Dual PanelRamal
1Ida Sang Hyang Widi Wasa ngandika ring tiang sapuniki:
2“Ih manusa, tekedangja teken pamrentahe di Tirus sabdan Ulun Sang Hyang Widi Wasa Sang Maha Luur ane katiba teken ia, kene: Bes sanget sumbung kitane, kanti kita ngadanin dewek kitane dewata. Kita ngorahang dewek kitane buka widine ane negak di singasananne tur kiter baan pasihe. Kita dadi ngorahang dewek kitane dewata, nanging sujatinne tusing. Kita tuah manusa pada, tusingja soroh dewata.
3Kita ngaden dewek kitane wicaksanaan teken I Daniel, kanti tusing ada paundukan pingit ane kasaruan buat kita.
4Kawicaksanan muah karirihan kitane ngawanang kita sugih aji kasugihan mas muah perak.
5Kita dadi sudagar ane dueg ngalih bati. Ambate sumbung kitane baan kasugihan kitane.
6Sawireh keto ane jani kene sabdan Ulun Sang Hyang Widi Wasa Sang Maha Luur ane katiba teken kita. Sawireh kita ngaden dewek kitane wicaksana buka Widine,
7Ulun lakar nekaang musuh ane angkara murka buat ngebug kita. Ia lakar ngenyagang sakancan paundukan ane melah-melah ane suba puponin kita aji karirihan muah kawicaksanan kitane.
8Ia lakar ngamatiang kita laut taneme di bangbang ane bek misi yeh.
9Dikalan iane teka lakar ngamatiang kita, apake kita enu ngorahang dewek kitane dewata? Dikalan kitane ngarepin anake ane lakar ngamatiang kita, kita lakar dadi manusa pada, tusingja dewata.
10Kita lakar mati buka cicinge ane matianga baan wong sunantarane ane tan pawidi. Ulun Sang Hyang Widi Wasa Sang Maha Luur ane suba mapaica pituduhe ene.”
Sang
11Ida Sang Hyang Widi Wasa malih ngandika ring tiang, sapuniki:
12“Ih manusa, sedihja mangenang paundukan ane lakar nibenin raja Tiruse. Orahang teken ia sabdan Ulun Sang Hyang Widi Wasa Sang Maha Luur ane katiba teken ia, kene: Kita taen dadi conto ane sampurna. Ambate wicaksanane muah bagus kitane.
13Kita nongos di taman Eden, taman Ida Sang Hyang Widi Wasa, nganggo sesocan mawarni-warni, luire: mirah delima, berlian, mirah cempaka, pirus, krisopras muah neprit, lasurit, mirah getih muah malakit. Sesocane ento makejang matatakan mas. Buina sesocane ento makejang kakit dugas kitane mara kadakang.
14Ditu Ulun ngejang malaekat ane ngresresin aukud buat nyaga kita. Kita nongos di gunung Ulune ane suci tur majalan di pantaran sesocan ane dumilah.
15Ngawit uli dinan kitane kadakang, kita nglaksanayang paundukan ane sampurna, kanti kita ngawitin malaksana dursila.
16Kita iteh mablanja muah madepan tur unduke ento ngranayang kita angkara murka muah madosa. Ento awanane Ulun nundung kita uli gunung Ulune ane suci tur malaekate ane nyaga kita ngulah kita uli sig sesocan ane dumilah.
17Kita sumbung baane kita bagus, tur kabinawan kitane ngawanang kita matingkah buka anake belog. Majalaran unduke ento Ulun nyabatang kita ka tanahe, tur numanang kita dadi pinget buat pararatune ane lenan.
18Kita nyalanang paundukan ane kaliwat corah sajeroning kita madedagangan, kanti tongos pangubaktin kitane uug. Ento awanane Ulun ngentungang api ka kota, tur nunjel kotane ento kanti dadi tanah. Sakancan anake ane mabalih kita, ane jani nepukin kita dadi abu.
19Kita suba sirna, sirna kanti salawas-lawasne, tur sakancan bangsa ane suba nawang kita lakar pada tengkejut, tur pada jejeh nampi duman ane patuh buka kita.”
Ramal
20Ida Sang Hyang Widi Wasa ngandika ring tiang sapuniki:
21“Ih manusa, cacadja kota Sidone.
22Orahang teken rakyate ditu, sabdan Ulun Sang Hyang Widi Wasa Sang Maha Luur ane tumiba teken ia kene: Ih Sidon, Ulun ene musuh ibane. Rakyate lakar muji Ulun majalaran pagaen Ulune marep teken iba. Dikalan Ulune nyinahang kasucian Ulune malantaran Ulun nyisipang sakancan anake ane nongos sig ibane, ditu rakyate lakar nawang mungguing Ulun ene Ida Sang Hyang Widi Wasa.
23Ulun lakar nekaang grubug sig ibane tur ngawanang getihe lakar membah sig rurung-rurung ibane. Iba lakar kagebug uli milehan tur rakyat ibane lakar kamatiang. Sasubane keto iba lakar nawang, mungguing Ulun ene Ida Sang Hyang Widi Wasa.”
Wong
24Ida Sang Hyang Widi Wasa ngandika sapuniki: “Parabangsane ane ngiter nganistayang bangsa Israele, tusing ada ane enu makadadi dui muah ketket buat nyakitin bangsa Israel. Tur ia lakar pada nawang, mungguing Ulun ene Ida Sang Hyang Widi Wasa Sang Maha Luur.”
25Ida Sang Hyang Widi Wasa Sang Maha Luur ngandika sapuniki: “Ulun lakar ngamulihang wong Israele uli pantaran bangsa-bangsane tongos Ulune laad nyambehang ia, tur sakancan bangsane ento lakar nawang, mungguing Ulun ene suci. Wong Israele lakar pada nongos sig tanahne padidi, tanah ane laad paicayang Ulun teken parekan Ulune I Yakub.
26Ia lakar pada nongos ditu saha rahayu. Ia lakar pada nyujukang umah tur mamula punyan anggur. Ulun lakar nyisipang sakancan bangsane ane ngiter ia, tur wong Israele lakar karahayuang. Ditu ia lakar nawang, mungguing Ulun ene Sang Hyang Widi Wasa, Widinnyane.”