Dual PanelPamup
1Ida Sang Hyang Widi Wasa ngandika ring tiang, sapuniki:
2“Ih manusa, ene makejang unduk ane sabdayang Ulun, Sang Hyang Widi Wasa Sang Maha Luur, teken gumi Israele: ‘Ene suba pamragat sakuub gumine ento!’”
3“Ih Israel, pamragate suba teka. Iba lakar ngrasayang pidukan Ulune sawireh Ulun lakar nepasin iba majalaran sakancan laksanan ibane. Ulun lakar ngwales teken iba, buat sakancan laksanan ibane ane cemer.
4Ulun tusing lakar ngenuang muah tusing madalem iba. Ulun lakar nyisipang iba majalaran laksanan ibane ane cemer, apanga iba nawang mungguing Ulun ene Ida Sang Hyang Widi Wasa.”
5Sapuniki sabdan Ida Sang Hyang Widi Wasa Sane Maha Luur: “Lakar ada bencana matulu-tuluan ane nibenin iba.
6Makejang suba telah. Ene suba pamragatne. Iba jani suba pragat.
7Pamragate lakar teka pabuat kita anak ane nongos di gumine. Suba paek masanne, mungguing tusing enu buin ada odalan di perhyangan-perhyangane di gunung. Nanging ane ada tuah iur dogen.
8Ane jani enggal pesan iba lakar ngrasayang sakancan kuasan dukan Ulune. Ulun lakar nepasin iba majalaran sakancan laksanan ibane, tur Ulun lakar ngwales teken iba buat sakancan laksanan ibane ane cemer.
9Ulun tusing lakar ngenuang muah madalem iba. Ulun lakar nyisipang iba majalaran laksanan ibane ane cemer, apanga iba nawang mungguing Ulun ene Ida Sang Hyang Widi Wasa. Buina tuah Ulun dogen ane nyisipang iba.”
10Dauh bencana punika sampun rauh pabuat Israel. Kawirosane sayan ngagengang. Kasumbungane sampun ngunggul.
11Kawirosane ngwetuang kajaatan sayan akeh. Nenten wenten drebennyane sane kantun magantulan, yadian arta brana, yadian kawiryan wiadin kaluihanipune.
12Panemayane sampun rauh. Sampun nampek masanipune mungguing indik matumbasan wiadin madolan sampun nenten wenten pikenohipune, santukan pasisip Ida Sang Hyang Widi Wasa jaga nibenin sakancan jadmane makasami.
13Nenten wenten sudagar sane mumur panjang, buat jaga ngwaliang kapocolanipune, santukan pidukan Ida Sang Hyang Widi Wasa nibenin jadmane makasami. Jadmane sane dursila tan mrasidayang kantun urip.
14Trompete masuara tur sakancan anake sami pada sedia. Nanging nenten wenten anak sane medal ka payudan, santukan pidukan Ida Sang Hyang Widi Wasa pateh nibenin jadmane makasami.
Pasis
15Wenten siat ring margi-margine miwah grubug miwah sayah ring pumahan. Asing-asing anak sane medal ka jabaan kotane, ipun padem ring pasiatan miwah sakancan anak sane kantun ring kota ipun jaga padem keni pinakit wiadin nandang seduk.
16Wenten makudang-kudang diri jaga ka gunung-gunung, waluya sakadi paksi darane sane katengkejutang saking lebake. Ipun sareng sami jaga duuh-duuh naanang dosanipune.
17Liman anake jaga sami lemet, tur entudipune pacang ngejer.
18Ipun jaga pada nyaluk pangangge kaduhkitan tur ipun kaliput antuk jejeh ngetor. Tendasipune sami jaga kagundul, tur ipun jaga pada nandang kimud.
19Ipun jaga ngentungang mas miwah perakipune ring margi-margine satmaka lulu, santukan mas wiadin perake punika nenten mrasidayang ngrahayuang ipun, rikala Ida Sang Hyang Widi Wasa mriokang pidukan Idane. Ipun nenten mrasidayang ngunayang mas miwah perake punika buat ngulurin pakitanipune, wiadin ngwaregang basangipune. Mas miwah perake punika nuntun ipun buat nglaksanayang dosa.
20Ipun pecak nyumbungang sesocanipune sane becik-becik nanging ipun ngunayang sesocane punika buat makarya arca-arca sane cemer. Punika awinannya Ida Sang Hyang Widi Wasa sampun ngawinang arta brananipune dados paindikan sane ngawinang ipun seneb.
21Ida Sang Hyang Widi Wasa, ngandika sapuniki: “Ulun lakar nglugrain wong sunantarane ngrampok ia muah anake ane lempas teken pidabdab lakar nyarah tur ngusakang kasugihannyane.
22Ulun tusing lakar ngrunguang dikalan arta branan Perhyangan Agung Ulune kaletehin, dikalan paraparampoke pada mamuuk macelep ka Perhyangan Agung tur ngletehin Perhyangan Agunge ento.
23Makejang pada bingung. Gumine bek misi jlema amati-mati, muah kota-kotane kalikub baan kawirosan.
24Ulun lakar nekaang bangsa ane paling jaata mai, tur lakar nglugrain ia nyuang umah-umah kitane. Jleman kitane ane paling sitenga lakar ilang kawanenanne, dikala Ulun nglugrain bangsa-bangsane ento ngletehin tongos-tongos kitane mabakti.
25Kita lakar putus asa. Kita lakar ngulati dame, nanging tusing lakar bakatang kita.
26Kasangsaran muah orta ane jelek-jelek tusing suud-suud lakar kamiugang. Kita nunas teken paranabine apanga nyinahang pangwakiannyane. Parapanditane tusing enu ngelah ane nyandang tuturanga.
27Sang prabu lakar nandang duhkita, sang pangeran telah pangajap-ajapnyane muah rakyate lakar ngetor kabatek baan jejehne. Ulun lakar nyisipang kita majalaran sakancan laksanan kitane tur nepasin kita patuh buka kita suba nepasin anak lenan. Unduke ene lakar nyinahang teken kita mungguing Ulun Ida Sang Hyang Widi Wasa.”