6Semeton patut pracaya tur sura dira. Sampunangja ajerih ring ipun. Widin semetone Ida Sang Hyang Widi Wasa ngraga pacang nyarengin semeton. Ida nenten jaga manggayang wiadin ngutang semeton.”
7Sasampune punika Dane Musa raris ngesengin Dane Yosua, tur ngandika ring dane ring arepan bangsa Israele makasami, sapuniki: “Pagehang tur entegangja keneh ceninge. Tuah cening ane lakar mimpin bangsane ene buat ngaug gumi ane kajanjiang baan Ida Sang Hyang Widi Wasa teken paraleluurnyane.
8Ida Sang Hyang Widi Wasa ngraga lakar nantan muah ngiangin cening. Ida tusing lakar ngendepin wiadin ngutang cening. Wireh keto edaja jejeh wiadin jerih.”
Pidab
9Sasampune punika Dane Musa tumuli nyuratang Pidabdab Ida Sang Hyang Widi Wasa punika, raris kaserahang ring parapandita suku Lewine, sane ngetangang Peti Prajanjian Ida Sang Hyang Widi Wasa, miwah ring parapamimpin bangsa Israele.
10Dane Musa ngandika ring dane sareng sami sapuniki: “Nyabran pitung taun, ring pamuput taun sane kaping pitu, ring Rerainan Pondok Daune, rikalaning sakancan utang-utang anake kapalilayang, wacenja pidabdabe puniki antuk suara sane jangih.
11Wacenja ring arepan bangsa Israele rikalaning ipun rauh ngaturang bakti ring Ida Sang Hyang Widi Wasa, Widin semetone, ring genah pangubaktine sane asiki punika.
12Nikayang sawatek anake muani, luh-luh miwah rare-rare, miwah parawong sunantara sane magenah ring kotan semetone mangda ipun sami pada mapunduh tur miragiang pidabdabe puniki, tur mangda ipun mlajah ngluihang Ida Sang Hyang Widi Wasa, Widin semetone, samaliha mangda ipun saking tuu sairing ring paurukan-paurukan Idane.
13Malantaran kadi asapunika katurunan semetone sane nenten naenin miragiang Pidabdab Ida Sang Hyang Widi Wasa, Widin semetone, jaga mrasidayang miragiang pidabdabe punika. Tur malantaran punika ipun jaga mlajah sairing ring Ida sakantun ipun urip ring jagat sane jaga aug semeton dauh Tukad Yordane.”
Pitud
14Sasampune punika Ida Sang Hyang Widi Wasa raris masabda ring Dane Musa sapuniki: “Kita tusing enu buin makelo lakar idup. Sawireh keto, kaukinja Yosua tur ajak ia sig Kemah Linggih Ulune, apanga Ulun maang ia pituduh-pituduh.” Dane Musa miwah Dane Yosua tumuli ka Kemah Linggih Ida Sang Hyang Widi Wasa,
15tur irika Ida Sang Hyang Widi Wasa makantenang raga ring dane sareng kalih, sajeroning sesaka ambun sane nyeleg ring gapuran Kemah Linggih Ida Sang Hyang Widi Wasa punika.
16Ida Sang Hyang Widi Wasa masabda ring Dane Musa sapuniki: “Kita lakar enggal mati, tur sasuban kitane mati, bangsane ene lakar tusing satia teken Ulun tur lompang teken janjin Ulune teken ia. Ia lakar nilar Ulun tur ia lakar nyungsung widi-widin bangsane ane ada di gumine ane lakar auga ento.
17Yen ia suba keto, Ulun menggah teken ia. Ulun lakar ngutang ia, tur ia lakar kasirnayang. Liu bencana ane gede lakar nibenin ia, tur ditu ia lakar nawang, mungguing ia katibenin bencana buka keto, sawireh Ulun Widinnyane, tusing enu ngiangin ia.
18Dikalane ento Ulun tusing nyak nulungin ia, sawireh ia suba nglaksanayang paundukan ane jaat tur nyungsung widi ane lenan.
19Ane jani suratangja kidunge ene. Urukang bangsa Israele kidunge ene, apanga kidunge ene dadi upasaksi marep teken ia.
20Ulun lakar ngajak ia ka gumine ane gemuh landuh, buka ane janjiang Ulun teken paraleluurnyane. Ditu ia lakar muponin sakancan dedaaran ane perluanga tur ia lakar liang idupne. Nanging ia lakar murang lampah tur nyungsung widi-widi ane lenan. Ia lakar nulak Ulun tur lakar lompang teken janjin Ulune teken ia,
21buina liu bencanane ane gede lakar nibenin ia. Nanging kidunge ene lakar tetep enu kakidungang, tur ento lakar dadi upasaksi marep teken ia. Malahan ane jani, satonden Ulun ngajak ia ka gumine ane janjiang Ulun ento, ulun wikan teken unduk ane kenehanga.”
22Ring rahinane punika ugi Dane Musa raris nyuratang kidunge punika, tumuli kurukang ring bangsa Israele.
23Sasampune punika Ida Sang Hyang Widi Wasa, raris masabda ring Dane Yosua, okan Dane Nun, sapuniki: “Kita patut pracaya tur sura dira. Kita ane lakar mimpin bangsa Israele ka gumi ane suba janjiang Ulun teken ia, tur Ulun lakar ngiangin kita.”
24Dane Musa nyuratang Pidabdab Ida Sang Hyang Widi Wasa, ring satunggiling cakepan. Apikang dane pisan nulis, mangda sampunang kantos wenten sane kalaliang.
25Sasampune dane nyurat, dane raris ngandika ring parapandita suku Lewine, sane ngetangang Peti Prajanjian Ida Sang Hyang Widi Wasa sapuniki:
26“Ambilja cakepan Pidabdab Ida Sang Hyang Widi Wasa puniki, tur genahangja ring sisin Peti Prajanjian Ida Sang Hyang Widi Wasa, Widin semetone, mangdane cakepane punika tetep wenten irika, makadados upasaksi, marep ring kaulan Idane.
27Tiang uning mungguing tan kadi-kadi bengkung miwah durakannyane. Sakantun tiang urip, ipun sampun mambek duraka pamantuka ring Ida Sang Hyang Widi Wasa, tur sasampun tiange padem, ambek durhakanipune jaga sayan ngagengang.
28Sane mangkin paumangja sawatek pamimpin suku miwah paraprakanggene ring arepan tiange, mangda tiang mrasidayang nguningayang paindikane puniki ring dane sareng sami. Tiang jaga nunas mangda akasa miwah pretiwine makadados saksin tiange ring dane sareng sami.
29Tiang uning, mungguing sasampune tiang padem, bangsane puniki jaga dados jaat tur nulak paindikan sane sampun urukang tiang ring ipun. Wenten masanipun, ipun jaga katibenin bencana, santukan ipun sampun ngawinang Ida Sang Hyang Widi Wasa, menggah malantaran ipun nglaksanayang paindikan sane sampun nenten lugrain Ida.”
Kakid
30Sasampune punika Dane Musa tumuli ngidungang kidunge puniki makasami, tur kapiragiang antuk bangsa Israele makasami.