Dual PanelIda S
1Ida Sang Hyang Widi Wasa ngandika ring tiang sapuniki:
2“Ih manusa, orahang teken rakyat kitane kenken panadinne, yen Ulun nibakang perang teken satunggaling gumi. Rakyat gumine ento milih salah tunggal wargannyane buat dadi pajagaan.
3Dikalan pajagaane ento nepukin ada musuh teka, ia laut nepak kulkul bulus, buat ngwangsitin anake makejang.
4Yen ada anak ningeh munyin kulkule ento nanging ia tusing rungu, laut musuhe ento teka tur ngamatiang anake ento, dadinne ia padidi ane negen kapelihan unduk matinnyane ento.
5Matinnyane ento ulihan pelihne padidi, sawireh ia tusing rungu teken wangsit kulkule ento. Yen ia nyak rungu teken wangsite ento sinah ia nyidayang ngluputang awak.
6Yening pajagaane ento nepukin musuh teka tur tusing nepak kulkul bulus, musuhe ento lakar teka tur ngamatiang anake madosa ento, nanging Ulun lakar mategenang matin anake ento teken pajagaane ento.
7Ane jani ih manusa, Ulun nadiang kita pajagaan buat bangsa Israele. Kita patut nekedang teken ia wangsit ane paicayang Ulun teken kita.
8Yen Ulun ngwarahang, mungguing anake ane dursila lakar mati, nanging kita tusing ngwangsitin anake ento buat ngesehin tingkahne, apanga ia nyidayang ngrahayuang idupne, laut ia mati sajeroning enu madosa, ditu Ulun lakar mategenang matin anake ento teken kita.
9Yening kita ngwangsitin anake dursila ento, tur ia tusing nyak suud ngae dosa, ia lakar mati sajeroning enu madosa, nanging idup kitane lakar karahayuang.”
Teteg
10Ida Sang Hyang Widi Wasa ngandika ring tiang sapuniki: “Ih manusa, jumuninja ngorahang teken wong Israele unduk ane suba orahanga kene: ‘Iraga suba kateteh baan dosa-dosa muah kapelihan-kapelihan ane suba laksanayang iraga. Iraga suba kasangsaran, kengkenang iraga buin idup?’
11Orahang teken ia mungguing sasajaane Ulun Ida Sang Hyang Widi Wasa Sang Maha Luur, Widi ane jumeneng langgeng. Ulun tusingja ledang nyingak anake dosa ento mati. Ulun demenan nyingak ia suud ngae dosa tur muponin idup. Ih Israel suudangja nyalanang dosane ento. Ngudiang dadi kita makeneh mati?
12Ane jani, ih manusa, orahangja teken wong Israele, mungguing yen anake ane patut ento ngae dosa, kapatutan ane gelahanga ento tusing lakar ngrahayuang ia. Yen anake dursila suud malaksana dursila, ia tusing lakar kasisipang muah yen anake ane patut ngawitin madosa, uripnyane tusing lakar karahayuang.
13Dipradene Ulun nyanjiang idup teken anake ane patut, nanging yening ia ngawitin mapineh mungguing kapatutannyane ane suba liwat ento suba cukup, laut ia ngawitin ngae dosa, Ulun tusing lakar ngingetang buin kamelahan ane suba laksanayanga ento. Ia lakar mati malantaran dosa-dosannyane.
14Dipradene Ulun ngwangsitin satunggaling jlema dursila, mungguing ia lakar mati, nanging yen ia suud ngae dosa, laut nglaksanayang paundukan ane patut muah melah,
15upama yen ia ngulihang barang gegadennyane wiadin ngulihang barang ane palinga, yan ia suud ngae dosa laut ninutin pidabdabe ane ngranayang idup, ia sinah tusing lakar mati nanging lakar muponin idup.
16Ulun lakar ngampurayang dosa-dosa ane suba laksanaanga, tur ia lakar idup sawireh ia suba nglaksanayang paundukan ane patut muah melah.
17Buina bangsan kitane ngorahang, mungguing paundukan ane laksanayang Ulun ento tusing beneh. Singja buka keto. Tuah caran iane ane tusing beneh.
18Dikalan anake ane patut suud magae ayu, tur ngawitin malaksana corah, anake ento lakar mati malantaran laksanannyane ento.
19Yening anake dursila suud ngae dosa, laut nglaksanayang paundukan ane patut muah melah, anake ento suba ngrahayuang idupnyane.
20Nanging kita Israel, kita ngorahang mungguing paundukan ane laksanaang Ulun ento tusing beneh. Ane jani Ulun lakar nepasin kita aji laksanan kitane.”
Gatra
21Ring tanggal lima, sasih sane kaping dasa, ring taun sane kaping roras sajeroning tiang maselong, wenten anak muani adiri sane sampun luput saking Yerusalem, rauh tur maosang ring tiang, mungguing kota Yerusaleme sampun uug.
22Wengine, sadurung ipun rauh, tiang sampun ngrasayang kawisesan teja wedanan Ida Sang Hyang Widi Wasa. Benjangipun rikala anake punika rauh pasemengan, Ida Sang Hyang Widi Wasa malih ngicen tiang kawisesan buat mabaos.
Dosa-
23Ida Sang Hyang Widi Wasa ngandika ring tiang, sapuniki:
24“Ih manusa, rakyate ane nongos di kotane ane uug di tanah Israel pada ngraos kene: Dane Abraham ento tuah paragayan dane dogen, tur dane suba kicen tanahe ene makejang. Ane jani iraga ajak liu, ento awanane jani tanahe ento dadi gelah iragane ajak makejang.
25Orahang teken ia, sabdan Ulun Sang Hyang Widi Wasa Sang Maha Luur, ane buka kene: Kita ngamah be isi ane enu misi getih. Kita nyumbah arca-arca, tur kita mamati-mati. Apa ane ngranayang kita ngelah pepineh, mungguing tanahe ento dadi gelah kitane.
26Kita ngandelang pedang kitane dogen. Tingkah kitane ngawanang Ulun seneb. Kita suang-suang pada mamitra. Apa ane ngawanang kita mapineh mungguing tanahe ento gelah kitane?
27Orahang teken ia, mungguing Ulun Sang Hyang Widi Wasa Sang Maha Luur, Widi ane jumeneng langgeng, matinget teken ia, mungguing rakyate ane nongos di kota-kotane ane uug ento lakar kamatiang. Anake ane nongos di desa lakar amaha baan satone ane galak-galak. Anake ane mengkeb di gunung-gununge muah di gua-guane lakar mati amah grubug.
28Ulun lakar nadiang gumine ento tongos ane suung mangmung, tur kawisesan ane laad sumbunganga pesan lakar sirna. Pagunungan Israele lakar dadi madurgama pesan, kanti tusing ada anak ane nyidayang mentas ngliwat ditu.
29Yen Ulun nyisipang rakyate malantaran dosa-dosannyane tur ngawanang gumine suung, ditu ia lakar pada nawang mungguing Ulun ene Sang Hyang Widi Wasa.”
Pamup
30Ida Sang Hyang Widi Wasa ngandika sapuniki: “Ih manusa, bangsan kitane pada ngraosang kita, dikalannyane pada matemu di sisin tembok kotane wiadin di patemuan umahne suang-suang, tur ia pada ngraos kene: Jalan jani iraga madingehang sabda ane rauh uli Ida Sang Hyang Widi Wasa.
31Ditu kaulan Ulune pada pagrunyung buat madingehang sabda ane patut warahang kita, nangingke ia tusing nglaksanayang unduk ane tunden kita ia nyalanang. Ia nampi munyin kitane satmaka buka gendinge ane aluh, tur ia nglanturang tingkahne ane loba angkara.
32Pabuat ia, kita tan bina buka pangibure ane ngidungang kidung kasemaran wiadin ngamunyiang kecapi. Ia pada madingehang raos kitane makejang, nanging angan abesikko tusing ada ane tuutina.
33Nanging dikalan sakancan raos kitane ento kasidan, sawireh raose ento pasti lakar kasidan, ditu ia lakar pada nawang, mungguing ada nabi di pantarannyane.”