Dual PanelJagat
1Ring tanggal sane kaping pisan, sasih sane kaping tiga, taun sane kaping solas, sajeroning tiang ring paselongan, Ida Sang Hyang Widi Wasa ngandika ring tiang sapuniki:
2“Ih manusa, orahang teken ratune di Mesir muah teken rakyate makejang kene: Ambate wisesan kitane. Apake ane nyandang anggon Ulun ngimbayang kita?
3Kita waluya buka punyan kayu arase ane di Libanon, ane carang-carangne ipak tur asri. Punyan kayune ento kaliwat tegeh tur nyujuh ambun.
4Ada yeh ane ngranayang ia tumbuh lanus. Buina ada tukad-tukad beten tanahe ane nglemekin ia. Tukad-tukade ento ngecokin tanah tongos kayune mentik. Buina ia ngliahang yehne ngulati sakancan kayune ane di alase.
5Sawireh kayune ento cukup maan yeh, dadinne ia tumbuh tegehan teken kayu-kayune ane lenan. Carang-carangne tumbuh gede-gede tur dawa-dawa.
6Sakancan kedise pada masebun di carang-carangne. Sato-sato alase pada nglekadang panakne di batan kayune ento. Bangsa-bangsane di gumine pada masayuban di beten kayune ento.
7Ambate asrinne kayune ento. Tegeh pesan tur carangne dawa-dawa. Akahne nglumbih tuun nganteg ka tukade ane dalem-dalem.
8Tusing ada kayu aras di taman Ida Sang Hyang Widi Wasa, ane nyandang bandingang teken kayune ento. Tusing ada punyan sanobar ane taen ngelah carang-carang buka keto. Buina tusing ada punyan kayu berangan ane ngelah carang-carang buka keto. Tusing ada kayu di taman druen Ida Sang Hyang Widi Wasa ane buka keto asrinnyane.
9Ulun ngae ia asri aji carang-carang ane ipak. Unduke ento ngranayang iri ati sakancan kayune di Eden, di taman druen Ida Sang Hyang Widi Wasa.
10Sawireh keto ane jani Ulun Sang Hyang Widi Wasa Sang Maha Luur lakar ngorahin kita unduk ane lakar nibenin kayune ane tumbuh nganti nyujuh ambun ento. Dikalan iane tumbuh nganegehang, ia ngancan sumbung.
11Ento awanane Ulun suba nulak ia tur lakar maicayang ia teken pamrentah wong sunantarane. Pamrentahe ento lakar nibakang paundukan ane suba kapastikayang malantaran kajaatannyane.
12Wong sunantara ane murka lakar ngebah kayune ento laut depina buka keto. Carang-carangne ane lung-lung ulung sig sakancan gunung muah lebake di gumine. Sakancan bangsane ane laad nongos di beten kayune ento makejang lakar magedi.
13Sarwa kedise lakar pada teka tur matinggah di punyan kayune ane bah ento, muah sato alase lakar pada nuut carang-carangne.
14Sawireh keto ngawit uli jani kanti sakayang-kayang tusing ada buin punyan kayu ane lakar tumbuh tegeh buka keto kanti muncukne nyujuh ambun yadianja buka kenken ia cukup kalemekin baan yeh. Makejang ia suba kapastiang lakar mati buka manusane di gumine, suba kapastiang lakar mapunduh ngajak anake ane ngungsi ka pati loka.”
15Sapuniki sabdan Ida Sang Hyang Widi Wasa Sane Maha Luur: “Dipanemayan kayune ento ngungsi ka pati loka, Ulun lakar ngawanang apanga yehe ane di beten tanahe ngliab kayune ento, makadadi kaduhkitan. Ulun lakar mincatin yeh tukade tur tusing nglugrain tukade ane liu ento membah. Sawireh kayune ento suba mati, Ulun lakar nedunang peteng dedet ngliput Gunung Libanone, tur ngawanang sakancan kayune di alase pada layu.
16Dikalan Ulune ngentungang kayune ento ka pati loka, munyin grudugan ulungne lakar ngejerang parabangsane. Sakancan punyan kayune ane di Eden muah sakancan kayu pepilihan ane kalemekin baan yehe di Libanon ane suba ngungsi gumine ane beten, lakar pada liang teken unduk ulung kayune ento.
17Sakancan punyan kayune lakar bareng teken kayune ngungsi ka pati loka tur mapunduh ngajak punyan kayune ane suba ulung ditu, tur sakancan anake ane nongos di batan kayune ento lakar sambeh pablesat di pantaran bangsa-bangsane.
18Punyan kayune ento, sang prabu di Mesir muah sakancan rakyatnyane. Yadianja punyan kayu ane di Eden, tusing ada ane tegeh muah asrinne buka keto. Nanging ane jani patuh buka punyan kayune di Eden, punyan kayune ento lakar ngungsi ka pati loka, tur mapunduh ngajak anake ane tan pawidi muah anake ane mati di pasiatan. Ulun ane suba masabda.” Sapunika sabdan Ida Sang Hyang Widi Wasa Sane Maha Luur.