Dual PanelPayuk
1Tanggal dasa sasih sane kaping dasa ring taun sane kaping sia, sajeroning tiang wenten ring paselongan, Ida Sang Hyang Widi Wasa raris masabda ring tiang sapuniki:
2“Ih manusa, catetja tanggale jani, sawireh didinane jani ratun wong Babele ngawitin ngurung kota Yerusaleme.
3Orahangja teken kaulan Ulune ane brontak ento, pangandene ene, ane paicayang Ulun Sang Hyang Widi Wasa Sang Maha Luur teken ia, kene: Tungguhangja payuke sig apine, tur bekinja isinin yeh.
4Pulangja ka payuke ento daging ane paling melaha makudang tebih, nah ento bagian pala muah batisne. Laut bekin masih aji tulang-tulang ane pepilihan.
5Pilihinja daging biri-birine ane paling melaha, tur tumpukang saange di batan payuke. Depangja yehe kanti maluab, tur luabangja tulang-tulang muah daginge ento.”
6Sapuniki sabdan Ida Sang Hyang Widi Wasa Sane Maha Luur: “Sengkala kotan jlemane ane demen mamati-mati. Kotane ento tan bina buka payuke ane amah barak ane tusing taen masutsut. Sakatebih daginge ento lakar kajemak, tur tusing ada enu magantulan.
7Di kota ada anak ngamatiang jlema, nanging getihne tusing ngecor di tanahe, tur tusing urugina baan abu. Nanging getihne ento kecoranga sig batu kaange ane gundul.
8Ulun suba numanang getihne ditu sig tongose ane tusing sida kilidang, buat mangunang keneh ngwales ane angarab-arab.”
9Sapuniki pangandikan Ida Sang Hyang Widi Wasa Sane Maha Luur: “Sengkala kotan jlemane ane amati-mati ento! Ulun ngraga ane nugdugang saang.
10Abaangja buin saang. Endihangja apine. Lablabja daginge. Entungangja kuahne. Tunjelja tulang-tulange.
11Ane jani pejangja payuk temagane ane puyung ento di duur baane, tur depang ia kanti barak makerab. Sasubane keto payuke ento lakar buin dadi suci, sasubane baraknyane telah puun,
12yadiastunja sakancan baraknyane ento tusing sirna sig apine.
13Ih Yerusalem, laksanan ibane ane cemer ane suba ngletehin iba. Yadiastun Ulun ngibehang buat nyuciang iba, nanging iba enu masih leteh. Iba tusing lakar nyidayang buin suci kanti iba suba ngrasayang kawisesan pidukan Ulune ane murub.
14Ulun Ida Sang Hyang Widi Wasa ane ngandika buka keto. Panemayannyane suba teka, buat Ulun lakar malaksana. Ulun tusing lakar ngengsapang dosa-dosan ibane wiadin nyinahang sih kapiolasan teken iba wiadin madalem iba. Iba lakar kasisipang malantaran paundukan ane suba laksanayang iba.” Sapunika sabdan Ida Sang Hyang Widi Wasa Sane Maha Luur.
Indik
15Ida Sang Hyang Widi Wasa ngandika ring tiang sapuniki:
16“Ih manusa, aji angkihan akeplisan Ulun lakar ngaadang anake ane paling tresnain kita. Kita tusing dadi makeengan wiadin ngeling wiadin mesuang yeh mata.
17Eda baanga paselsel kitane kanti dingeh anak. Eda kita magundul wiadin tusing nyaluk sandal makadadi cirin kitane nandang kasedihan. Eda kita nekep muan kitane muah naar dedaaran ane biasa daara baan anake ane nandang duhkita.”
18Ring rahinane punika pasemengan tiang mabaos ring rakyate. Ring wenginnyane somah tiange padem, tur benjangipun tiang nglaksanayang paindikan sane sampun kapituduhang ring tiang.
19Irika rakyate raris mataken ring tiang sapuniki: “Napi awinannya guru dados malaksana kadi asapunika?”
20Irika tiang raris mabaos ring anake akeh punika: “Ida Sang Hyang Widi Wasa ngandikayang tiang,
21mangda ngrauhang pawarahe puniki ring semeton wong Israel, sapuniki: Semeton nyumbungang kakuatan Perhyangan Agunge. Semeton seneng nyingakin tur ngrauhin Perhyangane punika, nanging Ida Sang Hyang Widi Wasa jaga nemberang Perhyangan punika. Tur kulawargan semetone sane truna-truna sane kantun ring Yerusalem jaga pejah ring payudan.
22Sasampune punika semeton jaga nglaksanayang paindikan sakadi sane laksanayang tiang puniki. Semeton nenten jaga ngangkebin prarain semetone, miwah semeton nenten pacang ngajengang ajeng-ajengan anake sane nandang duhkita.
23Semeton nenten jaga magundul, wiadin jaga nenten nganggen sepatu, wiadin kasedihan wiadin nangis. Semeton jaga nyag malantaran dosa-dosan semetone, tur semeton saling paduuhin ngajak timpal semetone.
24Irika tiang jaga dados ciri pabuat semeton. Semeton jaga nglaksanayang sakancan sane laksanayang tiang. Ida Sang Hyang Widi Wasa ngandikayang mungguing yen paindikan punika sampun kasidan, irika semeton jaga uning, mungguing Ida punika Ida Sang Hyang Widi Wasa Sane Maha Luur.”
25Ida Sang Hyang Widi Wasa ngandika sapuniki: “Ih manusa, Ulun lakar ngaadang Perhyangan Agung sane kukuh bakuh uli sig iane, ane dadi kasumbungan muah kaliangannyane, ane demen ia ngiwasin muah nelokin. Buina Ulun lakar ngaadang pianakne muani-muani muah luh-luh.
26Dikalane Ulun nglaksanayang unduke ento, ditu lakar ada anak ane luput uli bencanane ento, teka ngabarang unduke ento teken kita.
27Didinane ento kita lakar buin nampi kakuasan kitane ngraos ane suba taen ilang. Tur kita lakar ngraos teken anake ento. Malantaran unduke ene kita lakar dadi tanda pabuat rakyate, tur ia pada lakar nawang, mungguing Ulun ene Sang Hyang Widi Wasa.”